გლდანის რაიონის გამგეობა ბინათმესაკუთრეთა ამხანაგობების განვითარების პროგრამის ფარგლებში, სხვადასხვა პროექტის განხორციელებას განაგრძობს. მათ შორის, ამორტიზებული ლიფტების, შიდა და გარე წყალარინების ქსელის, სახურავისა და საერთო სარგებლობაში არსებული სხვა ინფრასტრუქტურის რეაბილიტაცია.
ლიფტის სამუშაოების დაფინანსებისა და დაწყების შესახებ ინფორმაცია გამგებლის მოვალეობის შემსრულებელმა ბესიკ კალაძემ რამდენიმე კორპუსის მოსახლეობას მიაწოდა.
აღნიშნული სამუშაოები გლდანის რაიონის გამგეობის „ბინათმესაკუთრეთა ამხანაგობების განვითარების ხელშეწყობის“ პროგრამის ფარგლებში ხორციელდება და გამგეობის მიერ 100%-ით ფინანსდება. ამხანაგობა კი, თავის მხრივ ვალდებულია, სამუშაოების ღირებულების 10 % -ის ოდენობის თანხა ამხანაგობის ანგარიშზე განათავსოს და საერთო ქონების მოვლა-პატრონობას მოახმაროს.
ბინათმესაკუთრეთა ამხანაგობების დაფინანსების პროგრამის ფარგლებში, გასულ 2023 წელს 219 სხვადასხვა პროექტი შესრულდა.
მათ შორის, საცხოვრებელ კორპუსში სახურავი და წყალსაწრეტი მილები 78 შეიცვალა; 52 ლიფტის მოწყობა-რეაბილიტაცია განხორციელდა და 34 კორპუსის მიწისქვეშა კომუნიკაციები მოწესრიგდა. საერთო სარგებლობის შიდა ინფრასტრუქტურის სამუშაოები (კიბეები, სადარბაზოს შესასვლელის გადახურვა, სართულშორისი ნაპრალების რეაბილიტაცია, სადარბაზოს რკინის კარის მოწყობა)კი 55 მისამართზე ჩატარდა.
