,
ირანმა აშშ-ის ბაზებზე სარაკეტო და დრონებით თავდასხმების ახალი ტალღა განახორციელა, - ამის შესახებ ისლამური რევოლუციის გუშაგთა კორპუსმა განაცხადა.
ისლამური რევოლუციის გუშაგთა კორპუსის ინფორმაციით, ბაჰრეინში აშშ-ის სამხედრო ობიექტებს დაარტყეს. კერძოდ, დარტყმები განხორციელდა აშშ-ის საჰაერო ბაზაზე მდებარე ვერტმფრენების ტექნიკური მომსახურებისა და შეკეთების ობიექტებზე, P-8 Poseidon თვითმფრინავის განთავსების ანგარზე და სამხედრო დრონების მართვისა და კონტროლის ცენტრზე.
„საპასუხო ოპერაციები გაგრძელდება“, - განაცხადა ისლამური რევოლუციის გუშაგთა კორპუსმა.
ბაჰრეინის შინაგან საქმეთა სამინისტროს ინფორმაციით, ქვეყანაში საჰაერო თავდასხმის მაუწყებელი სირენების ხმები ისმოდა და მოსახლეობას თავშესაფრებში გადასვლისკენ მოუწოდეს.
ამასთან, ირანული მედიის ცნობით, დარტყმები განხორციელდა ქუვეითში, აშშ-ის სამხედრო ბაზებზე განთავსებულ ინფრასტრუქტურაზეც.
ირანის ისლამური რევოლუციის გუშაგთა კორპუსის მტკიცებით, მთლიანად განადგურდა ალი ალ სალემში აშშ-ის ბაზაზე საწვავის შესანახი ავზები და Patriot-ის საჰაერო თავდაცვის სისტემები.
ირანის ისლამური რევოლუციის გუშაგთა კორპუსის ინფორმაციით, დარტყმა განახორციელეს აჰმად ალ ჯაბერის საჰაერო ბაზაზეც, რის შედეგადაც FPS სარადარო სისტემა დაზიანდა.
ქუვეითის შეიარაღებულ ძალებს თავდასხმების შესახებ ინფორმაცია, ჯერჯერობით, არ დაუდასტურებია.
ამერიკელმა სამხედროებმა 12 ივლისის ღამეს ირანზე დარტყმების ბოლო ერთი კვირის განმავლობაში უკვე მესამე ტალღა დაიწყეს, - განაცხადა სოციალურ ქსელ X-ში აშშ-ის შეიარაღებული ძალების ცენტრალურმა სარდლობამ (CENTCOM). ირანულმა სახელმწიფო ტელეარხმა Press TV-მ გაავრცელა ინფორმაცია თეირანში ჰაერსაწინააღმდეგო თავდაცვის მუშაობისა და სხვა ქალაქებში აფეთქებების ხმების შესახებ.
CENTCOM-ში განმარტეს, რომ ეს დარტყმები იყო პასუხი „ისლამური რევოლუციის გუშაგთა კორპუსის“ თავდასხმაზე კონტეინერმზიდ GFS Galaxy-ზე, რომელიც ჰორმუზის სრუტეში კვიპროსის დროშის ქვეშ გადაადგილდებოდა. ამერიკელი სამხედროების განცხადებით, ეკიპაჟის ერთი წევრი დაკარგულად ითვლება, ხანძრისა და დაზიანებების გამო კი კონტეინერმზიდი ნაოსნობის გაგრძელებას ვეღარ ახერხებს.
„ირანმა არასწორი არჩევანი გააკეთა. ახლა ისინი ამისთვის საფასურს იხდიან“, - განაცხადა პენტაგონის ხელმძღვანელმა პიტ ჰეგსეტმა.
„ისლამური რევოლუციის გუშაგთა კორპუსში“ კი აღნიშნეს, რომ მათ გამაფრთხილებელი გასროლა განახორციელეს გემზე, რომელიც ირანის მიერ დამტკიცებული მარშრუტით არ მოძრაობდა, რის შემდეგაც მას „გამაფრთხილებელი გასროლა მოხვდა და გაჩერდა“. ირანულმა მხარემ ასევე აღნიშნა, რომ ჰორმუზის სრუტე ჩაკეტილი დარჩება შემდგომ შეტყობინებამდე და „რეგიონში აშშ-ის ინტერვენციის შეწყვეტამდე“.
