ისრაელი ღაზის სექტორის სამხრეთში მდებარე ქალაქ რაფაჰში სამხედრო ოპერაციას გააფართოებს, თუ ჰამასი რამადანის დაწყებამდე არ გაათავისუფლებს ისრაელიდან გატაცებულ ყველა მძევალს. ამის შესახებ 18 თებერვალს განაცხადა ისრაელის სამხედრო კაბინეტის მინისტრმა ბენი განცმა, რომელიც იერუსალიმში შეხვდა აშშ-ში მოქმედი ებრაული ორგანიზაციების წარმომადგენლებს.

მუსლიმთათვის წმინდა თვე რამადანი 10 მარტს იწყება. ეგვიპტესთან მოსაზღვრე ქალაქ რაფაჰს თავს აფარებს საომარი მოქმედებების გამო ღაზის სექტორის სხვადასხვა რაიონიდან გაქცეული 1,5 მილიონამდე პალესტინელი.

ღაზის სექტორში ომით გამოწვეული ჰუმანიტარული კატასტროფის ფონზე რაფაჰის წინააღმდეგ ისრაელის არმიის შესაძლო ფართომასშტაბიანი ოპერაციის დაწყება საერთაშორისო თანამეგობრობის განსაკუთრებულ შეშფოთებას იწვევს. მსოფლიოს სხვადასხვა ქვეყანა, მათ შორის ისრაელის მოკავშირე აშშ ისრაელზე ზეწოლას ცდილობს, რათა არ დაუშვას რაფაჰზე შტურმი.

პარალელურად, ისრაელი სამხედრო ოპერაციას ატარებს დასავლეთ სანაპიროზეც. რეიდისას რამდენიმე მებრძოლი, მათ შორის მუჰამედ აუფი გაანადგურეს, რომელიც, ცახალის ცნობით, „ჰამასის“ მაღალჩინოსანი იყო და ისრაელის ობიექტებზე თავდასხმებში მონაწილეობდა.