,
ბრიტანულ გაზეთ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ზელენსკის მიერ დაშვებული უხეში შეცდომების გამო მატულობს იმის რისკი, რომ შეიძლება უკრაინას მოკავშირეები ჩამოშორდნენ“.
გთავაზობთ ამონარიდებს პუბლიკაციიდან:
როცა ჩვენ უკრაინელ მესაზღვრეს ბრიტანული და პოლონური პასპორტები ვაჩვენეთ, იგი მოგვესალმა სიტყვებით - „კეთილი იყოს თქვენი მობრძანება, თქვენ ჩვენიანები ხართ“. უკრაინელი სამხედროები ხელს გვართმევდნენ და მადლობას გვეუბნებოდნენ მათი ქვეყნისათვის მძიმე წუთებში გამოვლენილი მხარდაჭერის გამო.
(...)
შეიძლება ვინმემ პარადოქსულად ჩათვალოს, მაგრამ ფაქტია, რომ დიპლომატიური დისკუსიის დროს უკრაინის მხრიდან ასეთი თბილი მიდგომა არ შეინიშნება. პრეზიდენტ ვოლოდიმირ ზელენსკის მიერ ჩადენილი ამასწინანდელი „გამოხტომა“, როცა მან „მოსკოვის დამქაშის“ იარლიყი მიაწება პოლონეთს (და სხვა აღმოსავლეთ და ცენტრალური ევროპის სხვა ქვეყნებს), პოლონელებისა და უკრაინის სხვა მოკავშირეებისათვის ძალიან ღრმად საწყენ და სამწუხარო შეფასებას წარმოადგენს. მათ გული ეტკინათ. დიახ, უკრაინა მტერთან მძიმე და სასტიკ ბრძოლას აწარმოებს, მაგრამ მისი პრეზიდენტი, როგორც ჩანს, შარს ეძებს და მოკავშირეებთან კინკლაობას იწყებს.
(...)
ვოლოდიმირ ზელენსკის გამოსვლებში სულ უფრო მეტად იგრძნობა მოკავშირეთა მიერ გაწეული დახმარების დაუფასებლობა. რასაკვირველია, დასავლელი მხარდამჭერები ბუნებრივ წყენას გამოხატავენ და კიევს ახსენებენ იმას, რომ სიკეთისათვის მადლობის გადახდაა საჭირო. ამას ამბობდა ყოფილი ბრიტანელი თავდაცვის მინისტრი ბენ უოლესი და აშშ-ის პრეზიდენტის მრჩეველი ჯეკ სალივანი. სხვათა შორის, არც ინდოელები არ დაივიწყებენ ვოლოდიმირ ზელენსკის ერთ-ერთი მრჩევლის გამონათქვამს ნახევარმილიარდიანი აზიური ქვეყნის „სუსტი ინტელექტუალური პოტენციალის“ თაობაზე.
(...)
სრულიად გასაგებია, რომ უკრაინის ხელმძღვანელობა უკვე 19 თვეა ომშია ჩაბმული და აქედან გამომდინარე, სტრესულ მდგომარეობაშია [და შესაძლოა, ზოგჯერ რაღაც-რაღაცეები ვერ მოზომოს], მაგრამ დიპლომატიური უტაქტობის ხშირი გამოვლენები უკვე შეშფოთებას იწვევს. კიევის ასეთ მოქმედებას შეუძლია მოკავშირეების მხარდაჭერა შეასუსტოს. უკრაინას შეიძლება ძვირად დაუჯდეს ასეთი კინკლაობა: არ არის გამორიცხული, რომ მას ეკონომიკური და სამხედრო დახმარება, პოლიტიკური მხარდაჭერა შეუმცირდეს.
მე კარგად მახსოვს გაეროს ჩინოვნიკებთან საუბარი 2022 წლის თებერვლის ბოლოს პოლონეთ-უკრაინის საზღვარზე. მათ თქვეს, რომ მთელი თავიანთი სამსახურის განმავლობაში ასეთი დახმარების ძლიერი ნაკადი ჯერ არ უნახავთ - როგორც სახელმწიფოს, ასევე უშუალოდ პოლონელი ხალხისაგან.
(...)
და ყოველივე ამის შემდეგ ვოლოდიმირ ზელენსკიმ გონივრულად ჩათვალა ვარშავისათვის მიენიშნებინა, რომ პოლონეთი და მისი აღმოსავლეთევროპელი მეზობლები კრემლთან თანამშრომლობენ!
ალბათ, ვოლოდიმირ ზელენსკის მიერ დაშვებული ყველაზე შეუწყნარებელი შეცდომაა ის, რომ მან დავა დაუწყო პოლონეთს, სლოვაკეთს და უნგრეთს ხორბლით ვაჭრობის საკითხში.
ვოლოდიმირ ზელენსკიმ და მისმა მარცვლეულის მაგნატებმა კონსტრუქციული დიალოგის ნაცვლად საჯარო კონფრონტაცია აირჩიეს და ვარშავას, ბრატისლავას და ბუდაპეშტს ვაჭრობის მსოფლიო ორგანიზაციაში უჩივლეს - ჩვენი ხორბლის მათ ტერიტორიაზე გასაყიდად შეტანაზე უარს გვიცხადებენო. ეს უკვე უმადურობა კი არაა, არამედ მტრობის დაწყებაა ერთგულ მეგობრებთან, რომლებიც უკრაინას მძიმე წუთებში მხარს უჭერენ.
თუ კიევი ასეთ მიდგომას გააგრძელებს, ის ქვეყნები, რომლებმაც თვითონ ბევრი რამ მოიკლეს და უკრაინას დაეხმარნენ, თავიანთ პოზიციას გადასინჯავენ და მხარდაჭერას შეამცირებენ. (...) ალბათ, იმედი უნდა გვქონდეს, რომ უკრაინის ხელისუფლება რეალობას გააცნობიერებს და მიხვდება - მოკავშირეებთან დავა და სავაჭრო ომების გამოცხადება რუსეთის გამარჯვებას ხელს არ შეუწყობს.
წყარო: https://www.telegraph.co.uk/news/2023/09/27/volodymyr-zelensky-blunders-allies/
