,
ბელგოროდის ოლქში „ილ-76“ ტიპის სამხედრო თვითმფრინავის ჩამოვარდნასთან დაკავშირებით, რუსეთის მოთხოვნით, ნიუ-იორკში გაერო-ს უშიშროების საბჭოს სხდომა გაიმართა.
„ყველა ინფორმაცია, რაც დღეს გვაქვს, აჩვენებს, რომ საქმე გვაქვს მიზანმიმართულ, განზრახ დანაშაულთან“, - განაცხადა გაერო-ში რუსეთის ფედერაციის წარმომადგენლის მოადგილემ დიმიტრი პოლიანსკიმ შეხვედრაზე.
მისი მტკიცებით, უკრაინა მზადაა, დასავლეთის გეოპოლიტიკური ინტერესების გულისთვის, საკუთარი მოქალაქეები მსხვერპლად შესწიროს.
თავის მხრივ, გაერო-ში უკრაინის წარმომადგენლის მოადგილემ, კრისტინა გაიოვიშინმა განაცხადა, რომ უკრაინა არ იყო ინფორმირებული ტყვეების გადასაყვანად გამოყენებული ტრანსპორტის ტიპის შესახებ. „მხოლოდ ეს შეიძლება მიუთითებდეს რუსეთის მიზანმიმართულ ქმედებებზე, საფრთხე შეუქმნას ტყვეების სიცოცხლესა და უსაფრთხოებას“, - აღნიშნა კრისტინა გაიოვიშინმა.
„თუ დადასტურდება ინფორმაცია იმის შესახებ, რომ თვითმფრინავში უკრაინელი სამხედრო ტყვეები იმყოფებოდნენ, ეს იქნება რუსეთის მხრიდან საერთაშორისო ჰუმანიტარული სამართლის სერიოზული დარღვევა და ეს იქნება იარაღის ტრანსპორტირების დასაფარად რუსეთის მიერ ჰაერში ცოცხალი ფარის გამოყენების პირველი შემთხვევა“, - აღნიშნა უკრაინის წარმომადგენელმა.
ამასთან, მედიის ინფორმაციით, დასავლეთის სახელმწიფოების წარმომადგენლებმა შეხვედრაზე ხაზგასმით აღნიშნეს, რომ თვითმფრინავი არასოდეს ჩამოვარდებოდა უკრაინის წინააღმდეგ რუსეთის აგრესიული ომის გარეშე.
„რუსეთს არაერთხელ უცდია, ამ უაზრო და არაპროვოცირებული ომის ტრაგედიებზე პასუხისმგებლობა სხვებისთვის დაეკისრებინა და წარმოეჩინა, თითქოს ის იყო მსხვერპლი და არა აგრესორი“, - განაცხადა გაერო-ში აშშ-ის ელჩმა, რობერტ ვუდმა.
გაერო-ს უშიშროების საბჭოს სხდომა, რომელიც რუსეთის მოთხოვნით გაიმართა, „ილ-76“-ის ჩამოვარდნის მიზეზებზე გადაწყვეტილების მიღების გარეშე დასრულდა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
