,
ისრაელის პრემიერ-მინისტრმა, ნაფტალი ბენეტმა ირანის ახლადარჩეულ პრეზიდენტს, ებრაჰიმ რაისს ჯალათი უწოდა.
„მიმდინარე კვირას ირანმა ახალი პრეზიდენტი, ებრაჰიმ რაისი აირჩია. ყველა იმ ადამიანისგან, ვისი არჩევაც ხამენეის შეეძლო, მან „თეირანის ჯალათი“ აირჩია. ეს არის ადამიანი, რომელიც სიკვდილის კომიტეტებს ხელმძღვანელობდა, რომელმაც წლების განმავლობაში ათასობით უდანაშაულო ირანელი სიკვდილით დასაჯა“, - აღნიშნა ნაფტალი ბენეტმა.
ისრაელის პრემიერ-მინისტრმა ასევე განაცხადა, რომ ებრაჰიმ რაისის არჩევა მსოფლიო ძალებისთვის ნიშანია, რომ ირანთან დაკავშირებით უნდა გაიღვიძონ.
„სასტიკი ჯალათის რეჟიმს არასდროს უნდა ჰქონდეს მასობრივი განადგურების იარაღი, რაც მას საშუალებას მისცემს, მოკლას არა ათასობით, არამედ მილიონობით ადამიანი“, - განაცხადა ნაფტალი ბენეტმა.
19 ივნისს ირანის საპრეზიდენტო არჩევნებში ებრაჰიმ რაისმა გაიმარჯვა. ებრაჰიმ რაისმა 17.6 მილიონი ხმა მიიღო.
