,
საქართველოს ინფრასტრუქტურის მინისტრი რევაზ სოხაძე არქიტექტურული საპროექტო კონცეფციების გამოსავლენად გამართულ საკონკურსო კომისიის მორიგ სხდომას დაესწრო, რომელიც ინფრასტრუქტურის სამინისტროში გაიმართა.
სხდომაზე კომისიამ განიხილა, მუნიციპალური განვითარების ფონდის მიერ გამოცხადებულ არქიტექტურულ კონკურსებში წარმოდგენილი არქიტექტურული კონცეფციების წინადადებები გორის მულტიფუნქციური სპორტული ცენტრის, თბილისის 157-ე საჯარო სკოლის, ოზურგეთის მუნიციპალიტეტის სოფელ ნაგომარისა და აბაშის საჯარო სკოლიებისთვის.
გორის მულტიფუნქციური ცენტრი იქნება თანამედროვე სტანდარტების შესაბამისი სპორტული და კულტურული სივრცე, გათვლილი დაახლოებით 1000 მაყურებელზე. კომპლექსის არქიტექტურული კონცეფციის შესარჩევად 6 სხვადასხვა წინადადებაა წარმოდგენილი. პროექტის მიზანია, გორში შეიქმნას რეგიონული მნიშვნელობის სპორტულ-რეკრეაციული ცენტრი, სადაც შესაძლებელი იქნება როგორც სპორტული შეჯიბრებების, ისე კულტურული ღონისძიებების ჩატარება.
თბილისის 157-ე საჯარო სკოლის მშენებლობისთვის წარმოდგენილი იყო 4 არქიტექტურული წინადადება. სკოლა განკუთვნილია 1600-მდე მოსწავლისთვის და მოიცავს თანამედროვე სასწავლო სივრცეებს, ლაბორატორიებს, სპორტულ დარბაზსა და რეკრეაციულ ზონებს.
აბაშის საჯარო სკოლისთვის, რომელიც გათვლილია დაახლოებით 450 მოსწავლეზე, საკონკურსო კომისიამ განიხილა 8 ესკიზური პროექტი. რაც შეეხება ოზურგეთის მუნიციპალიტეტის სოფელ ნაგომარის საჯარო სკოლას, რომელიც განკუთვნილია დაახლოებით 150 მოსწავლისთვის, წარმოდგენილი იყო 6 საპროექტო წინადადება. კომისიამ განსაკუთრებული ყურადღება დაუთმო წარმოდგენილი ესკიზების თავსებადობას გარემოსთან და განათლების სამინისტროს მიერ განსაზღვრულ თანამედროვე სასწავლო სტანდარტებთან.
საკონკურსო კომისიის სხდომას ესწრებოდნენ მუნიციპალური განვითარების ფონდის აღმარულებელი დირექტორი ბექა ურუშაძე, ფონდის შესაბამისი სამსახურების, საქართველოს პარლამენტის, განათლებისა და სპორტის სამინისტროების, არქიტექტორთა კავშირის და შესაბამისი მუნიციპალიტეტების წარმომადგენლები.
საკონკურსო კომისია გამარჯვებულ კონცეფციებს რამდენიმე დღეში გამოავლენს.
ინფრასტრუქტურის სამინისტროს მიზანია კონკურსის გზით მიიღოს მაღალი არქიტექტურული და ფუნქციური ხარისხის პროექტები, რომლებიც ხელს შეუწყობს როგორც განათლების, ისე სპორტის სფეროს განვითარებას რეგიონებში და შექმნის ღირსეულ, თანამედროვე გარემოს ახალგაზრდებისთვის.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
