საპარლამენტო უმრავლესობის ლიდერის, ირაკლი კირცხალიას განცხადებით, საკონსტიტუციო სარჩელზე მუშაობა დასრულებულია.

როგორც მან "ქართული ოცნების" ოფისში გამართულ ბრიფინგზე განაცხადა, დღევანდელი უმრავლესობის სხდომა გაფართოებულ ფორმატში ჩატარდა, სადაც მიღებულ იქნა გადაწყვეტილება, რომ სარჩელზე დეტალურად ხვალ, პარლამენტის თავმჯდომარე , შალვა პაპუაშვილი პარლამენტში განცხადებას გააკეთებს და სარჩელის დეტალებზე ისაუბრებს.

„დღევანდელი უმრავლესობის სხდომა გაიმართა გაფართოებულ ფორმატში. მხოლოდ ჩვენი პოლიტიკური გუნდი არ ესწრებოდა. ესწრებოდნენ „ევროპელი სოციალისტები“, „ხალხის ძალა“. განსახილველი საკითხი იყო საკონსტიტუციო სარჩელი.

შემიძლია ვთქვა, რომ საკონსტიტუციო სარჩელზე მუშაობა დასრულებულია. მზად არის სარჩელი. ხოლო უმრავლესობის სხდომის დასრულების შემდეგ შევჯერდით, რომ დღეს პარტიის ოფისიდან არ გაკეთებულიყო განმარტება და არ შევსულიყავით დეტალებში. ხვალ, დღის პირველ -ნახევარში პარლამენტის თავმჯდომარე, შალვა პაპუაშვილი გამართავს ბრიფინგს, სადაც შეჯერებულ და დასრულებულ სარჩელზე დეტალურად ისაუბრებს. ამ საკითხის ირგვლივ საუბრისგან დღეს თავს შევიკავებ, იქიდან გამომდინარე, რომ საკითხის განხილვაში მხოლოდ „ქართული ოცნება“ არ იყო ჩართული, მივიღეთ გადაწყვეტილება, რომ პარლამენტის თავმჯდომარემ გამართოს ბრიფინგი“,- განაცხადა კირცხალიამ.