,
საკრედიტო სააგენტო Fitch-მა ქვეყნის სუვერენული რეიტინგი უცვლელად BB დონეზე დატოვა.
Fitch-ის შეფასებით, სებ-ი ერთგული რჩება საერთაშორისო რეზერვების დაგროვების გაცხადებული პოლიტიკის, რაც ნოემბრის შესყიდვებმაც დაადასტურა.
განახლებული შეფასებით, Fitch-მა საქართველოს სუვერენული საკრედიტო რეიტინგი კვლავ “BB” დონეზე დაადასტურა. რაც შეეხება პერსპექტივას, ის "სტაბილურიდან" "ნეგატიურამდე" შეამცირა.
ერთ-ერთი საკითხი, რასაც სარეიტინგო სააგენტო პერსპექტივის გადახედვის ძირითად ფაქტორებს შორის ასახელებს, ქვეყნის საერთაშორისო რეზერვებს უკავშირდება, რომელიც ლარის კურსის დასაჭერად სებ-ის წინასაარჩევნო ინტერვენციები ფონზე, მკვეთრად შემცირდა.
უფრო დეტალურად, საერთაშორისო რეზერვები ოქტომბერში, თვის ჭრილში 13%-ით ($627,5 მლნ) დაეცა 4,1 მლრდ აშშ დოლარამდე, რაც ექვივალენტურია მხოლოდ 2.1 თვის მიმდინარე ანგარიშის გადახდების და ყველაზე დაბალი დონეა 2021 წლის პირველი კვარტალის შემდეგ.
როგორც შეფასებაშია აღნიშნული, რეზერვების მკვეთრი ვარდნა განპირობებული იყო სებ-ის მიერ 591 მილიონი აშშ დოლარის ინტერვენციებით წინასაარჩევნოდ და ასევე, კორპორაციებისგან სავალუტო ფორვარდების შეძენის გამო. რეზერვები ნოემბრის ბოლოსთვის უმნიშვნელოდ გაიზარდა 4,12 მილიარდ აშშ დოლარამდე.
Fitch-ი ცალკე ფაქტორად გამოყოფს პოლიტიკის პასუხს და აღნიშნავს, რომ მართალია, ამის შემდეგ სებ-მა დაადასტურა თავისი ერთგულება მცურავი გაცვლითი კურსისადმი და პირობა დადო, რომ დააგროვებს სავალუტო რეზერვებს - სებ-ის პრეზიდენტის მოვალეობის შემსრულებელმა განაცხადა, რომ ნოემბერში 124,5 მილიონი აშშ დოლარი შეიძინა, მაგრამ Fitch-ის აზრით, მომავალი გაყიდვები გამორიცხული არ არის.
ამასთან, დეკემბრის შუა რიცხვებიდან, ეროვნული ბანკი კომერციული ბანკებისთვის მინიმალურ სარეზერვო მოთხოვნებს 5 პროცენტული პუნქტით გაზრდის, რაც Fitch-ის თანახმად, სავარაუდოდ გაზრდის სავალუტო რეზერვებს.
Fitch-ი ელის, რომ საერთაშორისო რეზერვები დარჩება უცვლელი 2025-26 წლების განმავლობაში და საკმარისი იქნება დაახლოებით 2.3 თვის მიმდინარე ანგარიშის გადახდების დასაფარად, მიმდინარე ანგარიშის მუდმივი დიდი დეფიციტის და პირდაპირი უცხოური ინვესტიციების უფრო სუსტი პერსპექტივის გათვალისწინებით.
სარეიტინგო სააგენტო ეროვნულ ბანკს ახსენებს პოლიტიკის ჩარჩოსთვის რისკების კონტექსტშიც. Fitch-ის თანახმად, პოლიტიკურმა დაძაბულობამ ასევე შეიძლება შეაფერხოს ან გაართულოს ისეთი რეფორმები, როგორიცაა საქართველოს ეროვნული ბანკის (სებ) დამოუკიდებლობის გაძლიერება კანონმდებლობის მეშვეობით.
