,
ბრიტანული „დეილი ტელეგრაფი” (The Daily Telegraph) აქვეყნებს სტატიას სათაურით „უკრაინას ეტყვიან, რომ ის ძალიან კორუმპირებულია და ნატოს წევრად ვერ მიიღებენ“ (ავტორი - ჯო ბარნსი). მასალაში განხილულია უკრაინის პერსპექტივები ჩრდილოატლანტიკური ალიანსის ვაშინგტონის სამიტზე, რომელიც 9 ივლისს უნდა გაიმართოს.
გთავაზობთ პუბლიკაციას შემოკლებით:
უკრაინას ეტყვიან, რომ ამჟამად ის ძალიან კორუმპირებულია, რომ ნატოში მიღების ღირსი იყოს. რა თქმა უნდა, ალიანსის ასეთი პოზიცია სერიოზული დარტყმა იქნება ვოლოდიმირ ზელენსკისათვის.
„ნატო კიევს დამატებით ძალისხმევას მოსთხოვს მანამ, სანამ მისი ბლოკში მიღების მოლაპარაკებები დაიწყება“, - განაცხადა ერთ-ერთმა მაღალჩინოსნმა აშშ-ის სახელმწიფო დეპარტამენტიდან.
პოზიცია გამოცხადებული იქნება წერილობითი ფორმით ნატოს კომუნიკეში, რომელიც ყოველწლიურ სამიტზე იქნება ხელმოწერილი. „ჩვენ უკან უნდა დავიხიოთ უკრაინის მიღების საკითხში, მაგრამ უნდა მივესალმოთ და მოვიწონოთ ის ყველაფერი, რაც უკრაინამ რეფორმების სახელით გააკეთა უკანასკნელი ორი წლის განმავლობაში“, - ამბობს ჩინოვნიკი „დეილი ტელეგრაფთან“ საუბარში, - ამასთან, კიევს უნდა მივუთითოთ, რომ კორუფციასთან ბრძოლა გააძლიერონ. ეს არის ის პრიორიტეტი, რასაც სამიტის მონაწილეები უკრაინის ხელისუფლებისაგან ითხოვენ“.
უკრაინის პრეზიდენტი ვოლოდიმირ ზელენსკი დაბეჯითებით ითხოვს უკრაინის დაჩქარებულ მიღებას ნატოში, ომის დასრულების შემდეგ, რათა ქვეყანა დაცული იყოს რუსეთის განმეორებითი თავდასხმისაგან. თუ უკრაინა ნატოს წევრი იქნება, მისი ასეთი სტატუსის გამო ამერიკა და ევროპა იძულებულნი იქნებიან კიევის გვერდით დადგნენ, ნებისმიერი თავდასხმის შემთხვევაში.
მაგრამ სწორედ უკრაინული კორუფციის მაღალი დონე გახდა „დაბრკოლების ლოდი“ ამასწინანდელი მოლაპარაკების დროს, როცა ნატოს წევრები განიხილავდნენ საკითხს - შესთავაზონ თუ არა კიევს კონკრეტული გრაფიკი დასავლურ სამხედრო ალიანსში გასაწევრიანებლად.
„დეილი ტელეგრაფმა“ ამ რამდენიმე დღის წინ გამოაქვეყნა ინფორმაცია, რომლის თანახმად, აშშ ბლოკავს დიდი ბრიტანეთისა და ევროპის ქვეყნების ძალისხმევას, რომელიც მიმართულია იქითკენ, რომ წერილობითი სახით დაფიქსირდეს უკრაინის „შეუქცევადი გზა“ ნატოში წევრობისათვის.
უკრაინა „გაჟღენთილია“ კორუფციით, განსაკუთრებით იმ სტრუქტურებში, სადაც დიდი ფული ტრიალებს, ანუ შეიარაღებულ ძალებში, საბჭოთა კავშირის დაშლის დროიდან
ვოლოდიმირ ზელენსკიმ რამდენიმე მაღალჩინოსანი სამხედრო მოსამსახურე (გენერლები) გაათავისუფლა რიგი კორუფციული ფაქტების გამოვლენასთან დაკავშირებით, განსაკუთრებით თავდაცვითი შესყიდვების სფეროში
დიპლომატებმა და ნატოელმა ოფიციალურმა პირებმა უკრაინას იმ რეფორმების ჩამონათვალი წარუდგილეს, რომლებიც მან უნდა განახორციელოს მანამ, სანამ მისი ამბიციები დაკმაყოფილდება ნატოში მიღებაზე.
ვოლოდიმირ ზელენსკის, რომელიც ვაშინგტონში ნატოს სამიტში მიიღებს მონაწილეობას, დიდი ალბათობით, შესთავაზებენ „კარგად განათებულ ხიდს“ ნატოსაკენ მიმავალ გზაზე, რომელიც კიევს ბრიუსელთან დააკავშირებს.
მოკავშირეები ჯერ კიდევ ვერ შეთანხმებულან იმაზე, განაახლონ თუ არა ის განცხადება, რომელიც უკრაინის შესახებ გასულ წელს ვილნიუსის სამიტზე მიიღეს და მასში, ნატოში მიღების თაობაზე სიტყვა „შეუქცევადი“ ჩაწერონ.
მოსალოდნელია, რომ ვაშინგტონის სამიტზე უკრაინას, სავარაუდოდ, დაპირდებიან ჰაერსაწინააღმდეგო დაცვის სისტემების დამატებით მიწოდებას, ამერიკული „პეტრიოტების“ ჩათვლით.
წყარო: https://www.telegraph.co.uk/world-news/2024/07/02/ukraine-to-be-told-it-is-too-corrupt-to-join-nato/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
