,
იუსტიციის სამინისტრომ დაასრულა მეწარმეთა შესახებ ახალ კანონზე მუშაობა,- ამის შესახებ საქართველოს პრემიერ - მინისტრმა გიორგი გახარიამ, მთავრობის სხდომაზე განაცხადა.
მისივე თქმით, აღნიშნულ საკითხზე მთავრობის დღევანდელ სხდომაზე იმსჯელებენ.
„ამ კანონმდებლობის ძირითადი მოტივები გახლავთ სამეწარმეო სულისკვეთების გაძლიერება ქვეყანაში, ბიზნესკლიმატისა და საინვესტიციო გარემოს გაუმჯობესება. ეს კანონმდებლობა სრულად შეესაბამება თანამედროვე ევროპულ მოთხოვნებს. მოგეხსენებათ, ამ კანონმდებლობაზე მთავრობა, იუსტიციის სამინისტრო წლების განმავლობაში მუშაობდა და დღეს, ჩვენ შეგვიძლია უკვე, რომ ფართო განხილვები დავიწყოთ ამ ახალი კანონის“, - აღნიშნა პრემიერ - მინისტრმა.
მთავრობის სხდომაზე განცხადდა ასევე, რომ მთავრობა არასტანდარტული ვაშლის შესყიდვის სუბდსიდირებას მოახდენს
როგორც პრემიერმა განმარტა, ყველა ის კომპანია, რომელიც აღნიშნულ პროგრამაში ჩაერთვება, დამატებით სუბსიდირებას მიიღებს 10 თეთრის ოდენობით.
„ეკონომიკური კრიზისის ფარგლებში სექტორალურად ვეხმარებით სხვადასხვა დარგებს და განსაკუთრებულ ყურადღებას ვაქცევთ სოფლის მეურნეობას. ძირითადი მიზანი გახლავთ, რომ ჩვენი ფერმერების წარმოებული არც ერთი გრამი პროდუქტი დაუბინავებელი არ უნდა დარჩეს, ამ მოტივით იყო განპირობებული ჩვენი დახმარება მევენახეობისთვის. მოგეხსენებათ, წელს მთავრობა სუბსიდირებს ყურძნის შესყიდვას და შემდეგი ნაბიჯი, რასაც ჩვენ გადავდგამთ, ეს იქნება ვაშლის მოსავლის დაბინავება. წელს, საერთაშორისო ბაზრებზე ვაშლის ფასი საკმაოდ დაეცა, ამიტომ სოფლის მეურნეობის სამინისტროს რეკომენდაციით დღეს უნდა მივიღოთ გადაწყვეტილება არასტანდარტული ვაშლის შესყიდვის სუბდსიდირების შესახებ 10 თეთრით, საბოლოოდ ეს ფასი ჩვენი მეწარმეებისთვის, ფერმერებისთვის იქნება არანაკლებ 22 თეთრი. ყველა ის კომპანია, რომელიც ჩაერთვება შემსყიდველ შტაბში, რომელიც სპეციალურად ვაშლის დაბინავების მიზნით შეიქმნება, ამ სუბსიდირებას მიიღებს დამატებითი 10 თეთრის რაოდენობით, ეს ალბათ, მნიშვნელოვანია რეგიონისთვის, ამიტომ აქ გვმართებს სწორი და ეფექტური მუშაობა. ეს პროგრამა გაგრძელდება 2020 წლის დეკემბრამდე“, - განაცხადა გახარიამ.
