,
გერმანელი გეოლოგი პეტერ ნიუმანი, რომელიც ვაშლიჯვრის ფერდობზე არსებულ მეწყრულ პროცესებს სწავლობს, აცხადებს, რომ არსებული სიტუაცია კომპლექსურია და მისი გადაჭრის კონკრეტული გზა არ არსებობს. განცხადება მან თბილისის მერიაში გააკეთა.
„ჩვენი გამოცდილებით თითოეული მეწყერი გამოირჩევა თავისი ინდივიდუალიზმით და უნიკალური თვისებებით. იგივე შეიძლება ითქვას ამ მეწყერზეც და თქვენმა ექსპერტებმა ამ თვალსაზრისით შესაბამისი საქმიანობა განახორციელეს. ჩემს კოლეგასთან ერთად ვიყავი ადგილზე და ჩვენი შეხედულებით, საკითხი საკმაოდ კომპლექსურია და მისი გადაჭრის კონკრეტული გზა არ არსებობს. ზოგადად, როცა გეოლოგიურ საკითხებზე მუშაობ, სამუშაო გარემო არახელსაყრელია, რადგან ძალიან ბევრი ქანია გამოთავისუფლებული, რაც თავისთავად მუშაობის პროცესს ართულებს. პირველ რიგში, უნდა მოხდეს მიმდინარე პროცესის იდენტიფიცირება და მერე მისი გადაჭრის გზების დაგეგმვა“, - განაცხადა მან.
უცხოელი გეოლოგის თქმით, თბილისის მერიის მიერ განხორციელებული უსაფრთხოების ზომები აბსოლუტურად სწორია, მათ შორის შეზღუდვების დაწესება.
„ეს არის, სავარაუდოდ, შესაძლო მასშტაბური მეწყერის ინიცირების ბაზა. უნდა განვახორციელოთ პირველადი ზომები, რაშიც შედის გასამაგრებელი სამუშაოები, დრენაჟები და სამონიტორინგო ზომები. აუცილებელია დიდი ყურადღება, გეოლოგიური კვლევები და ამის შემდეგ უნდა გადავდგათ შემდგომი ნაბიჯები“, - ამბობს გეოლოგი.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
