,
ბრიტანული გაზეთი „დეილი ტელეგრაფი“ (The Daily Telegraph) ეხმიანება აშშ-ში რუსული ტელეარხის „რაშა თუდეის” (RT – Russia Today) მაუწყებლობის აკრძალვას და აქვეყნებს სტატიას სათაურით „დასავლეთმა, როგორც იქნა, რუსულ დეზინფორმაციას ომი გამოუცხადა“ (ავტორი - სემუელ რამანი).
გთავაზობთ პუბლიკაციის მოკლე შინაარსს:
აშშ-ში საპრეზიდენტო არჩევნები ახლოვდება. ამ ფონზე საინფორმაციო კომუნიკაციების სფეროში მნიშვნელოვანი მოვლენა მოხდა: როგორც იქნა, კომპანია Meta-მ გამოაცხადა, რომ მალე აიკრძალება რუსული საინფორმაციო საშუალებები - ტელეარხი „რაშა თუდეი“ (RT), საინფორმაციო რესურსი „როსია სეგოდნია“ (რუსეთი დღეს“), რომელიც მართავს რუსეთის საინფორმაციო სააგენტობს „რია ნოვოსტის“ და „სპუტნიკს“.
Meta-ს გადაწყვეტილება ნიშნავს იმას, რომ აშშ-ში რუსული სახელმწიფო მასმედიის მიმართ საინფორმაციო პოლიტიკა მკაცრდება. ამას წინათ აშშ-ის სახელმწიფო დეპარტამენტმა განაცხადა, რომ „რაშა თუდეი“ ისეთ მედიაორგანიზაციად გადაიქცა, რომელსაც „ძლიერი კიბერშესაძლებლობები აქვს“.
ამერიკელებს კარგად ახსოვთ 2016 წლის საპრეზიდენტო არჩევნების პერიპეტიები, როცა დონალდ ტრამპის ტრიუმფი რუსეთის ჩარევამ დაჩრდილა - ჰილარი კლინტონის წინააღმდეგ მიმართული კიბერაქციით. ამასთან, რუსული დეზინფორმაციის გავრცელების შეზღუდვა უფრო მეტად სარგებლობას რესპუბლიკელ დონალდ ტრამპს მოუტანს, ვიდრე დემოკრატ კამალა ჰარისს: თუ პირველი გაიმარჯვებს - მას ვერავინ ვეღარ უსაყვედურებს „რუსეთის დახმარებას“.
„რასა თუდეის“ შესაძლებლობები 2016 წლიდან მიღებული ზომების შედეგად უკვე შეზღუდული იყო, როცა ტელეარხმა 2017 წელს აშშ-ში „უცხოელი აგენტის“ სტატუსი მიიღო. 2022 წლის მარტში ასევე შეჩერდა RT America-ს მაუწყებლობაც.
ამჯერად უკვე მისი მაუწყებლობის სრული აკრძალვა პატარა, მაგრამ მაინც საკმაოდ მნიშვნელოვანი გამარჯვებაა რუსული ავტორიტარული ხელისუფლების გავლენის წინააღმდეგ, ამერიკულ პოლიტიკურ ცხოვრებაში.
„რასა თუდეი“ მსოფლიოში ტოქსიკური ინფორმაციის გავრცელების ერთ-ერთ ძლიერ წყაროს წარმოადგენს. მისი საშუალებით რუსეთის ხელისუფლებას ლიბერალური დემოკრატიის დისკრედიტაციის შესაძლებლობა აქვს
Meta-ს შეტევა RT-ის წინააღმდეგ სიმართლისათვის მებრძოთა დაგვიანებული ტრიუმფია, მაგრამ მას მაინც პოზიტიური მნიშვნელობა აქვს. თუმცა აქვე აუცილებელია ითქვას, რომ ყველაზე მძიმე ბრძოლები ჯერ კიდევ წინაა.
