USD 2.7384
EUR 2.8548
RUB 2.6619
თბილისი
გიორგი კობერიძე - 2023 წლის 12 ივნისის შეჯამება უკრაინაში
თარიღი:  380

- უკრაინელებმა შეძლეს და გუშინ გათავისუფლებული ტერიტორიები სამხრეთში, ველიკა ნოვოსილკას მონაკვეთში არათუ შეინარჩუნეს, არამედ რუსული კონტრშეტევაც მოიგერიეს, რის შემდეგაც მოპოვებულ იქნა სამხედრო ტექნიკა, როგორც ალაფი და ტყვედ იქნა აყვანილი ათეულობით რუსი.

უკუქცეულ რუს სამხედროებსა და მობილიზებულებს თავად რუსები უხსნიან ცეცხლს. მოტივაცია მობილიზებულებს ნამდვილად არ აქვთ დიდი.

შეტევისას უკრაინელებმა როსგვარდიის დანაყოფების განადგურებაც შეძლეს. რუსები სამხრეთში ყველა სახის დანაყოფის გადასროლას ცდილობენ, როგორც ელიტის (მათ შორის მედესანტეების) ისე სრულიად გამოუცდელი ძალებისაც.

ამასთან, ხერსონის დატბორილი რაიონებიდან რუსული მძიმე ტექნიკისა და ცოცხალი ძალის გადასროლა ზაპორიჟიას მიმართულებით მიმდინარეობს. კახოვკას კაშხლის აფეთქების აზრიც როგორც ჩანს ეს იყო - გამოთავისუფლებული ნაწილები გადაისროლეს იქ, სადაც ყველაზე მეტად უჭირთ.

- დღეს უკრაინელებმა შეძლეს და დაასრულეს ნოვოდარივკასა და ლავადნეს გათავისუფლება ველიკა ნოვოსილკას დასავლეთით. ხოლო მის სამხრეთით, უკრაინული არმიის ავანგარდმა (შეტევის მოწინავე ნაწილებმა) სტარომლინივკამდე მიაღწია. ამის შემდეგ იწყება რუსეთის თავდაცვის უმთავრესი ზღუდე. თუკი სტარომლინივკა გათავისუფლდება პირველი ხაზის გარღვევის დაწყება ამ მიმართულებიდან შესაძლებელი გახდება. საინტერესოა, რომ არსებობს საფუძვლიანი ვარაუდი, რომლის მიხედვითაც რუსებს სწორედ პირველი ხაზი აქვთ უმთავრესად დაცული და მისი გარღვევის შემთხვევაში შესაძლოა მომდევნო ხაზები იმდენად მძლავრი აღარ იყოს. ამასთან, უკრაინელთა მიერ თავდაცვის ხაზამდე უკან მოტოვებული რამდენიმე სოფლის გათავისუფლება ახლაც გრძელდება. მათ შორისაა რივნოპილიც, რომლის მომარაგებასაც რუსეთი მალე ვეღარ შეძლებს და ევაკუაცია მოუწევს ან ალყაში მოექცევიან.

- მას შემდეგ რაც სამხრეთში ამინდი გაფუჭდა, შეტევის ტემპი მცირედით დაეცა, რაც გუშინვე იყო მოსალოდნელი, მაგრამ უჭირს რუსულ ავიაციასაც მოქმედება. ამ ფონზე დღეს უკრაინელებმა მოიერიშე Ka-52 შვეულმფრენი ჩამოაგდეს ფრონტის ხაზის სიახლოვეს. ეს კი ძალიან მნიშვნელოვანია, რადგან სწორედ რუსული შვეულმფრენები იყვნენ უკრაინული შეტევის ერთ-ერთი წინააღმდეგ ერთ-ერთი უიშვიათესი ეფექტური საშუალება.

- ყველა დაკვირვებითა და შეფასებით უკრაინელთა შემტევი ნაწილებიც მხოლოდ ძალიან მცირე ძალები მონაწილეობენ იერიშებში. ამ მცირე ძალებითაც კი წარმატებული კონტრშეტევა მნიშვნელოვან იმედებს იძლევა და აჩენს ვარაუდს, რომ შესაძლოა ძირითადი იერიში არა ზაპორიჟიას ან დონეცკის ოლქის სამხრეთ ნაწილში განვითარდეს, არამედ სრულიად სხვა მიმართულება გახლდეთ. ვნახოთ.

