,
ინდოეთის ყველაზე ძველ ინგლისურენოვან და მრავალტირაჟიან გაზეთ „თაიმს ოფ ინდიაში“ (Times of India) გამოქვეყნებულია სტატია სათაურით „საქართველო ინდოელ სტუდენტ მედიკოსებს სასწავლებლად ისევ იზიდავს“ (ავტორი - იშანი დუტაგუპტა).
გთავაზობთ პუბლიკაციას მცირე შემოკლებით:
ინდოელი სტუდენტების რაოდენობა, რომლებიც სასწავლებლად საქართველოში მიემგზავრებიან - ქვეყანაში, რომელიც აღმოსავლეთ ევროპისა და დასავლეთ აზიის გზაშესაყარზე მდებარეობს - განუხრელად მატულობს. როგორც 2021 წელს ინდოეთის საგარეო საქმეტა მინისტრმა სუბრამანიამ ჯაიშანკარმა თბილისში ვიზიტის დროს აღნიშნა, იმ დროისათვის ინდოელი სტუდენტების რიცხვი რვა ათასს აღწევდა, ახლა კი ბევრად მეტია.
ინდოელი ახალგაზრდებიდან ისინი, რომლებიც ცოდნის (ძირითადად სამედიცინო განათლების) მიღების მიზნით საქართველოს ირჩევენ, ექიმის პროფესიას ქვეყნის სხვადასხვა უმაღლეს სასწავლებლებში ეუფლებიან - თბილისის სახელმწიფო სამედიცინო უნივერსიტეტში, ევროპულ უნივერსიტეტში, კავკასიის საერთაშორისო უნივერსიტეტში, ქუთაისში და ბათუმში არსებულ უნივერსიტეტებში.
შინმაი შარად დაჯავმა, თბილისის ქართულ-ამერიკულ უნივერსიტეტში რომ სწავლა დაეწყო, ამისათვის მან 2018 წელს ქალაქ პუნაში შესაბამისი გამოცდები ჩააბარა და ნებართვა მიიღო: „უმაღლესი სამედიცინო განათლებისათვის ყველაზე მიზენშეწონილად საქართველო ჩავთვალე, რომლიც ინდოეთის მოქალაქეებისათვის ყველაზე უსაფრთხო და მისაწვდომ ქვეყანას წარმოადგენდა“, - ამბობს შინმაი დაჯავი. მისი არჩევანი კიდევ ერთ მიზეზი ის იყო, რომ საქართველოს უმაღლესი სასწავლებლების სამედიცინო პროფილი მოწონებული იქნა ინდოეთის ეროვნული სამედიცინო კომისიის მიერაც.
„სამედიცინო კურსის გავლის დროს ჩვენ მუდმივად გვაქვს ურთიერთობა ექიმებთან და პაციენტებთან - იმიტომ, რომ ჩვენი სამედიცინო დისციპლინების უმეტესობა საავადმყოფოებში ტარდება. დიპლომი და ცოდნის ხარისხი, რომელსაც ჩვენ ვიღებთ, მოწონებულია ჯანდაცვის საერთაშორისო ორგანიზაციის მიერ, შესაბამისად, უფლება გვაქვს განაცხადი შევიტანოთ დიდ ბრიტანეთსა და აშშ-ში სამედიცინო განათლების ლიცენზირებისათვის, რომელიც უცხოელ ექიმებს მოეთხოვებათ“, - ამბობს შინმაი დაჯავი.
ინდოელი სტუდენტების მიერ საქართველოში სამედიცინო განათლების დაუფლებას ხელს უწყობენ სხვადასხვა არასამთავრობო ორგანიზაციები, მათ შორისაა ორგანიზაცია „კულტურული მრავალფეროვნება“, რომელსაც დარპან პრაშერი ხელმძღვანელობს. იგი საქართველოში 2022 წლიდან ცხოვრობს: „ჩემი ორგანიზაცია ინდოელ სტუდენტებს სხვaდასხვა საკითხების გადაწყვეტაში ეხმარება, იურიდიული მხარდაჭერის ჩათვლით და ხელს უწყობს ქართულ საზოგადოებაში მათ ინტეგრაციას, კულტურული ღონისძიებების მეშვეობით. ამას წინათ ერთად ვიზეიმეთ ინდოეთის დამოუკიდებლობის დღე, ჩავატარეთ ჩვენი ეროვნული ფესტივალები („დივალი“, „ნავრატრი“, „რამნავი“), ავღნიშნეთ იოგის საერთაშორისო დღე და ა.შ.“, - ამბობს დარპან პრაშერი, რომელიც ინდოელ სტუდენტებს პანდემიის დროს დაეხმარა, განახორციელა მათი უზრუნველყოფა ანტიკოვიდური პრეპარატებით და ხელი შეუწყო ევაკუაციას ჩარტერული ავიარეისებით, ინდოეთში დასაბრუნებლად.
