,
21 ივლისიდან არტ-ვილა გარიყულა, ძმებ ზდანევიჩების სახელობის თანამედროვე ხელოვნების მე-16 საერთაშორისო ფესტივალი Fest I Nova 2024 წარმოგიდგენთ ჯგუფურ გამოფენას "ხო, არაფერია კარგად". მონაწილე ხელოვანები არიან:
დათუნა ბარნაბიშვილი, სალომე ბოჭორიშვილი, გიორგი გელაძე, მართა გულაშვილი, ანი თოიძე, ელენე კავთელაძე, ამირან კვიატკოვსკი, მაკო ლომაძე, მერაბო ლომაძე, დაჩი მინდაძე, ნუცა მიქაბერიძე, საბა მჟავანაძე, თათა ჟღენტი, სოფო სიმონიშვილი, ნინა წოწორია, ნოდო ხაჩიაური, ნინი ჯალიაშვილი, Yamadatesla.
კასპის რაიონის სოფელ გარიყულაში XIX საუკუნეში აშენებული ბოლგარსკიანთ სასახლის, იგივე არტ-ვილა გარიყულად აღდგენა 2017 წელს დაიწყო.
კულტურული მემკვიდრეობის დაცვის ეროვნული სააგენტოს ცნობით, აღდგენის შემდეგ როტონდას თავდაპირველი ფუნქცია დაუბრუნდა. გადმოცემით, როტონდაზე დამონტაჟებული იყო სანათური, რომელიც შუქურასავით ანათებდა და სოფლის თითქმის ყველა ნაწილიდან ჩანდა.
არტ-ვილა გარიყულა პოლონური წარმოშობის თბილისელმა ინჟინერმა ვასილ ბოლგარსკიმ 1885 წელს ააშენა. მის შესახებ საკმაოდ მწირი ინფორმაცია მოიპოვება. ცნობილია, რომ ის იყო ჭრელი აბანოს კომუნიკაციების, დღევანდელი ეროვნული გალერეისა და ახლა უკვე აღარ არსებული თბილისის სამხედრო ტაძრის ინჟინერი. სოფელ გარიყულაში მას ჰქონდა საკმაოდ დიდი მეურნეობა, რომელიც მოიცავდა მარანს თავისი საწნახელითა და ქვევრებით (დღემდე მოქმედია), სამაცივრე მეურნეობას, ვრცელ ვენახებს და საკონსერვო წარმოებას.
გასაბჭოების შემდეგ ბოლგარსკი „გააკულაკეს“, მოახდინეს მისი ქონების კონფისკაცია, სააგარაკო მამულში კი სკოლა პანსიონი გახსნეს. მოგვიანებით შენობა სამხატვრო აკადემიას გადაეცა, მაგრამ საკმაოდ სწრაფად ისევ სახელმწიფოს გამგებლობაში გადავიდა. XX საუკუნის 80-იან წლებში, ნახევრადდანგრეულ შენობაში ადგილობრივები თივას ინახავდნენ.
ბოლგარსკიანთ სასახლის ახალი ისტორია 2000 წელს დაიწყო, როცა თბილისელი მხატვრის, ყარამან ქუთათელაძის ინიციატივით მოხდა ტერიტორიის დასუფთავება და ნაგებობის აღდგენა. სამუშაოებში მოხალისეებად იყვნენ ჩართულები თბილისის სახელმწიფო სამხატვრო აკადემიის სტუდენტები, ქართველი და უცხოელი არქიტექტორები. ნახევრადდანგრეულმა ბოლგარსკიანთ სასახლემ ახალი ფუნქცია შეიძინა - გარდაიქმნა ხელოვნების რეგიონულ ცენტრად.
