,
ბრიტანული გაზეთი „დეილი ტელეგრაფი“ (The Daily Telegraph) აქვეყნებს სტატიას სათაურით „პუტინი პარალიზებულია: კიევისათვის იარაღის გამოყენების ნებართვის მიცემით, დასავლეთმა კრემლს პრევენციული დარტყმა მიაყენა“ (ავტორი - ფრენსის დირლი).
გთავაზობთ პუბლიკაციას მცირედ შემოკლებული სახით:
„ყველაზე უკეთეს თავდაცვას კარგი თავდასხმა უზრუნველყოფს“ - ეს უბრალო კლიშე არ არის, მას ეთანხმებიან ისეთი თეორეტიკოსები, როგორებიც არიან ჩინელი სუნ ძი, იტალიელი ნიკოლო მაკიეველი და ამერიკელი ჯორჯ ვაშინგტონი. თუ რუსეთში უკრაინელების ცნობილი შეჭრით ვიმსჯელებით, რომელიც უკვე მე-13 დღეა გრძელდება, მაშინ ეს ის გამოთქმაა, რომლის არსი დასავლეთმა, როგორც იქნა, გააცნობიერა.
ექვსი თვის განმავლობაში კიევის დასავლელი მოკავშირეები ფაქტიურად, უმოქმედოდ იყვნენ, უკრაინა კი სტრატეგიულ უპირატესობას კარგავდა. დასავლელებმა კიევს იარაღის მიწოდება შეუმცირეს, რუსეთმა კი ახალი შეტევა მოამზადა. უკრაინელები ხედავდნენ, რომ მარტში რუსეთი ხარკოვთან ახლოს, საზღვარზე, ჯარს აგროვებდა ვოლჩანსკზე შეტევისათვის, ზელენსკის გენერლები კი საზღვრის გადალახვას ვერ ბედავდნენ, რომ წინმსწრები დარტყმა მიეყენებინათ რუსეთისათვის. იმიტომ, რომ დასავლეთი აქტიურობას კრძალავდა.
მაგრამ თანდათან და ახლა უკვე უეცრად, დასავლეთმა „ხელბორკილები“ მოუშვა - მაისში მება დართო კიევს მოკავშირეების მიერ მიცემული იარაღით რუსეთის ტერიტორიისათვის დარტყმები მიეყენებინა, შემდეგ, გასულ კვირაში, მდუმარე თანხმობა გამოაცხადა უკრაინის არმიის მიერ განხორცილებული ოპერაციის მიმართ, რომლის შედეგად კიევმა 1000 კვადრატული კილომეტრის ფართობის მქონე ტერიტორიის გაკონტროლება დაიწყო. დიდი ბრიტანეთს არაფერი უტქვამს, როცა კიევმა ბრიტანული ტანკებით - „ჩელენჯერებით“ - კურსკის ოლქს შეუტია სწორედ იმ ადგილებში, სადაც მეორე მსოფლიო ომის ისტორიაში უდიდესი სატანკო ბრძოლა მოხდა.
დასავლეთის თამამმა გადაწყვეტილებებმა სამხედრო და პოლიტიკური რეალობა შეცვალა. რუსეთი იძულებული გახდა დონბასის ფრონტიდან ჯარების გარკვეული რაოდენობა მოეხსნა და ისინი კურსკის ოლქში გადაესროლა. საინტერესო ფაქტია, რომ უკრაინამ სულ რაღაც ერთკვირიანი ბრძოლით მოახერხა იმდენივე ტერიტორიის ოკუპირება, რამდენიც რუსეთმა მხოლოდ თითქმის სამწლიანი ბრძოლით შეძლო.
მიუხედავად იმისა, რომ დონბასში რუსეთის არმია ჯერ კიდევ წარმატებებს აღწევს (უახლოვდება ქ.პოკროვსკს - კიევის ჯარების მნიშვნელოვან ლოჯისტიკურ და სატრანსპორტო ცენტრს), თუ უკრაინა კურსკის ოლქში წარმატებულად იმოქმედებს, კრემლი საბოლოო ჯამში იძულებული გახდება დონბასში ფრონტის ხაზი დაარღვიოს, რაც მისთვის არანაირად მომგებიანი არ იქნება.
პოლიტიკური თვალსაზრისით, კურსკის ოპერაციას როგორც რუსეთის შიგნით, ასევე მის ფარგლებს გარეთაც, შორს მიმავალი შედეგები შეიძლება მოჰყვეს. თუ ადრე ყველა უკიჟინებდა უკრაინას, რუსეთთან სამშვიდობო მოლაპარაკებზე დაჯექიო, ახლა ისევ დაიწყეს ლაპარაკი იარაღის მიწოდების გაფართოებაზე. როგორც ახლახან გახდა ცნობილი, თეთრ სახლში თითქმის გადაწყვეტილია საკითხი კიევისათვის შოპრი მოქმედების ფრთოსანი რაკეტების მიწოდებაზე.
და რაც ყველაზე მთავარია, „კურსკის ბრძოლამ“ მოსკოვში დებატების სვლა შეცვალა. კრემლს უკვე აღარ შეუძლია მოითხოვის ფრონტის ხაზის „გაყინვა“ სამშვიდობო მოლაპარაკების დასაწყებად - იმიტომ, რომ მაშინ უკრაინაც იგივე მოითხოვს იგივეს - ფრონტის ხაზის „გაყინვას“ კურსკის ოლქში.
შედარებისთვის საინტერესოა ის ფაქტიც, რომ როცა რუსეთის არმიის ქვედანაყოფებმა 2022 წლის თებერვლის ბოლოს დონბასში ბრძოლა დაიწყეს, ადგილობრივი რუსულენოვანი მოსახლეობა მათ წინააღმდეგობას არ უწევდა... და ფაქტიურად, არც უკრაინელებისთვის არ გაუწევიათ წინააღმდეგობა კურსკის ოლქში. სამწუხაროა, რომ რუსებიდან დახოცილი და ტყვედ ჩაგდებულები უმეტესად ახლაწვეული ჯარისკაცები არიან, რომლებსაც თავის დროზე გამოუცხადეს, რომ ისინი უკრაინის ფრონტზე არ იბრძოლებდნენ. სავარაუდოდ, ამ გარემოებამ შეიძლება სამოქლაქო დაპირისპირება და უწესრიგობები გამოიწვიოს.
ვლადიმერ პუტინმა უკრაინაში თავისი ჯარების სრულმსასშტაბიან შეჭრას „სპეციალური სამხდრო ოპარაცია“ უწოდა, მაგრამ ეს ასე არ ყოფილა. რაც შეეხება უკრაინელთა შეჭრას რუსეთში, ეს უკვე მართლაც სპეცოპერაციას წარმოადგენს. და იმის გათვალისწინებით, რომ კიევისათვის სიტუაცია სასიკეთოდ იცვლება - „ქარი ვოლოდიმირ ზელენსკის იალქნებს უბერავს, დასავლეთი, ალბათ, მას მხარს კიდევ უფრო დაუჭერს.
წყარო: https://www.telegraph.co.uk/news/2024/08/16/putin-is-crippled-by-the-wests-preemptive-attack-on-russia/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
