,
ნოემბრის ბოლოს, დეკემბერს დასაწყისში, იმის მიხედვით, ახლადარჩეული პარლამენტის პირველი სხდომა როდის ჩაინიშნება, სალომე ზურაბიშვილი მეორე დღესვე აღარ იქნება პრეზიდენტის თანამდებობაზე, რადგან მას იმპიჩმენტის წესით მოუწევს დატოვოს პრეზიდენტის თანამდებობა, - ამის შესახებ პრემიერ-მინისტრმა ირაკლი კობახიძემ განაცხადა.
მისი განმარტებით, 26 ოქტომბერს „კოლექტიური ნაციონალური მოძრაობა“ დამარცხდება, რასაც პრემიერი მათ წინასწარ ულოცავს.
„ამ ადამიანებს ერთი პატრონი ჰყავთ, სალომე ზურაბიშვილი ერთ-ერთი პატარა რგოლია, იმ პოლიტიკურ ძალაში, რასაც „კოლექტიური ნაციონალური მოძრაობა“ ჰქვია. აქ ერთი ფაქტორია მნიშვნელოვანი, რა თქმა უნდა, მის ჩართულობას ვერავითარი გავლენა ვერ ექნება არჩევნების შედეგებზე, მაგრამ საერთაშორისო დამკვირვებლებმა აუცილებლად ყურადღება უნდა მიაქციონ იმ ფაქტს, რომ სალომე ზურაბიშვილის ჩართულობა წინა საარჩევნო პროცესებზე კონკრეტული პოლიტიკური ძალის სასარგებლოდ, „კოლექტიური ნაცმოძრაობის“ სასარგებლოდ, პირდაპირ და უხეშად ეწინააღმდეგება დემოკრატიული არჩევნების პრინციპებს. ჩვენი კონსტიტუციის თანახმად, საპარლამენტო სისტემაშიც, პრეზიდენტი უნდა იყოს ზეპარტიული, არაერთი დასკვნაა ეუთო/ოდირის, სადაც გაკრიტიკებულია პრეზიდენტის ჩართულობა საარჩევნო პროცესებში კონკრეტული პოლიტიკური ძალების სასარგებლოდ, სხვა ქვეყნების მაგალითებზე მაქვს საუბარი. ძალიან მნიშვნელოვანი იქნება, თუ ამაზეც გამახვილდება ყურადღება, მითუმეტეს, სალომე ზურაბიშვილმა დააანონსა 26 ოქტომბერს რადიკალური ოპოზიციის, „კოლექტიური ნაცმოძრაობის“ საარჩევნო შტაბის გახსნა საქართველოს პრეზიდენტის ოფისში. წარმოიდგინეთ, სახელმწიფო ინსტიტუტის, პრეზიდენტის ინსტიტუტის შენობას იყენებს იმისათვის, რომ „კოლექტიური ნაცმოძრაობის“ საარჩევნო შტაბი გაიხსნას, ერთად ვიზეიმოთ გამარჯვებაო, ასეთი განცხადება გააკეთა. სინამდვილეში, ერთად მოუწევთ იზეიმონ ძალიან მძიმე მარცხი, მორიგი, მე-9 მარცხი, რასაც „კოლექტიური ნაცმოძრაობა“ აუცილებლად განიცდის, წინასწარ ვულოცავ ამ მორიგ მარცხს სალომე ზურაბიშვილს და მის მეგობარ პარტიას“, - განაცხადა კობახიძემ.
მან ასევე ისაუბრა ზურაბიშვილის განცხადებაზე, რომლის მიხედვითაც მას პრემიერ-მინისტრობის კანდიდატი შერჩეული ჰყავს.
„ეს ერთგვარი წინასაარჩევნო პიარული ტრიუკებია, თუმცა, არავითარი ფასი არ აქვს ამ ყველაფერს, მათ შორის, სალომე ზურაბიშვილის პერსონალური რეიტინგის გათვალისწინებითაც და მთლიანად, „კოლექტიური ნაცმოძრაობის“ რეიტინგის გათვალისწინებით. ნოემბრის ბოლოს, დეკემბრის დასაწყისში, იმის მიხედვით, როდის ჩაინიშნება ახლადარჩეული პარლამენტის პირველი სხდომა, მეორე დღესვე, სალომე ზურაბიშვილი აღარ იქნება პრეზიდენტის თანამდებობაზე, რადგან მას იმპიჩმენტის წესით მოუწევს დატოვოს პრეზიდენტის თანამდებობა. რა თქმა უნდა, იმპიჩმენტს ერთგვარი სიმბოლური დატვირთვა აქვს იქიდან გამომდინარე, რომ ერთ თვეში მაინც გაუვიდოდა სალომე ზურაბიშვილს ვადა, თუმცა, ძალიან მნიშვნელოვანია, რომ მოღალატემ იმპიჩმენტის გარეშე არ დატოვოს თანამდებობა, კონსტიტუციის დამრღვევმა პრეზიდენტმა სწორედ იმპიჩმენტით უნდა დატოვოს პრეზიდენტის თანამდებობა, რასაც ქართველი ხალხი უზრუნველყოფს, რომელიც შესაბამის მანდატს მიანიჭებს „ქართულ ოცნებას“, - განაცხადა კობახიძემ.
