„ბრაზილიის ახალი პრეზიდენტი ლუის ინასიო ლულა და სილვა რისკზე მიდის - თავისი პოლიტიკური კურსით იგი დასავლეთთან ურთიერთობას იფუჭებს“, - ნათქვამია ამერიკულ გაზეთ „ვაშინგტონ პოსტში“ (The Washington Post) გამოქვეყნებულ სტატიაში სათაურით „დასავლეთი იმედოვნებდა, რომ ლუის ლულა მისი პარტნიორი გახდებოდა, მაგრამ ბრაზილიის ლიდერს თავისი გეგმები აქვს“ (ავტორები - მორია ბალინჯითი და მეგან თობინი).

გთავაზობთ პუბლიკაციის შინაარსს:

ბრაზილიის პრეზიდენტმა მმართველობის დაწყების პირველ თვეებში უარი თქვა მხარი დაეჭირა ჯო ბაიდენისათვის რუსეთის მოქმედების დაგმობაში უკრაინის წინააღმდეგ ომის დაწყების გამო, ლუის ლულა აგრეთვე არ მიუერთდა აშშ-ის მიერ გამოცხადებულ ანტირუსულ სანქციებს, მან ნება დართო ირანის სამხედრო გემებს რიო-დე-ჟანეიროს ნავსადგურში შესვლაზე და თავისი მთავარი მრჩეველი ვენესუელის ლიდერთან ნიკოლას მადუროსთან შესახვედრად გაგზავნა კარაკასში.

იმის ნაცვლად, რომ დასავლეთ ნახევარსფეროში დემოკრატიის პრინციპების გატარებას ხელი შეუწყოს, ლუის ლულა მსოფლიოს მიანიშნებს, რომ მას თავისი საგარეოპოლიტიკური კურსი აქვს, რომელიც სრულიად შეესაბამება პრეზიდენტობის პირველი ვადის დროინდელს, გამოხატულს მოვლენებისადმი პრაგმატულ მიდგომაში და დიალოგში. ბრაზილიას ნაკლებად აღელვებს, შეესაბამება თუ არა მის მიერ გატარებული პოლიტიკა ამერიკულს და საერთოდ, დასავლურს.

მხოლოდ ერთი მაგალითი: რუსეთის ომი უკრაინის წინააღმდეგ. თებერვალში ბრაზილიამ მხარი დაუჭირა გაეროს რეზოლუციას, რომელშიც გამოხატულია მშვიდობის დაცვის აუცილებლობა და მოწოდება რუსეთისადმი, გაიყვანოს ჯარები უკრაინის ტერიტორიიდან. ეს პოზიტიური ნაბიჯია, მაგრამ რამდენიმე კვირის შემდეგ ლუის ლულამ უარი განაცხადა ხელი მოეწერა ჯო ბაიდენის ინიციატივით ჩატარებული „დემოკრატიის სამიტის“ დასკვნით დეკლარაციაზე, რომელშიც დაგმობილია რუსეთის მოქმედება უკრაინაში. როგორც ბრაზილიის პრეზიდენტის მთავარმა მრჩეველმა აღნიშნა, ლუის ლულა „დემოკრატიის სამიტს“ არ თვლის ისეთ ფორუმად, რომელზეც რუსეთ-უკრაინის კონფლიქტის განხილვა-შეფასება უნდა მოხდეს.

ჩინეთი და ბრაზილია სულ უფრო მეტად ახდენენ თავიანთი კავშირების დემონსტრაციას ერთმანეთთან და რუსეთთან, როგორც გლობალური მნიშვნელობის მქონედ. მიმდინარე კვირის დასაწყისში, სამშაბათს, ჩინეთის ელჩმა ბრაზილიაში ჯუ ცინციომ სახელმწიფო მასმედიის წარმომადგენლებთან ინტერვიუში განაცხადა, რომ „ბრიკს“-ის (BRICS) ქვეყნები (ბრაზილია, რუსეთი, ინდოეთი, ჩინეთი და სამხრეთ აფრიკის რესპუბლიკა) გლობალური მმართველობის სისტემის ცვლილებაში კატალიზატორების როლს ასრულებენ“.

აღსანიშნავია, რომ დღევანდელი მდგომარეობით, BRICS-ის წევრ არცერთ ქვეყანას არ გამოცხადებული სანქციები რუსეთის მიმართ. პრაქტიკულად, ისინი რუსეთს დასავლური სანქციების გამკლავებაში ეხმარებიან - ჩინეთი და ბრაზილია სულ უფრო ზრდიან ვაჭრობის მოცულობას რუსეთთან: პეკინი დიდი რაოდენობით ყიდულობს შედარებით იაფ რუსულ ნავთობს და გაზს, ხოლო ბრაზილია - რუსული წარმოების სასუქებს სოფლის მეურნეობისათვის. სხვათა შორის, სწორედ რუსული სასუქით მოწეულ სასოფლო-სამეურნეო პროდუქციას გზავნის ბრაზილია ჩინეთში ექსპორტის სახით.

ლუის ლულას არაერთხელ გამოუხატავს თავისი ვარაუდი იმის შესახებ, რომ რუსეთ-უკრაინის ომში პასუხისმგებლობა არამარტო რუსეთს, არამედ უკრაინასაც ეკისრება, რომელიც საკუთარ თავს იცავს. მარტში, როცა ბრაზილიის პრეზიდენტი თავის უკრაინელ კოლეგას ვირტუალურად ესაუბრა, მას მოუწოდა გამხდარიყო მიუმხრობელი ქვეყნების „მშვიდობის კლუბის“ წევრი, რომლის ჩარჩოებში შეიძლებოდა სამშვიდობო მოლაპარაკება გამართულიყო, თუმცა ბრაზილიის ინიციატივას ამერიკის შეერთებულმა შტატები ნეგატიურად შეხვდა.

პეკინში ყოფნისას, 13 მარტს ლუის ლულა სი ძინპინს შეხვდა, რომელიც, როგორც ცნობილია, დასავლური საერთაშორისო წესრიგის დარღვევას ესწრაფვის - იმ წესრიგისა, რომლის ფუძემდებელს ამერიკის შეერთებული შტატები წარმოადგენს. ბრაზილია მხარს უჭერს ჩინეთს დიპლომატიური შუამავლობის განხორციელებაში და ეხმარება მას ეროვნული ვალუტის - იუანის მნიშვნელობის განმტკიცებაში, დოლართან შედარებით.

წყარო: https://www.washingtonpost.com/world/2023/04/13/lula-foreign-policy/