,
.jpg)
„ნაფიცმა მსაჯულებმა, თითქმის 9-საათიანი განხილვის შემდეგ, აშშ-ის ექს-პრეზიდენტი დონალდ ტრამპი დამნაშავედ აღიარეს ბრალდების ყველა 34-ვე პუნქტით, რომელთა თანახმად, მან, 2016 წლის საპრეზიდენტო არჩევნების წინ, დუმილისათვის ფული გადაუხადა პორნომსახიობ სთორმი დენიელსს, რომელთანაც დონალდ ტრამპს ქორწინების გარეშე ინტიმური კავშირები ჰქონდა“, - ნათქვამია ბრიტანულ გაზეთ „ფაინენშელ თაიმსში“ (Financial Times) გამოქვეყნებულ სტატიაში სათაურით „რა ელოდება დონალდ ტრამპს ნაფიცი მსაჯულების მიერ გამამტყუნებელი განაჩენის გამოტანის შემდეგ?“ (ავტორი - ჯო მილერი). მასში კითხვები და პასუხებია მოცემული.
გთავაზობთ ამონარიდებს პუბლიკაციიდან:
„კაცმა რომ თქვას, ზოგადად, სასამართლო პროცესი ძირითადად არაფრით არ განსხვავდებოდა სხვა მსგავსი პროცესებისაგან, რომელიც ნიუ-იორკის მანჰეტენის სასამართლოში ტარდება ხოლმე, მაგრამ ბრალდება და მსაჯულთა მიერ გამოტანილი დასკვნა უპერეცედენტოა და არ ჰგავს აშშ-ის ისტორიაში მომხდარ არცერთ ფაქტს: ის მიმართულია რესპუბლიკური პარტიის სავარაუდო საპრეზიდენტო კანდიდატის წინააღმდეგ და საპრეზიდენტო არჩევნების წინ მრავალ პოლიტიკური და იურიდიული ხასიათის მქონე კითხვას აჩენს. რა შეიძლება მოხდეს სამომავლოდ? აი, პასუხები რამდენიმე კითხვაზე:
- ჩასვამენ თუ არა დონალდ ტრამპს საპყრობილეში?
- სავარაუდოდ, არ ჩასვამენ. გავიხსენოთ, რომ დონალდ ტრამპს ბრალი წაუყენეს „საქმიანი საარჩევნო დოკუმენტაციის გაყალბებაში“, რომლის საფუძველზე სთორმი დენიელსს ფული გადაუხადეს. პორნომსახიობი ამტკიცებდა, რომ მას დუმილისათვის დონალდ ტრამპის ყოფილმა ადვოკატმა მაიკლ კოენმა 130 ათასი დოლარი მისცა. ასეთი მოქმედებით, ბრალდების თანახმად, დონალდ ტრამპმა დოკუმენტაცია გააყალბა - დახარჯული ფული გააფორმა როგორც „გადახდა იურიდიული სამსახურისთვის“. ექს-პრეზიდენტი 34 ბრალდებიდან არცერთს არ აღიარებს. მან უარყო აგრეთვე ის ფაქტი, რომ სთორმი დენიელსთან სექსი ჰქონდა.
მართალია, ამ ბრალდებით, ნიუ-იორკის შტატის კანონის თანახმად, დონალდ ტრამპს ოთხი წლით თავისუფლების აღკვეთა ელოდება, მაგრამ ეს უჩვეულო განაჩენი იქნება ადამიანისათვის, რომელიც არასოდეს ნასამართლევი არ ყოფილა, 77 წლისაა და საპყრობილეში არაძალადობრივი დანაშაულისათვის - საბუღალტრო დარღვევისათვის უნდა ჩაჯდეს. მანჰეტენის საოლქო პროკურორმა ელვინ ბრეტმა, რომელმაც სისხლის სამართლის საქმე აღძრა, თავი აარიდა კითხვაზე პასუხს - შეეცდება თუ არა დონალდ ტრამპის დაპატიმრებას და განაცხადა, რომ ეს მას შემდეგ გამოჩნდება, როცა განაჩენი იქნება გამოტანილი 11 ივლისის სასამართლო სხდომაზე.