- ზაპორიჟიას ოლქის სხვადასხვა მონაკვეთზე იერიში გრძელდება, მაგრამ იქიდან მხოლოდ ძალიან ლიმიტირებული ინფორმაცია არსებობს.

- წინსვლაა ბახმუტშიც. ფლანგებიდან უკრაინელთა შეტევა წარმატებით ვითარდება. ჯერჯერობით ქალაქის ტერიტორიაზე საბრძოლო მოქმედებებს არ გადაუნაცვლია, მაგრამ სავარაუდოა, რომ უკრაინელები ქალაქის ალყაში მოქცევას უფრო შეეცდებიან ვიდრე მასზე პირდაპირ შტურმს. "ვაგნერის" ხელმძღვანელი პრიგოჟინი სწორედ ამ მომენტს ელის. შესაძლოა მისი პროპაგანდა შოიგუსა და გერასიმოვის წინააღმდეგ კიდევ უფრო გამწვავდეს ბახმუტის უკრაინელთა მიერ გათავისუფლების შემთხვევაში. დიდი ხანია იგი ამტკიცებს რომ უკრაინაში მხოლოდ რუსული "ვაგნერი" იყო ერთადერთი ანგარიშგასაწევი ძალა. მათ შორის სიტუაცია იმდენად ფეთქებადია, რომ ბახმუტში უკრაინელთა შესვლის შემთხვევაში შოიგუ-პრიგოჟინის დაპირისპირებამ შესაძლოა დუღილის ტემპერატურას მიაღწიოს.

 

 

მსოფლიო
«Bloomberg» (აშშ): „ევროპა მორიგი ენერგეტიკულ კრიზისის წინაშე დგება: ზამთრის მოახლოების კვალობაზე, გაზზე ფასები მატულობს“

„როგორც ჩანს, წლევანდელი ზამთარი, შარშანდელ თბილთან შედარებით, ამჯერად უფრო ცივი იქნება. უკვე ისე აცივდა, რომ ევროპის გაზსაცავები სწრაფად ცარიელდება“, - ნათქვამია ამერიკული საინფორმაციო-ანალიტიკური სააგენტოს „ბლუმბერგის“ (Bloomberg) მიერ გამოქვეყნებულ სტატიაში სათაურით „ევროპა მორიგი ენერგეტიკულ კრიზისის წინაშე დგება: ზამთრის მოახლოების კვალობაზე, გაზზე ფასები მატულობს“ (ავტორები - ანა შირიაევსკა და პრისცილა აზევედო).

გთავაზობთ პუბლიკაციას შემოკლებით:

შარშან ევროპაში უჩვეულოდ თბილი ზამთარი იყო და რუსული გაზის შეწყვეტის მიუხედავად, გაზსაცავებში ჩატვირთული საწვავი ევროპელებმა გაზაფხულამდე იმყოფინეს, პლის გამონახეს დამატებითი ალტერნატიული წყაროებიც... მაგრამ ახლა, როცა პროგნოზით თანდათანობით აცივდება, გაზის ფასები უკვე მატულობს და უკრაინის ტერიტორიაზე გამავალი მილსადენითაც ევროპა გაზს ვეღარ მიიღებს, ექსპერტების თქმით, ენერგეტიკული კრიზისის წინამძღვრები აშკარად ისევ იქმნება. არადა, ევროპა ჯერაც ვერ გამოსულა მთლიანად ორი წლის წინანდელი შოკისაგან, როცა ერთი კუბური მეტრი გაზის ფასი „ცას სწვდებოდა“.

რა თქმა უნდა, გაზის წლევანდელი ფასები 2022 წლის რეკორდულ ფასებზე მცირეა, მაგრამ მატება მაინც საგრძნობია, ანუ მოსახლეობის კეთილდრეობა მცირდება, ცხოვრების დონე ეცემა და მწარმოებელთა კონკურენტუნარიანობა უარესდება.

ზამთრის ყველაზე ცივ თვეებში გაზსაცავები მაშველი რგოლის როლს ასრულებენ, მაგრამ ნოემბრის სიცივეების გამო მოსახლეობაში გაზზე მოთხოვნა სწრაფად გაიზარდა. გარდა ამისა, ევროპაში ქარის ელექტროსადგურები ძირითადად უქმად დგანან, რადგან ქარის სიჩქარე დაბალია. შესაბამისად, მატულობს გაძვირებული გაზის გამოყენება ელექტროენერგიის წარმოებისთვის, რაც ბუნებრივია, ელექტროდენის ფასს ზრდის.

