,
“შერატონ გრანდ თბილისი მეტეხი პალასში” შვეიცარიის სარეიტინგო ასოციაციისა და ნაციონალური ბიზნეს რეიტინგების კავშირის საერთაშორისო დაჯილდოების რიგით მეთექვსმეტე ცერემონია გაიმართა. პრესტიჟული საერთაშორისო ჯილდო leader of the Year ოცდათხუთმეტ ქართულ და უცხოურ კომპანიას გადაეცა.
ფინანსურ-ეკონომიკური მაჩვენებლების რეიტინგებზე დაყრდნობით, წლის ლიდერი კომპანიის ერთ-ერთი ჯილდო საინჟინრო კომპანიამ “იმპოსტი მეპმა” მოიპოვა.
“იმპოსტი მეპის” გენერალური დირექტორი ვაკო კუვშინოვი აღნიშნავს, რომ ეს კომპანიისთვის უკვე მესამე ჯილდოა, თუმცა საერთაშორისო ჯილდო “იმპოსტ მეპმა” მეორედ მოიპოვა.
“ვფიქრობ, ბიზნესისთვის ძალიან დიდი მოტივატორია მსგავს დაჯილდოებაში მონაწილეობის მიღება. ჩვენთვის ეს რიგით მესამე ჯილდოა, საიდანაც საერთაშორისო ორია. უკვე მეორედ დავსახელდით ლიდერ საინჟინრო კომპანიად, რაც ძალიან გვახარებს და გვაძლევს იმის დიდ მოტივაციას, რომ უფრო მეტი გავაკეთოთ ქართულ ბაზარზე” - აცხადებს ვაკო კუვშინოვი.
“იმპოსტი მეპი“ სამი წელია, რაც ქართულ ბაზარზე მომხმარებელს სრულ საინჟინრო სერვისს სთავაზობს. ამ ხნის განმავლობაში კომპანიას უკვე ჯამში ერთი მილიონი კვადრატული მეტრის პროექტირება აქვს განხორციელებული. “იმპოსტი მეპი” სამუშაოებს როგორც სახელმწიფოს, ასევე კერძო კომპანიების დაკვეთით ასრულებს. ის საქართველოში წამყვან სამშენებლო-დეველოპერულ კომპანიებთან თანამშრომლობს.
“იმპოსტი მეპი საქართველოს ნაციონალური ბიზნესრეიტინგის კავშირის მიერ წლის ლიდერ კომპანიად დასახელდა, რაც, რა თქმა უნდა, როგორც დიდი პატივი, ასევე მოტივაცია და პასუხისმგებლობაა.
ჩვენი კომპანია უკვე სამი წელია, რაც ბაზარზე მომხმარებელს სრულ საინჟინრო სერვისს სთავაზობს. “იმპოსტი მეპის” საქმიანობა მოიცავს სახანძრო უსაფრთხოების სისტემების, გათბობა, გაგრილება, ვინტილაციის, წყალკანალიზაციის სისტემების, ელექტროობისა და სუსტი დენების პროექტირებასა და მონტაჟს” - ამბობს “იმპოსტი მეპის” ადმინისტრაციის ხელმძღვანელი ელენე ჯაფარიძე.
საქართველოში ერთადერთმა საერთაშორისო ბიზნეს დაჯილდოებამ ოცდათხუთმეტ კომპანიას შორის “იმპოსტი მეპი” შეარჩია. კომპანიისთვის რიგით მეორე საერთაშორისო აღიარება “იმპოსტი მეპს” აძლევს მოტივაციას, რომ ქართულ ბაზარზე წარმატებული ოპერირება განაგრძოს.
თბილისის მერია გადასასვლელ ხიდთან, ცოტნე დადიანისა და სადგურის მოედნის დამაკავშირებელი ესტაკადის მშენებლობას გეგმავს. ახალი ინფრასტრუქტურული პროექტი 2026 წლის ბიუჯეტში უკვე გათვალისწინებულია და მასზე მომდევნო წელს 10 მილიონი ლარი დაიხარჯება, 2027 წელს კი დამატებით 87.5 მილიონი ლარი. მთლიანობაში 280-მეტრიანი ესტაკადის პროექტირება-მშენებლობის წინასწარი სავარაუდო ღირებულება 100 მილიონ ლარს შეადგენს. პროექტზე საგზაო მარშრუტის კვლევაზე 2025 წელს უკვე 2.5 მილიონი ლარი დაიხარჯა.
2026 წლის ბიუჯეტის განმარტებით ბარათში მითითებულია, რომ სარკინიგზო მაგისტრალი ქალაქის ცენტრალურ მონაკვეთს ყოფს იმგვარად, რომ მოედნის პარალელურად არსებულ ქუჩებს შორის დაკავშირებადობა მინიმალურია და აუცილებელია საზოგადოებრივი ტრანსპორტისთვის ახალი ინფრასტრუქტურის შექმნით ქალაქის უბნების დაკავშირებადობა გაუმჯობესდეს.
