ნაძალადევის რაიონს კიდევ ერთი რეკრეაციული სივრცე შეემატება.
ურიდიას ქუჩა N135-თან სკვერის მოწყობის სამუშაოები მიმდინარეობს.
პროექტის მიხედვით, 1 000 კვ.მ ფართობზე ინფრასტრუქტურული და გამწვანების სამუშაოები შესრულდება. დამონტაჟდება საბავშვო-გასართობი ატრაქციონები, ტრენაჟორები და ვიდეომონიტორინგის კამერები. მოეწყობა სარწყავი სისტემა, გარე განათების ქსელი, მოსასვენებელი სივრცეები და საფეხმავლო ბილიკები; დაირგვება სხვადასხვა სახეობის ხე-მცენარე.
სკვერის რეაბილიტაციის ფარგლებში, მისამართზე უკვე მოეწყო 63 მ სიგრძის და 3 მეტრი სიმაღლის საყრდენი კედელი.
რეკრეაციულ სივრცეში მიმდინარე ინფრასტრუქტურულ სამუშაოებს ნაძალადევის რაიონის გამგებელი ირაკლი ანდღულაძე ადგილობრივ მოსახლეობასთან ერთად გაეცნო.
ურიდიას ქუჩა N135-თან მდებარე სკვერის კეთილმოწყობისთვის ნაძალადევის რაიონის გამგეობის ბიუჯეტში 380 000 ლარია გათვალისწინებული.
