ამერიკის შეერთებული შტატების პრეზიდენტმა ისრაელის პრემიერ-მინისტრს, ბენიამინ ნეთანიაჰუს, ღაზაში „ჰუმანიტარული პაუზა“ სთხოვა. ცნობა თავად ჯო ბაიდენმა, ჟურნალისტებს დაუდასტურა, თუმცა პაუზის ხანგრძლივობასთან დაკავშირებით კომენტარი არ გააკეთა.
მანამდე ბრძოლაში კონკრეტული მიზნებისთვის, მათ შორის ღაზაში „ჰამასის“ მიერ დაკავებული მძევლების უსაფრთხო გათავისუფლებისთვის, დროებით ხასიათის პაუზის მხარდაჭერა, შტატების ეროვნული უსაფრთხოების საბჭოს პრესსპიკერმაც დაადასტურა.
ისრაელს აშშ-სთან ერთად, სამდღიანი ჰუმანიტარული პაუზისკენ კატარმაც მოუწოდა. ამის მიუხედავად, ისრაელის პრემიერი როგორც ჰუმანიტარულ პაუზაზე, ასევე ღაზის სექტორში საწვავის შეტანაზე უარს აცხადებს.
„ქალაქი ღაზა ალყაშია. ჩვენ მის შუაგულში ვმოქმედებთ, „ჰამასზე“ ზეწოლას ყოველ საათს ვაძლიერებთ, ათასობით ტერორისტი გავანადგურეთ, როგორც მიწის ზევით, ისე მიწისქვეშ. მძევლების გათავისუფლებამდე, ოპერაციის შეწყვეტაზე საუბარიც არ იქნება“, - აღნიშნა ბენიამინ ნეთანიაჰუმ.