,
ბრიტანული გაზეთ „დეილი ექსპრესში“ (The Daily Express) გამოქვეყნებულია სტატია სათაურით „თბილისი რუსებს ულტიმატუმს უყენებს - მათ, ვინც თავი აარიდა უკრაინის ომში გაწვევას და თავი საქართველოს შეაფარა“ (ავტორი - ელის სკარსი).
„ქართველები ზეწოლას აძლიერებენ იმ ათასობით რუსი მოქალაქის მიმართ, რომლებიც სამხრეთ კავკასიურ ქვეყანაში რუსეთიდან შევიდნენ მას შემდეგ, რაც პრეზიდენტმა ვლადიმერ პუტინმა გასული წლის სექტემბერში ცოცხალი ძალის მობილიზაცია გამოაცხადა, უკრაინის წინააღმდეგ მებრძოლი თავისი არმიის რიცხოვნობის გაზრდის მიზნით“, - ნათქვამია მასალაში.
გთავაზობთ პუბლიკაციის შინაარსს:
საქართველოში რუსების ყოფნა, რომელთა რაოდენობა უკვე ათეულობით ათასს აღწევს, ადგილობრივი მოსახლეობის სულ უფრო მეტ გაღიზიანებასა და აღშფოთებას იწვევს, რაც კედლებზე არსებულ საკმაოდ უხამს წარწერებში (Graffiti) და ქაღალდის ფურცლებზე დაწერილი ულტიმატუმურ მიმართვებში გამოიხატება.
ანტირუსული განწყობები განსაკუთრებით ძლიერია საქარტველოს დედაქალაქ თბილისში, რომელიც, როგორც ვარაუდობენ, ათეულ ატასობით რუსი მოქალაქის სახლი გახდა მას შემდეგ, რაც მეზობელი ქვეყნის პრეზიდენტმა ბრძანება გასცა რუსული ჯარის უკრაინაში შეჭრის შესახებ, გასული წლის თებერვალში.
როგორც ამას წინათ უკრაინელმა ჟურნალისტმა ვიტალი შევჩენკომ აღნიშნა ბრიტანული სამაუწყებლო კომპანიის BBC-ის პროგრამაში გამოსვლისას, „თითქმის მთელ თბილისში ნახავთ უამრავ ანტირუსულ წარწერას, რომელთა მნიშვნელოვანი ნაწილი საკმაოდ უხეშად ჟღერს“. კიეველი კორესპონდენტის თქმით, ზოგიერთი წარწერა პირდაპირ მოუწოდებდა რუსების სიძულვილისა და მოკვლისაკენ („სიკვდილი რუსებს!“, „ჩვენთვის მიუღებელია ყოველი რუსი, „კარგიც“ და „ცუდიც“!). გარდა ამისა, საქართველოს დედაქალაქის ფოტოსურათებზე, რომლებიც [გლობალურ სოციალურ ქსელშია] გამოქვეყნებული, მოჩანს კიდევ უფრო უცენზურო გამონათქვამები რუსებისა და რუსეთის ხელმძღვანელების მიმართ.
როგორც ვიტალი შევჩენკომ აღნიშნა, „ამჟამად, სამხედრო პერიოდის ენით თუ ვიტყვით, კარგი რუსები მხოლოდ ისინი არიან, რომლებიც მხარს არ უჭერენ პრეზიდენტ ვლადიმერ პუტინის მიერ გამოცხადებულ „სპეციალურ სამხედრო ოპერაციას“ უკრაინის წინააღმდეგ“.
„თბილისში ყოფნისას ძნელია თავიდან მოიშორო და არ იფიქრო უკრაინაში რუსეთის არმიის შეჭრაზე, - თქვა ჟურნალისტმა და აღნიშნა, რომ „ომს გაგახსენებთ ისეთი ადგილებიც კი, სადაც ბრძოლები და სისხლისღვრაზე ლაპარაკი ცოტა უცნაურია. მაგალითად, რესტორნებში და კაფე-ბარებში“.
„ერთ-ერთ კაფეში დავინახე ქაღალდის ფურცელზე დაბეჭდილი მიმართვა რუსებისადმი, რუსულ ენაზე, რომელიც ასე ჟღერდა:
„უკრაინის ომზე პასუხისმგებლობა ყველა რუსს ეკისრება. სანამ თქვენ აქ დასეირნობთ და გართობას არ იკლებთ, თქვენი არმია უკრაინაში ძალადობით და ძარცვა-გლეჯვით არის დაკავებული. თუ თქვენ რუსეთში ვერ შესძელით ომის გაპროტესტება, მაშინ ანტისაომარი განწყობა აქ გამოხატეთ. თუ ამ მოწოდებას არ ეთანხმებით, მაშინ თქვენი აქ ყოფნა ჩვენთვის სასიხარულო არ არის“.
