,
- ყველაზე შესამჩნევი უკრაინული აქტივობა ბახმუტის ირგვლივ მიმდინარეობს. უკრაინელებმა ქალაქის ჩრდილოეთით ბახმუტი-სლავიანსკის გზის მონაკვეთზე კიდევ რამდენიმე ასეული მეტრით წაიწიეს წინ უშუალოდ გზის გასწვრივ. საბრძოლო მოქმედებები ძალიან ინტენსიურია და ყველა სახის შეიარაღებაა ჩართული. მიუხედავად ასეთი მაღალი აქტივობისა რუსებს სასანგრე პოზიციები აქვთ გამართული და თითოეული ათეული მეტრისათვის მიმდინარეობს შეტაკებები. უკრაინელები მაქსიმალურად ცდილობენ ქალაქის ჩრდილოეთით მდებარე ბერხივკასა და შემდგომ იაჰიდნეს გათავისუფლებას. ბერხივკას ნაწილი უკრაინელთა ხელშია და სოფელში ბრძოლა უკვე რამდენიმე კვირაა გრძელდება, მაგრამ რუსები ცოცხალ ძალას არ იშურებენ პოზიციების შესანარჩუნებლად.
ბახმუტის მიმართულებით რუსებს თავდაცვის ზღუდეები ზაპორიჟიასთან შედარებით სუსტი აქვთ. თუმცა სასანგრე ბრძოლები აქ პრაქტიკულად 10-11 თვეა მიმდინარეობს. ამასთან, რადგანაც რუსებისათვის ბახმუტმა სიმბოლური მნიშვნელობა მიიღო მის დაკარგვას ასე ადვილად ვერ შეეგუებიან. ამიტომაა, რომ ცოცხალ ძალას ასე თამამად სწირავენ სტრატეგიული თვალსაზრისით არცთუ მნიშვნელოვანი დასახლებების (ნასახლარების უფრო) მაქსიმალური შენარჩუნებისათვის. რუსების მხრიდან ეს თვითგამოფიტვის პროცესი უკრაინელებსაც აძლევს ხელს, თუმცა მათთვისაც მნიშვნელოვანი იქნება ქალაქისა და მისი შემოგარენის გათავისუფლება.
- ზაპორიჟიას მიმართულებით დიდი ცვლილებები არ არის - და არც ინფორმაცია ნათელი. ერთადერთი რუსული წყაროები წერენ, რომ ორიხივი-ტოკმაკის გზაზე, რობოტინეს სიახლოვეს უკრაინელებმა შეძლეს და რობოტინეს გამაგრებულ ზონას შემოუარეს და თან ისე, რომ რობოტინეზე დაწოლა არ შემცირებულაო. რეალურად, რა ხდება ამ პერიმეტრზე ცნობილი არ არის, მაგრამ ის, რომ უკრაინელებმა უკვე გაათავისუფლეს ყველა ის პოზიცია, სადაც ივნისის დასაწყისში ტანკები დაკარგეს, ეს ცხადია. სხვათა შორის უკრაინის გენშტაბის მხრიდან გაკეთდა ძალიან ნათელი განცხადება ამასთან დაკავშირებით: ტანკები სააღლუმედ არ გვინდოდა, არამედ იმისაა, რომ იბრძოლო, ზოგი დაიკარგება და ზოგით მოწინააღმდეგის პოზიციას აიღებო.
- რუსებმა ბოლო ორი დღის განმავლობაში სხვადასხვაგვარი ინფორმაცია გაავრცელეს ხერსონის ოლქში, ანტონოვის ხიდის მომიჯნავედ მიმდინარე პროცესებზე. ერთი ინფორმაციით რაც კი უკრაინელებმა 24-ში განახორციელეს მდინარის გადალახვა, მას შემდეგ რუსული არტილერია და ფრთოსანი რაკეტები ბომბავს უკრაინულ პოზიციებს, რის შედეგადაც უკრაინელების შეტევა ჩავარდაო, ხოლო მეორე ინფორმაციით უკრაინელები ოლეშკის სიახლოვეს იმყოფებიან უკან და არათუ დაჩების პოზიციის შენარჩუნება შეძლეს, არამედ კიდევ უფრო ღრმად უტევენ რუსებს.
- უკრაინელებმა მელიტოპოლი დაბომბეს. ინტენსიური დარტყმების შედეგად რუსული სამეთაურო პოზიციები იქნა განადგურებული. ქალაქი კი თანდათან იცლება მოსახლეობისა და კოლაბორაციონისტებისაგან.