"ქალაქ თბილისის ცენტრში არსებული რკინიგზის კორიდორი და თანმდევი ინფრასტრუქტურა ქმნის 4-კილომეტრიან მონაკვეთს აღმოსავლეთ-დასავლეთ სატრანსპორტო კავშირის გარეშე, გარდა შეზღუდული რაოდენობის საფეხმავლო კავშირებისა. ეს ისტორიული დაბრკოლება ხელს უშლის თბილისის სატრანსპორტო გეგმის პრიორიტეტებისკენ მისწრაფებას. სადგურის მოედანი მდებარეობს აღნიშნულ ამ 4-კილომეტრიან მონაკვეთში. ის წარმოადგენს დედაქალაქის უმნიშვნელოვანეს სატრანსპორტო „ჰაბს“, სადაც თავს იყრის 61 ავტობუსის მარშრუტი, მეტროს 2 ხაზი, ისევე როგორც საქართველოს რკინიგზის სერვისები. ტერიტორია ემსახურება საათში 330 ავტობუსის სერვისს, საიდანაც მომავალში 150 გამოიყენებს ხიდს. თბილისის სატრანსპორტო გეგმის თანახმად, სადგურის მოედანი ასევე იქნება თბილისის საგარეუბნო რკინიგზის სერვისების თავმოყრის წერტილი, რაც კიდევ უფრო მნიშვნელოვანს გახდის მისი, როგორც სატრანსპორტო ჰაბის ფუნქციას. ამჟამინდელი მდგომარეობით, აღმოსავლეთ-დასავლეთ კავშირის არარსებობა აფერხებს მაღალი ხარისხის ჰაბის განვითარებას, ხშირად 22 ავტობუსის მარშრუტის შეწყვეტა ხდება ვადაზე ადრე ან ახორციელებენ 1.5 კილომეტრიანი შემოვლითი მგზავრობას, რომელიც მნიშვნელოვნად ზრდის გადაადგილების დროს, ჰაერის დაბინძურებასა და ვიბრაციას, ისევე როგორც ამცირებს მარშრუტების ხარჯეფექტიანობას. თბილისის სატრანსპორტო გეგმით გათვალისწინებულ აღმოსავლეთ-დასავლეთის შეკავშირებულობის ალტერნატივების ანალიზის კვლევამ, რომელიც მსოფლიო ბანკის დახმარებით ჩატარდა, მულტიკრიტერიუმიანი ანალიზის საშუალებით, გამოავლინა თბილისის ცენტრში არსებული რკინიგზის ხაზის ორ მხარეს (აღმოსავლეთ და დასავლეთ) შორის ახალი კავშირის შექმნის საუკეთესო ალტერნატივა - საზოგადოებრივი ტრანსპორტის პრიორიტეტის მქონე საავტომობილო ხიდი, დადიანის ქუჩასა და სადგურის მოედანს შორის. ქ. თბილისის მუნიციპალიტეტის მერია ფლობს თბილისის სატრანსპორტო გეგმით გათვალისწინებულ აღმოსავლეთ-დასავლეთის შეკავშირებულობის ალტერნატივების ანალიზის კვლევის საფუძველზე შექმნილ ანგარიშს, კონცეფციას. პროექტის მიზანი არის, ამ კონცეფციით განსაზღვრული, საავტომობილო ხიდის მშენებლობა.
აღნიშნული ობიექტი წარმოადგენს საავტომობილო ხიდს ქალაქ თბილისში, რომელიც დააკავშირებს სადგურის მოედანს დადიანის ქუჩასთან და იქნება 280 მეტრი სიგრძის, 8.5 მეტრი სიგანის სწორ მონაკვეთში, ხოლო 15 მეტრი სიგანის მოხვევის მონაკვეთში (ე.წ. სპირალი, რომელიც ეშვება სადგურის მოედანზე). ხიდი იქნება ორზოლიანი და დასავლეთით, სადგურის მოედანზე დაშვებისას, რამპას ექნება მარჯვნივ ჩამხვევი ზოლი. რკინიგზის დერეფნის კვეთისას აუცილებელია 7 მეტრიანი სხვაობა რკინიგზის ლიანდაგსა და ხიდის სტრუქტურას შორის. საავტომობილო ხიდი ითვალისწინებს 18 მეტრიანი ავტობუსების მართვის ტრაექტორიებს, მისი მაქსიმალური გრძივი ქანობი - 10.7%, ხოლო მინიმალური რადიუსი - 12 მეტრი. საავტომობილო ხიდის გამტარობა შერეული ნაკადების პირობაში იქნება 800 ავტომობილი ერთ საათში ერთი მიმართულებით", - ნათქვამია 2026 წლის ბიუჯეტის განმარტებით ბარათში.
წყარო: https://bm.ge