ბევრმა რუსმა საქართველო თავშესაფრის სახით იმიტომ აირჩია, რომ ქართველებმა მეტ-ნაკლებად კარგად იციან რუსული ენა და შესაბამისად, რუსეთის მოქალაქეებს ადგილობრივ მოსახლეობასთან კომუნიკაციის პრობლემა არ ექნებოდათ. გარდა ამისა, მნიშვნელოვანი იყო ის გარემოებებიც, რომ საქართველო უშუალოდ ესაზღვრება რუსეთს (სახმელეთო საზღვრით) და ამისთვის თვითმფრინავით მგზავრობის აუცილებლობა არ იდგა, ასევე ის მომენტიც, რომ რუსეთბს საქართველოს ტერიტორიაზე შესასვლელად ვიზა არ ჭირდებოდათ.
ქართველების უკმაყოფილება ახალგაზრდა რუსების მოზღვავების გამო [რომლებიც ცდილობენ თავი აარიდონ არმიაში გაწვევას და უკრაინის ფრონტზე მოხვედრას], შეიძლება მხოლოდ იმით არ არის განპირობებული, რომ ისინი ფართოდ უჭერენ მხარს უკრაინას რუსეთთან ომში, არამედ იმ გარემოებითაც, რომ ათასობით რუსის შესვლამ საქართველოში საცხოვრებელი ბინების ყიდვისა და ქირავნობის ფასები ასწია, ანუ ქვეყნის სოციალურ ინფრასტრუქტურას იმიგრაციამ მნიშვნელოვანი პრობლემები შეუქმნა.
უფრო მეტიც, თბილისელებს და მთლიანობაში საქართველოს კარგად ახსოვთ 2008 წლის აგვისტოში მომხდარი „ხუთდღიანი ომის“ შედეგები, როცა რუსეთის არმიამ საქართველოს რეგიონების - „სამხრეთ ოსეთისა“ და აფხაზეთის ოკუპირება განახორციელა [ადგილობრივი პრორუსულად განწყობილი აფხაზი და ოსი მოსახლეობის დაცვის საბაბით] და იქ თავისი ყოფნა სამხედრო ბაზებით განამტკიცა.
იმ დროს, როცა მმართველი პარტია „ქართული ოცნება“ მოსკოვზე ორიენტირებულად ითვლება, განსაკუთრებით იმის გამო, რომ მთავრობა უარს აცხადებს დასავლური ანტირუსული სანქციებისადმი მიერთებაზე და უკრაინისთვის სამხედრო დახმარების გაწევაზე, საზოგადოებრივი გამოკითხვების შედეგები მოწმობს, რომ ქართველთა უმრავლესობა რუსეთს მთავარ საფრთხედ მიიჩნევს - როგორც თავიანთი ქვეყნისათვის, ასევე მეზობლებისათვის. ალბათ, ამიტომაც უჭერენ მხარს როგორც უკრაინელ ხალხს, ასევე უკრაინის მთავრობას“.
წყარო: https://www.express.co.uk/news/world/1800426/city-russians-fled-military-draft-georgia-tbilisi
ბრიტანულ გაზეთ „ფაინენშელ თაიმსში“ (Financial Times) დაბეჭდილია სტატია სათაურით „მსოფლიოში არასტაბილურობა სუფევს, ამიტომ ევროპა უნდა შეიარაღდეს“, რომლის ავტორები არიან ფრიდრიხ მერცი (გერმანიის კანცლერი) და ემანუელ მაკრონი (საფრანგეთის პრეზიდენტი).
გთავაზობთ სტატიის შინაარსს:
„ჰააგაში ნატოს სამიტის ფონზე მსოფლიოში ქაოსური მოვლენები სუფევს: ბობოქრობენ ომები, ჩვეული ქცევის წესები და ნორმები ინგრევა, ხოლო დიდი ხნით განმტკიცებული რწმენები ეჭვის ქვეშ დგება. ამ ეპოქალური გამოცდის ჟამს გერმანია და საფრანგეთი - თავიანთ ევროპელ და ატლანტის ოკეანის გაღმა ნაპირზე მყოფ მეგობრებთან და მოკავშირეებთან ერთად ერთიანი და მტკიცე ფრონტით გამოდიან, რათა დაიცვან ჩვენი საერთო ფასეულობები, ჩვენი მოქალაქეების თავისუფლება და უსაფრთხოება“, - ნათქვამია სტატიის დასაწყისში.
ავტორთა აზრით, „ევროპაში არასტაბილურობის ძირითად წყაროს რუსეთი და მისი იმპერიალისტური ომები წარმოადგენს: „2008 წელს რუსეთი თავს დაესხა საქართველოს, შემდეგ, 2014 წელს - მოახდინა ყირიმისა და დონბასის ოკუპაცია, 2022 წელს კი კრემლის ჯარები უკრაინის დანარჩენ ტერიტორიაზე შეიჭრნენ. ვლადიმერ პუტინის მიზანია ძირი გამოუთხაროს ევროპულ უსაფრთხოებას, მეზობლებს თავს მოახვიოს უკანონო მეურვეობა, ისინი შიგნიდან გატეხოს და თავის ორბიტაზე გადაიყვანოს, საერთაშორისო მართლწესრიგს საფუძველი შეურყიოს. ეს ყველაფერი რუსეთის სტრატეგიულ ინტერესებს წარმოადგენს. ჩვენ არ შეგვიძლია ამ ყველაფერს შევურიგდეთ, ჩვენს კონტინენტზე მშვიდობა უნდა დავიცვათ“.
