ვირუსული პანდემიის კოვიდ-19-ის მკურნალობისა და კვლევის პროცესში ჩართული მსოფლიოს სხვადასხვა ქვეყნების მედიკოსები შეთანხმებულები არიან იმ საკითხში, რომ ახალი კორონავირუსი წარმოადგენს საშიშროებას და მძიმე შემთხვევებში ლეტალური გამოსავალით მთავრდება იმ პაციენტებისათვის, რომლებიც განეკუთვნებიან ორ  რისკ-ჯგუფს-ხანდაზმულებსა და ქრონიკულად დაავადებულებს. მაგრამ გვხვდება შემთხვევები, გაცილებით მცირერიცხოვანი, მაგრამ მაინც ანგარიშგასაწევი რაოდენობით, როდესაც ახალი კორონავირუსით ბავშვების,  ახალგაზრდებისა და ჯანმრთელი მოზრდილების დაინფიცირება ასევე სიკვდილით მთავრდება.

 სწორედ ასეთი პაციენტების სიკვდილიანობის მიზეზის კვლევითაა დაინტერესებული ფრანგი პედიატრი და იმუნოლოგი ჟან-ლორან კაზანოვა, რომელიც თავის კოლეგა  ლორან აბელთან ერთად  ხელმძღვანელობს ინფექციური დაავადებების გენეტიკური კვლევის ლაბორატორიის პარიზისა და ნიუ-იორკის ფილიალებს.

 „სარსა-კოვიდ-2-ით დაინფიცირებისას  გვხვდება დაავადების მძიმედ მიმდინარეობის შემთხვევები, რომელიც მოითხოვს რეანიმაციულ ჩარევას ან მთავრდება ლეტალურად როდესაც პაციენტებად გვყავს არა ხანდაზმულები ან ქრონიკული ავადმყოფები, არამედ  პრაქტიკულად ჯანმრთელი პაციენტები. ამ აუხსნელი შემთხვევების კვლევა გვიბიძგებს იმისკენ, რომ დავუშვათ ვირუსის მიმართ გენეტიკური წინასწარგანწყობის ვარაუდი“.

მედიკოსის აზრით გენეტიკური წინასწარგანწყობა თავს არ ამჟღავნებს მანამ, სანამ შემხებლობაში არ მოვა ვირუსთან. ამ ჰიპოთეზის მიხედვით ასეთი კატეგორიის პაციენტების დაინფიცირებისას თავს იჩენს  ვირუსის მიმართ გენეტიკურ დონეზე არსებული მოწყვლადობა. ამიტომაც აუცილებელია  კვლევის გაგრძელება გენომის მოლეკულური აგებულების გაშიფვრის მიზნით.

აღნიშნული ინიციატივით მეცნიერი 23 მარტს  წარსდგა კოვიდ-19-ის შემსწავლელი სამეცნიერო საბჭოს წინაშე. აღსანიშნავია, რომ მას აქვს მრავალწლიანი გამოცდილება გენეტიკური წინასწარგანწყობის ფაქტორის მნიშვნელობის კვლევის მიმართულებით  ისეთი ინფექციების მიმდინარეობისას, როგორებიცაა ჰერპესული ენცეფალიტი, ტუბერკულოზი და გრიპი.

წყარო „Le Monde”