ინდოელი სტუდენტები თვლიან, რომ ქართველები ძალიან სტუმართმოყვარენი არიან და ხშირად ინტერესდებიან ინდური კულტურით. „საქართველოში ხანდაზმულ მოქალაქეებს კარგად ახსოვთ ბოლივუდის მიერ [1940-1980-იან წლებში] გადაღებული ინდური ფილმები. ეს ჩვენთვის, ინდოელი სტუდენტებისათვის, რომლებიც სამშობლოსგან მოშორებით ვცხოვრობთ, ძალიან პოზიტიურია, რომ ქართველებს ინდური კულტურის მიმართ ასეთი კეთილი განწყობა აქვთ“, - ამბობს შინმაი დაჯავი, რომელიც სწავლის დასრულების შემდეგ ინდოეთში დაბრუნებას გეგმავს.
საინტერესოა, რომ საქართველოს ირჩევენ ის სტუდენტებიც, რომლებიც სხვა ქვეყნის უმაღლეს სასწავლებლებში სწავლობდნენ. მაგალითად, ანანია ატრიმ, რომელიც ლატვიაში ეუფლებოდა საერთაშორისო ურთიერთობებს და პანდემიის გამო განათლების მიღება ვერ დაასრულა, ახლა ცოდნას საერთაშორისო პოლიტიკისა და პოლიტოლოგიის სფეროში შავი ზღვის უნივერსიტეტში იღებს, თანაც ხშირად დისტანციური წესით.
„როგორც კი პანდემიის შემდეგ სიტუაცია გაუმჯობესდა, საქართველოში გავემგზავრე და უნივერსიტეტი მეგობრების რეკომენდაციით ავირჩიე. რა თქმა უნდა, მეც ბევრი რამ წავიკითხე ამ მიზნით. გარდა ამისა, საქართველოს დედაქალაქი თბილისი მსოფლიოში ყველაზე უსაფრთხო ქალაქად არის აღიარებული საზღვარგარეთ სწავლის მსურველებისათვის““, - ამბობს ანანია ატრი.
„იმ დროს, როცა საქართველოში ბევრი უცხოელი სტუდენტი სწავლობს სხვადასხვა სფეროში, ინდოელებისათვის უმეტესად სამდიცინო განათლება დომინირებს. მე ჩემს კურსზე მხოლოდ ერთადერთი სტუდენტი ვარ განსხვავებული პროფილით. ამის მიუხედავად, უნივერსიტეტში მულტიკულტურული გარემო არსებობს და შემიძლია ვთქვა, რომ სრულიად ინტეგრირებული ვარ ქართველებთან. ჩემთვის პირადად საქართველოს უპირატესობა იმაშია, რომ აქ ინდოელ სტუდენტს მაღალხარისხიან განათლების მიღება შეუძლია სხვადასხვა სფეროში, თანაც საკმაოდ იაფად“, - ამბობს ანანია ატრი. იგი პოზიტიურ და მიმზიდველ ფაქტორად მიიჩნევს იმასაც, რომ საქართველოში გარემო უსაფრთხოა, იოლია ადამიანებთან საერთო ენის გამონახვა... საქართველოს უნივერსიტეტების კურსდამთავრებულებს მეტი შესაძლებლობა აქვთ ევროპაში [წასასვლელად], რადგან ქართული სახელმწიფო კარგად არის ცნობილი საერთაშორისო დონეზე, [განსაკუთრებით დასავლეთში].
ინდოელები საქართველოში, ცოდნის დაუფლების გარდა, სხვადასხვა ბიზნესითაც არიან დაკავებულნი - სასტუმროებისა და რესტორნული ბიზნესით. ინდოელები მუშაობენ აგრეთვე სოფლის მეურნეობაში - ფერმერების სახით, ასევე ელექტროენერგეტიკისა და მეტალურგიის სფეროში.
საქართველომ ამას წინათ ინდოელი ტურისტებისა და საქმიანი ადამიანებისათვის შემოიღო პროგრამა Georgia eVisa, რომელიც ორეტაპიანია. პირველ ეტაპზე საქართველოში წამსვლელი სხვადასხვა მონაცემებს და დამატებით ინფორმაციებს ტოვებს DuVerify-ს გვერდზე, რომლებიც მოწმდება, შემდეგ კი ანგარიში იგზავნება საქართველოს საგარეო სამინისტროში გადაწყვეტილების მისაღებად.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