- CIA-ს უფროსი აღნიშნავს, რომ პრიგოჟინის ამბოხს მნიშვნელოვანი გამოფიტვის ეფექტი ჰქონდა პუტინის რეჟიმისათვის და ამ ყველაფერს გრძელვადიანი ეფექტიც შეიძლება ჰქონდეს. ზოგადად ასეა, ავტოკრატიებს ამბოხებები მეტად ავნებთ ხოლმე, მით უფრო ომში მყოფებს.
- უკრაინის გენშტაბის უფროსი ვალერი ზალუჟნი "ვაშინგტონპოსტთან" ინტერვიუში საკმაოდ კრიტიკულად აფასებს სიტუაციას და ამბობს, რომ ფრონტის ხაზის გარღვევას და წარმატებას დასავლეთის მხრიდან უფრო აქტიური და სწრაფი მხარდაჭერა სჭირდება, პირველ რიგში კი საუბარია F16-ებზე, რომლებმაც უკრაინელებს ჰაერში უპირატესობა თუ არა წონასწორობა მაინც უნდა მიაღწევინონ.
შეჯამება:
ზოგადად, ფრონტის ხაზზე სიტუაცია ძალიან აქტიური არცერთი მიმართულებით არ არის, მაგრამ ამას ემატება ინფორმაციის კატასტროფული დეფიციტი და შეზღუდვა და ეს არამხოლოდ უკრაინელთა არამედ რუსების მხრიდანაც, რომლებიც, პრიგოჟინის ამბოხის შემდეგ კიდევ უფრო მალავენ და აკონტროლებენ ომთან დაკავშირებულ ინფორმაციას.
მიყევით ბმულს - გიორგი კობერიძე
ბრიტანულ გაზეთ „ფაინენშელ თაიმსში“ (Financial Times) დაბეჭდილია სტატია სათაურით „მსოფლიოში არასტაბილურობა სუფევს, ამიტომ ევროპა უნდა შეიარაღდეს“, რომლის ავტორები არიან ფრიდრიხ მერცი (გერმანიის კანცლერი) და ემანუელ მაკრონი (საფრანგეთის პრეზიდენტი).
გთავაზობთ სტატიის შინაარსს:
„ჰააგაში ნატოს სამიტის ფონზე მსოფლიოში ქაოსური მოვლენები სუფევს: ბობოქრობენ ომები, ჩვეული ქცევის წესები და ნორმები ინგრევა, ხოლო დიდი ხნით განმტკიცებული რწმენები ეჭვის ქვეშ დგება. ამ ეპოქალური გამოცდის ჟამს გერმანია და საფრანგეთი - თავიანთ ევროპელ და ატლანტის ოკეანის გაღმა ნაპირზე მყოფ მეგობრებთან და მოკავშირეებთან ერთად ერთიანი და მტკიცე ფრონტით გამოდიან, რათა დაიცვან ჩვენი საერთო ფასეულობები, ჩვენი მოქალაქეების თავისუფლება და უსაფრთხოება“, - ნათქვამია სტატიის დასაწყისში.
ავტორთა აზრით, „ევროპაში არასტაბილურობის ძირითად წყაროს რუსეთი და მისი იმპერიალისტური ომები წარმოადგენს: „2008 წელს რუსეთი თავს დაესხა საქართველოს, შემდეგ, 2014 წელს - მოახდინა ყირიმისა და დონბასის ოკუპაცია, 2022 წელს კი კრემლის ჯარები უკრაინის დანარჩენ ტერიტორიაზე შეიჭრნენ. ვლადიმერ პუტინის მიზანია ძირი გამოუთხაროს ევროპულ უსაფრთხოებას, მეზობლებს თავს მოახვიოს უკანონო მეურვეობა, ისინი შიგნიდან გატეხოს და თავის ორბიტაზე გადაიყვანოს, საერთაშორისო მართლწესრიგს საფუძველი შეურყიოს. ეს ყველაფერი რუსეთის სტრატეგიულ ინტერესებს წარმოადგენს. ჩვენ არ შეგვიძლია ამ ყველაფერს შევურიგდეთ, ჩვენს კონტინენტზე მშვიდობა უნდა დავიცვათ“.
