,
წყარო:https://bm.ge/
უძრავი ქონების შერჩევა და შეძენა სკრუპულოზური პროცესია და საკმაოდ ნიუანსურ დაკვირვებას მოითხოვს, რომელთა შორის უმნიშვნელოვანესია სამართლებრივი ასპექტების ცოდნა.
იურისტები გვირჩევენ, რომ ხელშეკრულების გაფორმებამდე გავერკვეთ როგორც შესაძენის ქონების, ისე კომპანიის სამართლებრივ მდგომარეობაში. ასევე ქონების შეძენამდე მნიშვნელოვანია გამყიდველ იურიდიულ თუ ფიზიკურ პირს მოვთხოვოთ საჯარო რეესტრიდან ამონაწერის განახლება.
თემაზე გადაცემა „უძრავი ქონების“ პროსპექტში“ იურისტი ბექა თეზელაშვილი გვესაუბრა.
„ძალიან დიდი დაკვირვება სჭირდება მომხმარებელს იქამდე, ვიდრე ხელშეკრულებას გააფორმებს. აუცილებელია კარგად გავეცნოთ დეტალებს, კომპანიის და შესაძენი ქონების სამართლებრივ მდგომარეობას. კომპანიის გადამოწმება უნდა მოხდეს სამეწარმეო რეესტრში იმისთვის, რომ მივიღოთ ინფორმაცია იმაზე, ხომ არ აქვს რაიმე აკრძალვა, ყადაღა, რაც სამომავლოდ ხელს შეუშლის ქონების გადაფორმებას მყიდველზე. აგრეთვე უნდა გადამოწმდეს უძრავი ქონების სტატუსი, ხომ არ აქვს ინდივიდუალურ ფართს რაიმე შეზღუდვა, იპოთეკა, ან რაიმე ვალდებულება სახელმწიფოს, ფიზიკური ან იურიდიული პირების მხრიდან.
ასევე სანამ ქონებას შევიძენთ და გავაფორმებთ ხელშეკრულებას, იქამდე უნდა მოვთხოვოთ გამყიდველ კომპანიას ამონაწერი განაახლოს, რომ დაზღვეულები ვიყოთ. ჩვენს სახელმწიფოში არის ამის გადამოწმების საშუალება სამეწარმეო რეესტრში და ქონების საჯარო რეესტრში რაც ძალიან მარტივია.“
"როდესაც უძრავი ქონების ნასყიდობა ფორმდება ეს უნდა დარეგისტრირდეს საჯარო რეესტრში. ეს იქნება წინარე ნასყიდობა, განვადებით თუ ძირითადი ნასყიდობით, ყველა შემთხვევაში უნდა მოხდეს ამის საჯარო რეესტრში რეგისტრაცია ვინაიდან საფრთხეებს ავარიდოთ თავი. რა შეიძლება იყოს ეს საფრთხე? მაგალითად ერთი და იგივე უძრავი ქონება შეიძლება რამდენჯერმე იყოს გაყიდული. ბოლო პერიოდში ეს არ ხდება, თუმცა ყველა მყიდველი დაზღვეული უნდა იყოს ამისგან.
კომპანიები იმიტომ აფორმებენ საჯარო რეესტრის გარეშე მომხმარებლებთან კონტრაქტებს, რომ თუ პროექტს შეცვლიან, ფართს, ნიშნულს თუ სხვას, მათ ხელახლა მოუწევთ დაკორექტირება, შესაბამისად ზედმეტი პროცედურებისგან იზღვევენ თავს.“
„ძირითადად ცალმხრივი ხელშეკრულებები იდება, სადაც კომპანიის უფლებები და მომხმარებლის ვალდებულებებია გაწერილი. ვადებს უნდა მიექცეს ყურადღება, უნდა იყოს განსაზღვრული როდის შეიძლება კონტრაქტი შეწყდეს, უნდა იყოს ინფორმაცია საჯარიმო სანქციებზე. ასევე იმაზე, შეწყვეტის შემდეგ როდის უნაზღაურებს კომპანია გადახდილ თანხას. ეს ყველაფერი კონტრაქტში უნდა იყოს დეტალურად გაწერილი.
შენობის ექსპლუატაციაში მიღებისას ბევრი ბიუროკრატიული საკითხია, ამიტომ კომპანიებსაც სჭირდებათ გონივრული ვადები. როდესაც სამშენებლო ნებართვა გამოდის და იქ არის ვადა მითითებული, აუცილებელია კონტრაქტშია იყოს მას შემდეგ კიდევ 6 თვე დამატებული, რათა კომპანიამ ექსპლუატაციაში მიღება უზრუნველყოს. თუ ეს ვადები იქნება დარეული, შემდეგ შეიძლება მომხმარებელი წავიდეს სასამართლოში. როდესაც გამოცდილი კომპანიაა ეს მათთვის ნაკლებად არის პრობლემა. რაც შეეხება მომართვიანობას ახლა უფროა, ადრე არ იყო ამის კულტურა. ადამიანები დღეს უფრო ცდილობენ პროფესიონალს ანდონ საქმე, რადგან რთული ხელშეკრულებებია მათი მხრიდან შემოთავაზებული და ამას ახსნა სჭირდება.“
„შენობის ექსპლუატაციაში მიღების შემდეგ რისკები დეველოპერს სცილდება, მაგრამ სანამ მისაღებია, რა თქმა უნდა მისი პასუხისმგებლობაა. მაგალითად დეველოპერებს ხშირად უდევთ ხელშეკრულებაში რომ ფასადის დაზიანება არ შეიძლება, არ შეიძლება მისი ფორმის თუ ფერის ცვლილება. ხშირად ხდება ისიც, რომ მყიდველები აზიანებენ ან ცვლიან, რაც მათი პასუხისმგებლობაა.“
„მშენებლობის პერიოდში რიგი დეველოპერები თანამშრომლობენ ბანკებთან და გამარტივებული წესით ხდება იპოთეკით ყიდვა. მყიდველი მიდის პირადობით და თუ რაიმე პრობლემა არ აქვს, აკეთებს სასურველი ვადით სესხს. ამ შემთხვევაში შესაძლებელია მშენებარე ბინის იპოთეკით შეძენა, მაგრამ როდესაც მშენებარე სტადიაშია და არ არის რომელიმე ბანკის პარტნიორი, რთულია იპოთეკით ყიდვა. ასეთ დროს მყიდველი საკუთარი პირადი ქონებით ტვირთავს იმ ქონებას, რომელიც დასრულებულია.“
წყარო:https://bm.ge/news/gvchirdeba-tu-ara-mshenebare-binis-tsinastsari-registratsia-yvelaferi-rats-udzravi-qonebis-shedzenisas-unda-itsodet
გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.
ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.
რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?
2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.
აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:
#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)
#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)
#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)
#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)
#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)
#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)
#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)
#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)
#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)
#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)
წყარო:https://bm.ge/
