ნაძალადევის რაიონში, გურამიშვილის გამზირზე, N36 კორპუსის წყალარინების ქსელის რეაბილიტაცია მიმდინარეობს. პროექტის ფარგლებში, კორპუსის შიდა და გარე პერიმეტრზე მილები 191 გრძივ მეტრზე იცვლება.
მიმდინარე სამუშაოებს ნაძალადევის რაიონის გამგებელი ირაკლი ანდღულაძე გაეცნო და ადგილობრივ მოსახლეობას შეხვდა.
„აღნიშნულ მისამართზე სამი სადარბაზოს წყალარინების ქსელი იცვლება. კორპუსში 64 ოჯახი ცხოვრობს. ადგილობრივ მოსახლეობას დიდი ხნის განმავლობაში აწუხებდა მიწისქვეშა კომუნიკაციების პრობლემა. ქსელის სარეაბილიტაციო სამუშაოების დასრულების შემდეგ, ასფალტის საფარი დაიგება“, - განაცხადა ირაკლი ანდღულაძემ.
მიწისქვეშა კომუნიკაციების სარეაბილიტაციო სამუშაოების ღირებულება 28 394 ლარს შეადგენს. პროექტი ნაძალადევის რაიონის გამგეობის ბინათმესაკუთრეთა ამხანაგობების დაფინანსების პროგრამის ფარგლებში ხორციელდება.