„თუ კრემლის ამჟამინდელი პოლიტიკის ტრაექტორია არ შეიცვლება, რუსეთი საფრანგეთისა და გერმანიის ურყევ და მტკიცე პოზიციის წინაშე აღმოჩნდება. ამჟამად სასწორზე დევს ევროპული სტაბილურობის ბედი ათწლეულების განმავლობაში.
ნატოს სამიტზე საფრანგეთი და გერმანია დაადასტურებენ თავიანთ მხარდაჭერას იმ ძალისხმევისადმი, რასაც აშშ მიმართავს კონფლიქტების შეწყვეტისათვის და მტკიცე მშვიდობის მისაღწევად. საფრანგეთი და გერმანია მხარს დაუჭერენ უკრაინის სუვერენიტეტს, ცეცხლის შეწყვეტის წინადადებას და გააძლიერებენ რუსეთზე ზეწოლას, მათ შორის სანქციების მეშვეობით“, - აღნიშნავენ სტატიის ავტორები, - „ჩვენ ვუზრუნველყოფთ, რომ უკრაინა კონფლიქტიდან გამოსვლის შემდეგ აყვავებული, ძლიერი და უსაფრთხო ქვეყანა გახდეს“.
როგორც სტატიაშია ნათქვამი, ამ მხრივ უკვე ბევრი რამ არის გაკეთებული - ევროკავშირი უკრაინას 130 მილიარდი ევროთი დაეხმარა. გარდა ამისა, ევროკავშირმა დაგმო კრემლის აგრესიული პოლიტიკა, რისთვისაც რუსეთს მკაცრი სანქციები აქვს დაწესებული. „მაგრამ ეს კიდევ ცოტაა. ამიტომ ჩვენ, დიდ ბრიტანეთთან ერთად, ხელს შევუწყობთ უკრაინის არმიის გაძლიერებას, განვაახლებთ უკრაინის თავდაცვით მრეწველობას იმ მიზნით, რომ სამომავლოდ მას რუსეთის სავარაუდო აგრესიის წარმატებით მოგერიება შეძლოს.
„რა თქმა უნდა, ჩვენი გეგმები მხოლოდ უკრაინას არ ეხება. როგორც ჩანს, ახლო მომავალში კონფლიქტურ გარემოში ცხოვრება მოგვიწევს - იმ მსოფლიოში, სადაც ჩვენი მოკავშირეების წინაშე ახალი დილემები და პრიორიტეტები დადგება. რუსეთის გარდა, ჩვენ, ალბათ, კიდევ ბევრი გამოწვევის მოწმენი გავხდებით. ამისათვის ახლავე უნდა ვიზრუნოთ“, - აღნიშნავენ ავტორები და იქვე მიუთითებენ: აუცილებელია ნატოს გაძლიერება - თავდაცვის სფეროს ალიანსის წევრების საერთო ბიუჯეტის 3,5% უნდა მოხმარდეს, 2%-ის ნაცვლად. დამატებითი ხარჯები აუცილებელია. მათი მეშვეობით ჩვენ იმ ბზარს ამოვავსებთ, რომელიც ნატოს სამხედრო პოტენციალს გაუჩნდა რევანშისტული რუსეთის პირისპირ“, - ხაზს უსვამენ ავტორები.
„ალიანსის უსაფრთხოების ქვაკუთხედად ბირთვული შეკავება რჩება: საფრანგეთს აქვს თავისი დამოუკიდებელი სტრატეგიული ბირთვული ძალები, რომლებსაც მნიშვნელოვანი წვლილი შეაქვთ ნატოს საერთო უსაფრთხოების დაცვაში. გერმანიას უფლება აქვს მონაწილეობა მიიღოს ნატოს ბირთვული იარაღის ერთობლივ გამოყენებაში. გარდა ამისა, ერთობლივად ვიმუშავებთ შესყიდვების სისტემის რეფორმირებაში, რომელიც გამოიხატება უნიფიკაციაში, გამარტივებასა და გაზრდაში“, - ნათქვამია სტატიაში.
პუბლიკაციის დასასრულს, ავტორები აღნიშნავენ, რომ ნატო გააგრძელებს მჭიდრო თანამშრომლობას ევროკავშირთან, რათა უკეთ იქნას გამოყენებული ევროპის ტექნოლოგიური უპირატესობა [რუსეთის წინააღმდეგ]. „ჩვენ ვადასტურებთ სამოკავშირეო ერთიანობას, სოლიდარობას და ერთგულებას ჩვენი კონტინენტის თავისუფლების, მშვიდობისა და უსაფრთხოებისათვის“.