დღეისათვის რუსული გაზით - უკრაინის ტერიტორიაზე გამავალი მილსადენის მეშვეობით -  ევროკავშირის რამდენიმე წევრი ქვეყანა სარგებლობს, მათ შორის სლოვაკეთი და უნგრეთი. უკრაინასა და რუსეთს შორის დადებული სტრანზიტოს შეთანხმების ვადა დეკემბრის ბოლოს იწურება. კიევი აცხადებს, რომ კონტრაქტს აღარ გაახლებს. უნგრეთსა და სლოვაკეთს ენერგეტიკული უზრუნველყოფას საფრთხე ემუქრება.

ცივი ზამთრის გამო ცუდ დღეში ჩავარდება გერმანიაც. 2022 წელს ბერლინმა მიიღო გადაწყვეტილება, რომ გაზი თავისი გაზსაცავებისათვის მსოფლიო ბაზარზე რეკორდული ფასებით ეყიდა, თუმცა ამჟამად სხვა სიტუაციაა. გაზზე მაღალი ფასების გამო ბევრი ქარხანა წარმოებას ამცირებს ან სულაც ჩერდება. გამოდის, რომ მესამე წელია ევროპის უდიდესი ეკონომიკა, ენერგონედლეულის უკმარისობის გამო, ზეწოლას განიცდის.  გერმანიაში კი თუ სიტუაცია გაუარესდება, ეს ნიშნავს, რომ კრიზისის ვირუსი სხვა ქვეყნებსაც გადაედება.  თებერვალში დაგეგმილი ბუნდესტაგის არჩევნები შეიძლება მწვავე ეკონომიკური პრობლემების ფონზე ჩატარდეს.

ცივ ზამთარში ენერგიის დეფიციტი ძნელი გადასატანია, ასეთ სიტუაციებში მოსახლეობისადმი მოწოდებები ხარჯვის შემცირება-დაზოგვაზე საქმეს არ შველის: არსებობს დიდი რისკი იმისა, რომ ევროპელებს ამ ზამთარს ბედი აღარ გაუღიმებთ და ამიტომ იძულებულნი იქნებიან მეტი ძვირადღირებული თხევადი გაზის იმპორტი მოახდინონ, პარალელურად კი აზიის ქვეყნებთან, განსაკუთრებით კი ჩინეთთან მიმართებით კონკურენტუნარიანობაც შეინარჩუნონ, რაც ერთობ რთულ ამოცანას წარმოადგენს.

წყარო: https://www.bloomberg.com/news/articles/2024-11-23/europe-is-already-facing-its-next-energy-crisis?srnd=phx-politics

სრულად
გამოკითხვა
ვინ გაიმარჯვებს რუსეთ - უკრაინის ომში?
ხმის მიცემა
სხვათა შორის

მსოფლიოს ისტორიაში, უდიდესი იმპერიები ტერიტორიით(მლნ კვ. კმ): ბრიტანეთი - 35.5 მონღოლეთი - 24.0 რუსეთი - 22.8 ქინგის დინასტია (ჩინეთი) - 14.7 ესპანეთი - 13.7 ხანის დინასტია (ჩინეთი) - 12.5 საფრანგეთი - 11.5 არაბეთი - 11.1 იუანების დინასტია (ჩინეთი) - 11.0 ხიონგნუ - 9.0 ბრაზილია - 8.337 იაპონია - ~8.0 იბერიული კავშირი - 7.1 მინგის დინასტია (ჩინეთი) - 6.5 რაშიდუნების ხალიფატი (არაბეთი) - 6.4 პირველი თურქული სახანო - 6.0 ოქროს ურდო - 6.0 აქემენიანთა ირანი - 5.5 პორტუგალია - 5.5 ტანგის დინასტია (ჩინეთი) - 5.4 მაკედონია - 5.2 ოსმალეთი - 5.2 ჩრდილო იუანის დინასტია (მონღოლეთი) - 5.0 რომის იმპერია - 5.0

Ford, საავტომობილო ბაზრის დომინანტი მაშინ, როდესაც საავტომობილო ბაზარი ჯერ კიდევ ჩამოყალიბების პროცესში იყო, Ford Model T იყო დომინანტი მანქანა. 1916 წლის მონაცემებით, ის მსოფლიოში ყველა ავტომობილის 55%-ს შეადგენდა.

