,
აშშ-ის პრეზიდენტმა, ჯო ბაიდენმა უკრაინისთვის 61 მილიარდი დოლარის დახმარების პაკეტს ხელი მოაწერა, მიწოდება უახლოეს საათებში დაიწყება. ამის შესახებ აშშ-ის პრეზიდენტმა ჯო ბაიდენმა ბრიფინგზე განაცხადა.
95 მილიარდი დოლარის დახმარების პაკეტი, რომელსაც ბაიდენმა ხელი მოაწერა, მოიცავს 61 მილიარდ დოლარს უკრაინისთვის, 26 მილიარდ დოლარს ისრაელისთვის, 8 მილიარდ დოლარს ინდოეთ-წყნარი ოკეანის რეგიონისთვის.
პაკეტი ასევე მოიცავს კანონპროექტს, რომელმაც შესაძლოა აშშ-ში TikTok-ის აკრძალვა გამოიწვიოს - ის დაახლოებით 9 თვეს აძლევს აპლიკაციის ჩინურ მშობლიურ კომპანია ByteDance-ს, რომ აპლიკაცია გაყიდოს, წინააღმდეგ შემთხვევაში TikTok აშშ-ში აპლიკაციების მაღაზიებში აიკრძალება.
აქამდე დახმარების პაკეტი აშშ-ის კონგრესის ქვედა პალატამ - წარმომადგენელთა პალატამ - 311 ხმით მიიღო 112-ის წინააღმდეგ. ამის შემდეგ პაკეტი აშშ-ის კონგრესის ზედა პალატამ - სენატმა - მიიღო 79 ხმით 18-ის წინააღმდეგ.
“ყველას მადლობელი ვარ კონგრესში, დემოკრატების, რესპუბლიკელების, დამოუკიდებლების, ვინც ხმა მისცა ამ კანონპროექტს. მისი გზა ჩემს მაგიდამდე რთული იყო, უფრო მარტივი უნდა ყოფილიყო და უფრო მალე მოსულიყო. მაგრამ საბოლოო ჯამში, ის გავაკეთეთ, რასაც ამერიკა ყოველთვის აკეთებს - რთულ ვითარებას წარმატებით გავუმკლავდით…
ყველაფერს ვაკეთებ, რათა დავრწმუნდე, რომ მიწოდებები ამ წამსვე დაიწყება. შემდეგ რამდენიმე საათში, პირდაპირი მნიშვნელობით რამდენიმე საათში დავიწყებთ უკრაინისთვის აღჭურვილობის გაგზავნას საჰაერო თავდაცვის სისტემებისთვის, არტილერიისთვის, სარაკეტო სისტემებისთვის და ჯავშანმანქანებისთვის.
ეს პაკეტი პირდაპირი მნიშვნელობით ინვესტიციაა, არა მხოლოდ უკრაინის უსაფრთხოებაში, არამედ ევროპის უსაფრთხოებაში და ჩვენს საკუთარ უსაფრთხოებაში”, - განაცხადა ბაიდენმა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
