იპოლიტე ხვიჩიას ხელწერილი: "მე, იპოლიტე ალექსანდრეს-ძე ხვიჩია, რესპუბლიკის სახალხო არტისტი, სახელმოხვეჭილი კომიკოსი, ვალდებული ვარ, ჩემი ძვირფასი პარტნიორების (ნარდში) წინაშე დავიცვა მოთამაშის ხელშეუხებლობის პრინციპი, ანგარიში გავუწიო პარტნიორის მოგებას და არ მივითვისო იგი.

1. ერთის ნაცვლად არ გამოვიყვანო სამი ქვა უსირცხვილოდ - მაინც წამასწრებენ და რა ფასი აქვს!

2. წამდაუწუმ არ ვუწოდო ჩემს ძვირფას და ნიჭიერ პარტნიორებს შემდეგი სიტყვები: უპატრონო, საცოდავო, დეგენერატო, კიკა და ა.შ...

3. გავუფრთხილდე სხვის წნევას და შარი არ მოვდო პარტნიორს. ჩემს სასარგებლოდ არ მივითვისო სხვისი მოგებული პარტია.

4. დავუცადო მოთამაშის მიერ ნიჭიერად შესრულებულ სვლას და შემდეგ განვაგრძო თამაში.

5. არ ვიტრაბახო სხვასთან ძლივს მოგებული პარტიებით და არ დავამცირო ნიჭიერი მოთამაშე სხვების წინაშე.

6. ერთხელ და სამუდამოდ ვადასტურებ, რომ კირაცა და მარიკაც ჭეშმარიტად დიდებული მოთამაშეები არიან, ვაღიარებ, რომ მათთან თამაში დიდ სიამოვნებას და ხანდახან შიშსაც კი მგვრის. ამიერიდან ამ პირობის ყველა მუხლს დავიცავ, .. ოღონდ ახლა შემირიგდნენ და მეთამაშონ, ამიერიდან ამ პირობის ყველა მუხლს დავიცავ.

რაზედაც ხელს ვაწერ, იპ.ხვიჩია 19.11.78 წელი.

დღეს იპოლიტე ხვიჩიას დაბადების დღეა!

ფოტო - ფილმ "მხიარული რომანის" გადასაღები მოედნიდან.მსახიობები იპოლიტე ხვიჩია,ხათუნა კოტრიკაძე,ელენე ჩოხელი,მეგი წულიკიძე.(კადრი არ შესულა ფილმში)

ფოტო დაცულია ეროვნულ არქივში.