კორონავირუსს ბუნებრივი წარმომავლობა აქვს და ამას მსოფლიოს უამრავი მეცნიერი ადასტურებს, - განაცხადა ჯანდაცვის მსოფლიო ორგანიზაციის აღმასრულებელმა დირექტორმა, მაიკლ რაიანმა.

„რაც შეეხება უხანში ვირუსის წარმომავლობას, უამრავი მეცნიერისგან ინფორმაციას ვიღებთ და ყველა ერთ რამეს ამბობს: ვირუსს ბუნებრივი წარმომავლობა აქვს. ჩვენ ახლა უკეთ გვესმის სიტუაცია და განვაგრძობთ ვირუსის სწავლას. ეს მნიშვნელოვანია იმისთვის, რომ პროფილაქტიკური ზომები მივიღოთ. ეს მომავალში ანალოგიური სიტუაციის თავიდან აცილების საშუალებას მოგვცემს“, - განაცხადა მაიკლ რაიანმა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.