ჩუღურეთის რაიონის გამგეობის ორგანიზებით, ილიას ბაღში მუსიკალურ-ლიტერატურული საღამო, სახელწოდებით „საქართველო უპირველეს ყოვლისა“, გაიმართა.
ღონისძიება ჩუღურეთის რაიონის გამგებელმა დავით მაქაცარიამ და საქართველოს პარლამენტის წევრმა რიმა ბერაძემ გახსნეს.
ღონისძიება მიზნად ისახავდა საქართველოს დამოუკიდებლობის მნიშვნელობის დაფასებასა და მომავალი თაობისთვის იმ ადამიანების ღვაწლის გაცნობას, რომლებმაც ქვეყანას თავისუფლება და დამოუკიდებლობა შეუნარჩუნეს.
საღამოზე მოწვეულმა მსახიობებმა და კულტურის სფეროს წარმომადგენლებმა, მინისპექტაკლით საქართველოს წარსულისა და დამოუკიდებლობისთვის ბრძოლის ისტორია წარმოადგინეს. ხაზი გაესვა მიმდინარე მსოფლიო პოლიტიკური მოვლენების ფონზე დამოუკიდებლობისა და მშვიდობის შენარჩუნების მნიშვნელობას.
„მინდა ძალიან დიდი მადლობა გადავუხადო მოწვეულ სტუმრებს. ჩვენმა ქვეყანამ დამოუკიდებლობის მოპოვებიდან დღემდე არცთუ ისე მარტივი პერიოდი გაიარა. ახლაც ძალიან საპასუხისმგებლო და რთული ეტაპია საქართველოსთვის, რომელსაც დიდი სიფრთხილით და სწორი ნაბიჯებით გავდივართ“, - განაცხადა დავით მაქაცარიამ.
საღამო ანსამბლ „რუსთავისა“ და ქართველი შემსრულებლების კონცერტით დასრულდა.
ღონისძიებას აღმასრულებელი და საკანონმდებლო ხელისუფლების წარმომადგენლებთან ერთად, რაიონის მოსახლეობა და რაიონის საჯარო სკოლების მედალოსანი მოსწავლეები ესწრებოდნენ.
