,
„მას შემდეგ, რაც საქართველოს პარლამენტმა „ლგბტ“-საზოგადოების წინააღმდეგ მკაცრი კანონი მიიღო, ერთი დღეც არ იყო გასული, რომ ცნობილი ქართველი ტრანსგენდერი მოდელი კესარია აბრამიძე მოკლული ნახეს“, - ნათქვამია ბრიტანულ გაზეთ „გარდიანში“ (The Guardian) გამოქვეყნებულ სტატიაში სათაურით „ქართველი ტრანსგენდერი პარლამენტის მიერ ანტი-„ლგბტ“-ური კანონის მიღების შემდეგ მოკლეს“ (ავტორი - პიტერ ზაუერი).
პუბლიკაციაში, რომელიც საქართველოს შინაგან საქმეთა სამინისტროს მონაცემებს ეყრდნობა, საკმაოდ ფართოდ არის გადმოცემული 37 წლის კესარია აბრამიძის მკვლელობის გარემოებები, თუ სად და რა სიტუაციაში იქნა ჩადენილი აღნიშნული დანაშაული, ვინ არის ეჭვმიტანილი და ა.შ.
როგორც სტატიაშია აღნიშნული, „კესარია აბრამიძე საქართველოში ერთ-ერთ საზოგადოებრივად ცნობილ ტრანგენდერ მოქალაქედ ითვლებოდა. მისი სიკვდილი რატომღაც პარლამენტის მიერ მიერ მიღებულ კანონს მოჰყვა, რომლის თანახმად, სამთავრობო ჩინოვნიკებს „პრაიდის“ ღონისძიებების აკრძალვა და დილმებზე და წინებზე ცენზურის დაწესება შეუძლიათ. კანონი ასევე ითვალისწინებს ერთსქესიანი ქორწინებებისა და სქესის შეცვლის მიზნით ქირურგიული ჩარევის აკრძალვას. მოსალოდნელია, რომ ესოდენ მკაცრი სამართლებრივი აქტის მიღება საქართველოსა და ევროკავშირს შორის ისედაც არსებულ უთანხმოებას კიდევ უფრო გაამწვავებს - იმის გათვალისწინებით, რომ საქართველოს ევროკავშირში წევრად მიღების კანდიდატო-ქვეყნის სტატუსი აქვს.
კრიტიკოსების მტკიცებით, საქართველოს პარლამენტის მიერ მიღებული კანონი თავისი დებულებებით ძალიან ჰგავს ჩრდილოელი მეზობლის - რუსეთის კანონს, სადაც ხელისუფლებამ ბოლო წლებში „ლგბტ-საზოგადოების“ წინააღმდეგ ბევრი რეპრესიული იუიდიული აქტი მიიღო.
მართალია, კესარია აბრამიძის მკვლელობის დეტალური გარემოებები ჯერ კიდევ ბურუსით არის მოცული, საქართველოს სამოქალაქო საზოგადოებამ ტრანგენდერის სიკვდილი სექსუალური უმცირესობის წინააღმდეგ სახელმწიფო კამპანიის ნაწილად ჩათვალა.
ქვეყნის მმართველი პარტია „ქართული ოცნება“ სულ უფრო ანტილიბერალურ პოზიციას იკავებს, შესაბამისად, მატულობს ძალადობა „ლგბტ-საზოგადოების“ წარმომადგენელთა მიმართ. გასულ წელს გეების ასობით მოქინააღმდეგის მოთხოვნის გამო თბილისური პრაიდის ფესტივალი არ ჩატარდა, ხოლო მიმდინარე წელს ათეულ ათასობით მოქალაქე ტრადიციული ფასეულობების დაცვისაკენ მიმართულ მიტინგში მონაწილეობდა, რომელიც მმართველმა პარტიამ მოაწყო. ამ მხრივ ხელისუფლებას მხარს უჭერს ღრმად კონსერვატიული ქართული მართლმადიდებელი ეკლესიაც.
ევროკავშირის მაღალჩინოსანმა წარმომადგენელმა ჟოზეპ ბორელმა, საქართველოს მთავრობა გააფრთხილა, რომ კანონი, რომელიც „ლგბტ“-საზოგადოების წინააღმდეგ არის მიმართული, შეითავსებელია ევროპულ ფასეულობებთან და ხელს შეუშლის საქართველოს ინტეგრაციას ევროკავშირში. მას მხარი დაუჭირა გერმანიის ბუნდესტაგის წევრმა მიხაელ როთმაც.
საქართველოს პარლამენტის მიერ მიღებული კანონი ძალაში შედის პარლამენტის ახალი შემადგენლობის არჩევამდე ხუთი კვირით ადრე. არჩევნებს ბევრი განიხილავს როგორც ერთგვარ ლაკმუსის ქაღალდად, რომელიც აჩვენებს, გადაიქცევა თუ არა საქართველო - პოსტსაბჭოთა სივრცის ოდესღაც ერთ-ერთი ყველაზე პროდასავლური სახელმწიფო - რუსეთის მომხრე ქვეყნად.
მოსალოდნელია, რომ საქართველოს პრეზიდენტი სალომე ზურაბიშვილი, რომლის ფუქნციები ძირითადად ცერემონიური ხასიათისაა, კანონს ვეტოს დაადებს, მაგრამ „ქართულ ოცნებას“ პარლამენტში საკმაო დეპუტატები ჰყავს ვეტოს გადასალახავად.
უფრო ადრე მმართველი პარტიის ინიციატივით საკანონმდებლო ორგანომ მიიღო კანონი „უცხოური გავლენის გამჭვირვალობის“ (ანუ „უცხოური აგენტების“) შესახებ, რომელიც, დასავლელი კრიტიკოსების აზრით, ევროკავშირისათვის გამომწვევ-გამღიზიანებელ აქტს წარმოადგენს და რომელიც ასევე რუსული კანონის მსგავსია, ხელს უწყობს ავტორიტარული მართვის ტენდენციის გაძლიერებას. ეს კანონიც ძირს უთხრის საქართველოს სწრაფვას ევროკავშირისაკენ.
კესარია აბრამიძის ტრაგიკული სიკვდილის გამო ქართული საზოგადოების წარმომადგენლებმა მწუხარება გამოხატეს: „კესარია გაბედული ადამიანი იყო. ქართველი ტრანსგენდერების გზის გამკვლევი და მათი უფლებების დამცველი“, - წერს მაია ოთარაშვილი, ქართველი პოლიტოლოგი „იქს-ქსელში“. თავის მხრივ, პრეზიდენტმა სალომე ზურაბიშვილმა აღნიშნა, რომ ახალგაზრდა ლამაზი ქალის საშინელი მკვლელობა საგანგაშო სიგნალი უნდა იყოს საზოგადოებისათვის.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
