პრემიერ-მინისტრი ირაკლი ღარიბაშვილი ირწმუნება, რომ საქართველოში დღეს არსებული სასამართლო სისტემა ევროკავშირის წევრი ქვეყნების სასამართლო სისტემებს წინ უსწრებს. ამის შესახებ მთავრობის მეთაურმა განცხადება ევროკავშირის 75 მილიონი ევროს მოცულობის დახმარებაზე უარის თქმის მიზეზების კიდევ ერთხელ განმარტების დროს გააკეთა და დასძინა, რომ "საქართველოს სასამართლო სისტემის რეფორმირება გრძელდება".

საქმე ის არის, რომ  2020 წლის სექტემბერში EU-საქართველოს შორის ბრიუსელში გაფორმებული €150 მილიონის ოდენობის სასესხო შეთანხმებაში ჩადებული იყო წინაპირობები, მათ შორის კი უმთავრესი სასამართლო სისტემის დეპოლიტიზაცია და მისი სტრუქტურული რეფორმირება იყო. 2020 წლის სექტემბერში საქართველოს მთავრობამ დადო პირობა, რომ ამ ცვლილებების განხორციელებას დაიწყებდა, რაც ევროკავშირის მაკრო-ფინანსური დახმარების მეორე ტრანშის მიღების საბაბი იქნებოდა. ამ პერიოდში ქვეყნის პრემიერ-მინისტრი გიორგი გახარია იყო. სასამართლო სისტემის რეფორმირების ვალდებულება ირაკლი ღარიბაშვილის მთავრობამაც აიღო, რაც ე.წ. “შარლ მიშელის შეთანხმების” ერთ-ერთ მთავარ ნაწილს წარმოადგენდა. 2021 წლის 28 ივლისს, “ქართულმა ოცნებამ” განაცხადა, რომ “შარლ მიშელის” 19 აპრილის შეთანხმებიდან გადიოდა და შესაბამისად, არც ამ შეთანხმებით გათვალისწინებულ მოთხოვნებს შეასრულებდა. ეს კი თავის მხრივ ნიშნავდა იმასაც, რომ მთავრობა არც მაკროფინანსური დახმარების წინაპირობის შესრულებას გეგმავდა.

„ჩვენს მოსახლეობას უნდა ავუხსნათ - მთავრობამ  2020 წელს აიღო სესხი 150 მლნ ევროს ოდენობით. ამ თანხიდან ნახევარი ჩამორიცხული იქნა შარშან, მეორე ნახევარი, როგორც მაშინ გადწყდა, მიბმული იყო სასამართლო რეფორმაზე. მინდა ყველას შევახსენო და მათ შორის ევროპარლამენტარებს, რომლებიც გამოდიან მსგავსი განცხადებებით, ყველას გვახსოვს, როგორი სასამართლო ჩაიბარა „ქართულმა ოცნებამ“; მას შემდეგ კი არაერთი რეალური რეფორმა გავატარეთ.

სასამართლო რეფორმის 4 ტალღა გავატარეთ, რამაც რეალურად ანგარიშვალდებული გახადა და გახსნა ეს სისტემა. ამას გარდა, მინდა ყველას შევახსენო, რომ საქართველოში დღეს არსებული სასამართლო სისტემა ბევრად უსწრებს წინ დღეს ევროკავშირის მოქმედი წევრი სახელმწიფოების სასამართლო სისტემას. ამას ადასტურებს კვლევები, მათ შორის ევროკავშირის გამოკითხვები. სასამართლო რეფორმა გაგრძელდება“, - განაცხადა ღარიბაშვილმა.