ილია ჭავჭავაძე: "როცა პრუსიამ წაართვა საფრანგეთს ელზასი და ლოტარინგია და პარლამენტში ჩამოვარდა საუბარი მასზედ, თუ რაგვარი მმართველობა მივცეთო ამ ახლად დაჭერილს ქვეყნებს, ბისმარკმა აი, რა სთქვა: ,,ჩვენი საქმე ელზასსა და ლოტარინგიაში თვითმმართველობის განძლიერება უნდა იყოსო. ადგილობრივნი საზოგადოების კრებანი უნდა დავაწყოთო ადგილობრივის მმართველობისთვისაო. ამ კრებათაგან უფრო უკეთ გვეცოდინება იმ ქვეყნების საჭიროება, ვიდრე პრუსიის მოხელეთაგანა. ადგილობრივთა მცხოვრებთაგან ამორჩეულნი და დაყენებულნი მოხელენი ჩვენთვის არავითარს შიშს არ მოასწავებენ. ჩვენგან დანიშნული მოხელე კი მათთვის უცხო კაცი იქნება და ერთი ურიგო რამ ქცევა უცხო კაცისა უკმაყოფილებას ჩამოაგდებს და ეგ მთავრობის განზრახვასა და სურვილს არ ეთანხმება. მე უფრო ისა მგონია, რომ მათგან ამორჩეულნი მოხელენი უფრო ცოტას გვავნებენ, ვიდრე ჩვენივე პრუსიის მოხელენი”. თუ იმისთანა კაცი, როგორც ბისმარკი, რომელიც თავისუფლების დიდი მომხრე მაინდამაინც არ არის, ისე იღვწოდა თვითმმართველობისათვის, მერე იმ ქვეყნების შესახებ, რომელთაც გერმანიის მორჩილება არამც თუ უნდოდათ, არამედ ეთაკილებოდათ, თუ ამისთანა რკინის გულისა და მარჯვენის კაცი, როგორც ბისმარკი, სხვა გზით ვერ ახერხებდა ურჩის ხალხის გულის მოგებას, თუ არ თვითმმართველობის მინიჭებითა, სხვას რაღა ეთქმის."

დედამიწაზე არსებული ცოცხალი არსებებიდან მხოლოდ ადამიანს და კოალას აქვთ თითის ანაბეჭდი

ინდოელი დიასახლისები მსოფლიო ოქროს მარაგის 11% ფლობენ. ეს უფრო მეტია, ვიდრე აშშ-ს, სავალუტო ფონდის, შვეიცარიის და გერმანიის მფლობელობაში არსებული ოქრო, ერთად აღებული.

დადგენილია, რომ სასოფლო-სამეურნეო კულტურათა მოსავლიანობის განმსაზღვრელ კომპლექსურ პირობათა შორის, ერთ-ერთი თესლის ხარისხია. მაღალხარისხოვანი ჯიშიანი თესლი ერთ-ერთი მნიშვნელოვანი ფაქტორია მოსავლიანობის გასადიდებლად, რაც აგრეთვე დასაბუთებულია ხალხური სიბრძნით "რასაც დასთეს, იმას მოიმკი". - ქართული გენეტიკისა და სელექცია–მეთესლეობის სკოლის ერთ-ერთი ფუძემდებელი, მეცნიერებათა დოქტორი, აკადემიკოსი პეტრე ნასყიდაშვილი

ებოლა, SARS-ი, ცოფი, MERS-ი, დიდი ალბათობით ახალი კორონავირუსი COVID-19-იც, ყველა ამ ვირუსული დაავადების გავრცელება ღამურას უკავშირდება.

ყველაზე დიდი ეპიდემია კაცობრიობის ისტორიაში იყო ე.წ. "ესპანკა" (H1N1), რომელსაც 1918-1919 წლებში მიახლოებით 100 მილიონი ადამიანის სიცოცხლე შეეწირა, ანუ დედამიწის მოსახლეობის 5,3 %.

იცით თუ არა, რომ მონაკოს ნაციონალური ორკესტრი უფრო დიდია, ვიდრე ქვეყნის არმია.