„თუ კრემლის ამჟამინდელი პოლიტიკის ტრაექტორია არ შეიცვლება, რუსეთი საფრანგეთისა და გერმანიის ურყევ და მტკიცე პოზიციის წინაშე აღმოჩნდება. ამჟამად სასწორზე დევს ევროპული სტაბილურობის ბედი ათწლეულების განმავლობაში.
ნატოს სამიტზე საფრანგეთი და გერმანია დაადასტურებენ თავიანთ მხარდაჭერას იმ ძალისხმევისადმი, რასაც აშშ მიმართავს კონფლიქტების შეწყვეტისათვის და მტკიცე მშვიდობის მისაღწევად. საფრანგეთი და გერმანია მხარს დაუჭერენ უკრაინის სუვერენიტეტს, ცეცხლის შეწყვეტის წინადადებას და გააძლიერებენ რუსეთზე ზეწოლას, მათ შორის სანქციების მეშვეობით“, - აღნიშნავენ სტატიის ავტორები, - „ჩვენ ვუზრუნველყოფთ, რომ უკრაინა კონფლიქტიდან გამოსვლის შემდეგ აყვავებული, ძლიერი და უსაფრთხო ქვეყანა გახდეს“.
როგორც სტატიაშია ნათქვამი, ამ მხრივ უკვე ბევრი რამ არის გაკეთებული - ევროკავშირი უკრაინას 130 მილიარდი ევროთი დაეხმარა. გარდა ამისა, ევროკავშირმა დაგმო კრემლის აგრესიული პოლიტიკა, რისთვისაც რუსეთს მკაცრი სანქციები აქვს დაწესებული. „მაგრამ ეს კიდევ ცოტაა. ამიტომ ჩვენ, დიდ ბრიტანეთთან ერთად, ხელს შევუწყობთ უკრაინის არმიის გაძლიერებას, განვაახლებთ უკრაინის თავდაცვით მრეწველობას იმ მიზნით, რომ სამომავლოდ მას რუსეთის სავარაუდო აგრესიის წარმატებით მოგერიება შეძლოს.
„რა თქმა უნდა, ჩვენი გეგმები მხოლოდ უკრაინას არ ეხება. როგორც ჩანს, ახლო მომავალში კონფლიქტურ გარემოში ცხოვრება მოგვიწევს - იმ მსოფლიოში, სადაც ჩვენი მოკავშირეების წინაშე ახალი დილემები და პრიორიტეტები დადგება. რუსეთის გარდა, ჩვენ, ალბათ, კიდევ ბევრი გამოწვევის მოწმენი გავხდებით. ამისათვის ახლავე უნდა ვიზრუნოთ“, - აღნიშნავენ ავტორები და იქვე მიუთითებენ: აუცილებელია ნატოს გაძლიერება - თავდაცვის სფეროს ალიანსის წევრების საერთო ბიუჯეტის 3,5% უნდა მოხმარდეს, 2%-ის ნაცვლად. დამატებითი ხარჯები აუცილებელია. მათი მეშვეობით ჩვენ იმ ბზარს ამოვავსებთ, რომელიც ნატოს სამხედრო პოტენციალს გაუჩნდა რევანშისტული რუსეთის პირისპირ“, - ხაზს უსვამენ ავტორები.
„ალიანსის უსაფრთხოების ქვაკუთხედად ბირთვული შეკავება რჩება: საფრანგეთს აქვს თავისი დამოუკიდებელი სტრატეგიული ბირთვული ძალები, რომლებსაც მნიშვნელოვანი წვლილი შეაქვთ ნატოს საერთო უსაფრთხოების დაცვაში. გერმანიას უფლება აქვს მონაწილეობა მიიღოს ნატოს ბირთვული იარაღის ერთობლივ გამოყენებაში. გარდა ამისა, ერთობლივად ვიმუშავებთ შესყიდვების სისტემის რეფორმირებაში, რომელიც გამოიხატება უნიფიკაციაში, გამარტივებასა და გაზრდაში“, - ნათქვამია სტატიაში.
პუბლიკაციის დასასრულს, ავტორები აღნიშნავენ, რომ ნატო გააგრძელებს მჭიდრო თანამშრომლობას ევროკავშირთან, რათა უკეთ იქნას გამოყენებული ევროპის ტექნოლოგიური უპირატესობა [რუსეთის წინააღმდეგ]. „ჩვენ ვადასტურებთ სამოკავშირეო ერთიანობას, სოლიდარობას და ერთგულებას ჩვენი კონტინენტის თავისუფლების, მშვიდობისა და უსაფრთხოებისათვის“.
