,
პოლონეთმა და ისრაელმა ქვეყნებიდან საკუთარი ელჩები გამოიხმო. მიზეზი პოლონეთის პარლამენტის ქვედა პალატის მიერ ახალი კანონპროექტის მიღებაა, რომელიც ჰოლოკოსტის მსხვერპლთა შთამომავლებისთვის, წართმეული ქონების დაბრუნების მოთხოვნაზე ხანდაზმულობის ვადას აწესებს.
„დიდი იმედგაცრუება“, „სირცხვილი“, „ამორალური კანონი“, - ასე აფასებს ისრაელი ოფიციალური ვარშავის მიერ დაგეგმილ ცვლილებას.
„ეს არის არა ისტორიული დებატები ჰოლოკოსტზე პასუხისმგებლობის შესახებ, არამედ - პოლონეთის მორალური ვალი მათ წინაშე, ვინც მისი მოქალაქე იყო და რომელთა ქონება გაძარცვეს ჰოლოკოსტის დროს და კომუნისტური რეჟიმის პირობებში”, - აღნიშნულია ისრაელის საგარეო საქმეთა სამინისტროს განცხადებაში. ამასთან, ხაზგასმულია, რომ საკონმდებლო ცვლილება დააზიანებს ჰოლოკოსტისას გადარჩენილთა და მაშინ დაღუპულთა შთამომავლობის 90%-ს.
„ეს ამორალური კანონი სერიოზულად აისახება ჩვენს ქვეყნებს შორის ურთიერთობებზე”, - წერია პოლონეთში ისრაელის საელჩოს განცხადებაში.
აღნიშნულ განცხადებებს გამოეხმაურა ვარშავაც. პოლონეთის საგარეო საქმეთა სამინისტრო განმარტავს, რომ ახალი რეგულაციები არანაირად არ ზღუდავს ზიანის ანაზღაურების მოთხოვნაზე სამოქალაქო სარჩელის შეტანის შესაძლებლობას - განურჩევლად მოსარჩელის ეროვნებისა და წარმოშობისა.
ჰოლოკოსტის სახელით ცნობილია მეორე მსოფლიო ომის პერიოდში გერმანიის ნაცისტური ხელისუფლების და მისი მოკავშირეების მიერ განხორციელებული ებრაელების მასობრივი გენოციდი.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
