,
ბრიტანული „დეილი ტელეგრაფი“ (The Daily Telegraph) ყურადღებას უთმობს მეფე ჩარლზის კანადაში ყოფნას და ფართოდ აშუქებს ვიზიტის დროს მომხდარ „ინციდენტებს“, რომლებიც საზოგადოების ინტერესს წარმოადგენს. სტატიაში სათაურით „ჯასტინ ტრიუდო კანადის სენატში მეფის გამოსვლას სპორტული ფეხსაცმელებით დაესწრო“ (ავტორი - კემერონ ჰენდერსონი) სწორედ ერთ-ერთი „ინციდენტია“ განხილული.
გთავაზობთ პუბლიკაციას მცირე შემოკლებით:
ჯასტინ ტრიუდო, კანადის ყოფილი პრემიერ-მინისტრი, რომელიც ოტავაში, ქვეყნის სენატში ბრიტანეთის მეფის ჩარლზის საზეიმო გამოსვლაზე იყო მიწვეული, დარბაზში მწვანე სპორტული ფეხსაცმელებით მივიდა. იგი დედამისთან, მარგარეტთან ერთად შევიდა დარბაზში, ისტორიული გამოსვლის მოსასმენად. ექს-პრემიერს მუქ-ლურჯი კოსტუმი და მონაცრისფრო პერანგი ემოსა, ჰალსტუხი ეკეთა და ფეხთ ეცვა... Adidas Gazelles-ის სპორტული ფეხსაცმელები.
მეფე თავისი გამოსვლის დროს შეეცადა დაერწმუნებინა კანადელები იმაში, რომ მათი ქვეყანა „ძლიერი და თავისუფალია“ - მას შემდეგ, რაც მეზობელი აშშ-ის პრეზიდენტი დონალდ ტრამპი კანადას ამერიკის „51-ე შტატად გადაქცევით“ დაემუქრა.
მისტერ ტრიუდო მეფის გამოსვლის დროს დარბაზის წინა რიგში იჯდა, ყველასათვის დასანახ ადგილზე, რას იმას ნიშნავდა, რომ მის ფეხსაცმელებს მეფის ოჯახის წევრებიც ხედავდნენ
კრიტიკოსებმა სოციალურ ქსელებში ჯასტინ ტრიუდოს დასცინეს ფეხსაცმელების არასწორი შერჩევის გამო.
დიმიტრის სუდასმა, რომელიც კანადის ყოფილი პრემიერ-მინისტრის სტივენ ჰარპერის (კონსერვატიული პარტიის ლიდერის) საკომუნიკაციო სამსახურის დირექტორად მუშაობდა 2006-2015 წლებში, კომენტარი გაუკეთა მისტერ ჯასტინ ტრიუდოს ჩაცმულობას და ფოტოსურათზე მიაწერა: „არ ვიცი, რა ვთქვა“.
ჯასტინ ტრიუდო ლიბერალური პარტიისა და პრემიერ-მინისტრის პოსტებიდან მიმდინარე წლის იანვარში გადადგა, როცა მისი რეიტინგი აბსოლუტურად დაეცა აშშ-ის პრეზიდენტის განცხადების ფონზე - იმ დროს, როცა დონალდ ტრამპმა კანადის ანექსიისა და ჩრდილოელი მეზობლის მიმართ მაღალი სავაჭრო ტარიფების დაწესების სურვილი გამოხატა.
ქვეყნის მტავრობის მეთაურის პოსტზე ტრიუდოს პოლიტიკური მემკვიდრე მარკ კარნი გახდა, რომელმაც ოპონენტი-კონსერვატორი პიერ პულევრი დაამარცხა და კანადელებს დაპირდა, რომ საკადრის პასუხს გასცემდა პრეზიდენტ დონალდ ტრამპს გამაღიზიანებელი გამონათქვამების გამო. ბრიტანეთის მეფის ვიზიტის წინ მარკ კარნი აცხადებდა, რომ „კანადა არასოდეს არ გაიყიდება“ და რომ მისი მთავრობის ოპტიმისტური ვარაუდით, მეფის ვიზიტი კანადის სუვერენიტეტის გამტკიცების სიგნალი იქნება. სხვათა შორის, კანადის პარლამენტის ზედა პალატის - სენატის სხდომა ბრიტანეთის მონარქს ისტორიულად მხოლოდ ორჯერ აქვს გახსნილი. კანადა ბრიტანეთის ერთა თანამეგობრობის წევრია.
უნდა აღინიშნოს, რომ თავისი წინამორბედისგან - ჯასტინ ტრიუდოსაგან განსხვავებით, კანადის დრევანდელი პრემიერ-მინისტრი მკაცრად ეკიდება თავის სამსახურს, გამოირჩევა მაღალი დონის დისციპლინით და იცავს ყველა შესაბამისი ქცევის წესს. მარკ კარნი არ აგვიანებს პრეს-კონფერენციებზე, დაგვიანება კი ჯასტინ ტრიუდოს ჩვევა იყო.
ამბობენ, რომ მარკ კარნისათვის ჩაცმულობის სტილი უკიდურესად ტრადიციულია და სტანდარტებს არ ღალატობს. იგი თანამშრომლების მხრიდანაც იგივეს ითხოვს: სამსახურში ყველა საქმიანი, ოფიციალური ჩაცმულობით უნდა იყვნენ.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
