,
სომხეთი და აზერბაიჯანი სამშვიდობო შეთანხმების გაფორმებაზე მუშაობენ. 25 მაისს, პუტინის მიწვევით, მოსკოვში ფაშინიანსა და ალიევს შორის შეხვედრა გაიმართა, სადაც სომხეთი და აზერბაიჯანი ერთმანეთის ტერიტორიული მთლიანობის აღიარებაზე შეთანხმდნენ.22 მაისს ნიკოლ ფაშინიანმა განაცხადა, რომ მთიანი-ყარაბაღის მოსახლეობის უსაფრთხოებისა და უფლებების დაცვის გარანტიების მიღების შემდეგ, სომხეთი მზადაა, აზერბაიჯანის ტერიტორიული მთლიანობა ყარაბაღთან ერთად აღიაროს. ფაშინიანის მიერ მთიანი ყარაბაღის აზერბაიჯანის ნაწილად აღიარებას, სომხეთსა და მთიან-ყარაბაღში უკმაყოფილება მოჰყვა.
გუშინ აზერბაიჯანის პრეზიდენტი ილჰამ ალიევმა მორიგი განცხადება გააკეთა, სადაც იგი , მთიანი ყარაბაღის დე ფაქტო ხელისუფლებას დაემუქრა და მათ საკუთარი ნებით ბაქოსთვის ჩაბარების შემთხვევაში, ამნისტიას შეპირდა.
“თითქოს მათ ყავთ “პარლამენტი”, თითქოს ჰყავთ პრეზიდენტი, მინისტრი, ეს ყველაფერი სასაცილოა. ჩვენ უბრალოდ მოთმინებას ვიჩენთ. თუმცა, დღეს უკვე ეჭვი არავის ეპარება იმაში, რომ ამ რეგიონში ნებისმიერი ოპერაციის ჩატარება შეგვიძლია. ამიტომაც, “პარლამენტი” უნდა იყოს დათხოვნილი, ელემენტი კი, რომელიც საკუთარ თავს “პრეზიდენტს” უწოდებს, უნდა ჩაგვბარდეს, ასევე ყველა “მინისტრმა”, “დეპუტატმა” და სხვამ პოსტები უნდა დატოვონ. მხოლოდ ამ შემთხვევაში შეიძლება საუბარი რაიმე ამნისტიაზე”.
ალიევის განცხადებით, მან რამდენიმეჯერ დელეგაცია გაგზავნა სტეპანაკერტში დე ფაქტო ხელისუფლებასთან შეხვედრებზე, შემდეგ კი იგივე დელეგაცია ბაქოში ორჯერ მიიწვია, რაზეც უარი მიიღო.
“მესამედ აღარ მოვიწვევთ. ან თავად ჩამოვლენ და ფიქტიურ თანამდებობებს დატოვებენ და აზერბაიჯანის მოქალაქეობის მისაღებად მოგვმართავენ, ან ნახავენ, რა იქნება. ჩემი სიტყვა საბოლოოა. ამნისტიის შესაძლებლობას ხელიდან უშვებენ. ისევე, როგორც ბევრი შესაძლებლობა გაუშვეს ხელიდან და ყოველ ჯერზე, თავში რამე უნდა “ჩაგვეცხო” მათთვის, აზრზე რომ მოსულიყვნენ”.
დღეს უკვე მოვლენებმა სახიფათო კუთხით დაიწყეს განვითარება. აზერბაიჯანის თავდაცვის სამინისტროს მტკიცებით, მთიან ყარაბაღში, აზერბაიჯანულ პოზიციებს სომხეთის არაფორმალურმა შეიარაღებულმა დაჯგუფებებმა ცეცხლი გაუხსნეს.
უწყების მიერ გავრცელებულ ინფორმაციაში ნათქვამია, რომ აზერბაიჯანის არმიის დანაყოფებმა საპასუხო ზომები მიიღეს, სროლა კი იმ რაიონში იყო, სადაც რუსეთის სამშვიდობო კონტინგენტია განლაგებული. სომხეთის თავდაცვის უწყებამ გავრცელებულ ინფორმაციას მორიგი დეზინფორმაცია უწოდა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
