კანადის პრემიერ-მინისტრმა ჯასტინ ტრიუდომ გასულ კვირას ქვეყნის პარლამენტში მომხდარი სკანდალის გამო ბოდიში მოიხადა. საუბარია კანადაში უკრაინის პრეზიდენტის ვიზიტისას მომხდარ ინციდენტზე, როდესაც „ვაფენ-სს“-ის ვეტერანი, 98 წლის უკრაინელი იაროსლავ ჰუნკა საკანონმდებლო ორგანოში მიიწვიეს. პარლამენტის სპიკერმა ენტონი როტამ ის ომის გმირად წარადგინა, რასაც დეპუტატების ოვაციები მოჰყვა.
მოგვიანებით, ჟურნალისტებმა გაარკვიეს, რომ ჰუნკა ეთნიკური უკრაინელებით დაკომპლექტებულ გალიჩინის მოხალისეთა დივიზიაში მსახურობდა და ნაცისტთა მეთაურობით მოქმედებდა, მეორე მსოფლიო ომის დასრულების შემდეგ კი თავი კანადას შეაფარა.
„ეს არის შეცდომა, რომელმაც ღრმად შეარცხვინა პარლამენტი და კანადა. ყველა ჩვენგანი, ვინც პარასკევს ამ პალატაში ვიმყოფებოდით, ღრმად ვწუხვართ, რომ ვიდექით და ტაშს ვუკრავდით, მიუხედავად იმისა, რომ კონტექსტი არ ვიცოდით. ეს იყო ჰოლოკოსტის დროს დაღუპული მილიონობით ადამიანის ხსოვნის საშინელი შეურაცხყოფა“, - განაცხადა ტრიუდომ.
26 სექტემბერს, კანადის პარლამენტის თემთა პალატის სპიკერმა, ენტონი როტამ გადადგომის შესახებ განაცხადა მას შემდეგ, რაც გასულ კვირას ვოლოდიმირ ზელენსკის ვიზიტის დროს პარლამენტში იაროსლავ ჰუნკას მიწვევას სკანდალი მოჰყვა.