მოსამართლე ხუან მერჩანს შეუძლია სხვადასხვანაირად დასაჯოს ბრალდებული - ვთქვათ, საპრობილის რეჟიმით, პირობითი პატიმრობით ან ფინანსური ზღვევინებით. განაჩენის გამოტანისას მას ასევე შეუძლია მხედველობაში მიიღოს ბრალდებულის ქცევა სასამართლო პროცესის მიმდინარეობის დროს (დონალდ ტრამპმა რამდენჯერმე დაარღვია სასამართლოს დადგენილება ინფორმაციის გაუმჟღავნებლობის შესახებ, იგი ასევე თავს ესხმოდა და შეურაცხყოფას აყენებდა მოწმებს და ნაფიც მსაჯულებს).
- შეიძლება თუ არა მსჯავრდებული დამნაშავე პრეზიდენტად ბალოტირებდეს?
- აშშ-ის კონსტიტუციაში არაფერი არ წერია ისეთი, რომ დამნაშავედ შერაცხულ ადამიანს ფედერალური მნიშვნელობის მქონე თანამდებობის დაკავება ეკრძალებოდეს. კოლორადოსა და სხვა ზოგიერთი შტატის სასამართლოების ამასწინანდელი მცდელობა, რომ დონალდ ტრამპს არჩევნებში მონაწილეობა აკრძალვოდა, კრახით დასრულდა - აშშ-ის უზენაესმა სასამართლომ დაადგინა, რომ ასეთი დადგენილება შტატის სასამართლოს უფლებამოსილებაში არ შედის და კონგრესის პრეროგატივას წარმოადგენს.
თუმცა შეიძლება პრობლემები გაჩნდეს, თუ მოსამართლე დონალდ ტრამპს თავისუფლების აღკვეთას მიუსჯის საპყრობილეს რეჟიმით და შემდეგ იგი, უკვე მსჯავრდებული და პატიმარი, ნოემბრის არჩევნებში ჯო ბაიდენს დაამარცხებს. „მართალია, ამ სიტუაციით საკონსტიტუციო კრიზისი არ დაიწყება, რადგან, იმავე კონსტიტუციური ლოგიკით, შეიძლება განაჩენის აღსრულების გადავადება იმ დრომდე, სანამ პრეზიდენტად არჩეული მსჯავრდებული პრეზიდენტობის ვადას არ დაასრულებს“, - ამბობს ალექს რაინერტი, კორდოზოს იურიდიული სკოლის სისლის სამართლის პროფესორი, - „მართლაცდა, როგორ შეასრულებს თავის მოვალეობას პრეზიდენტად არჩეული ადამიანი, თუ იგი საპყრობილეში, საკანში იჯდება?“.
- შეუძლია თუ არა მსჯავრდებულ დამნაშავეს, პრეზიდენტობის კანდიდატს, ხმის მიცემა?
- ეს დამოკიდებულია იმ შტატის კანონმდებლობაზე, სადაც იგი იქნება გასამართლებული. ნიუ-იორკის შტატის კანონის მიხედვით, დონალდ ტრამპს ხმის მიცემის უფლება არ დაეკარგება, თუ მას მოსამართლე საპყრობილეში არ ჩასვამს. თუმცა ამ შემთხვევაშიც მას უფლება აქვს ხმა მისცეს ციხეში მოთავსებამდე ან ციხიდან გათავისუფლების შემდეგ. დონალდ ტრამპს შეუძლია არჩევნებში მონაწილეობის მიღება თავის მშობლიურ ფლორიდის შტატში, სადაც კანონი მსჯავრდებულებს ხმის უფლებას ართმევს, მაგრამ არა მათ, რომლებიც ისეთ სხვა შტატებში არიან მსჯავრდებულები, სადაც ხმის მიცემის უფლება ძალაში რჩება.
- შეუძლია თუ არა დონალდ ტრამპს საკუთარი თავის შეწყალება, თუ მას პრეზიდენტად აირჩევენ?
- არა, რადგან საქმე აღძრულია შტატის პროკურორების და არა ფედერალური ორგანოების მიერ. ნიუ-იორკის შტატში ჩადენილი დანაშაულისათვის შეწყალების უფლება აქვს შტატის გუბერნატორს - ქეით ხოჩულს, რომელიც დემოკრატიული პარტიის აქტიური წევრია და რომელსაც უფლებამოსილება 2027 წლამდე აქვს. როგორც მისი განცხადებიდან ჩანს - „არავინ არ უნდა იდგეს კანონზე მაღლა“ - იგი რესპუბლიკელ დონალდ ტრამპს არ შეიწყალებს.
წყარო: https://www.ft.com/content/327f834e-71c7-46fd-b3ed-64cb7e9838b4
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
