,
გარემოს ეროვნულმა სააგენტომ „ამბასადორი ბათუმი აილენდს“ ხელოვნური კუნძულის მოწყობის სამუშაოების ადმინისტრაციული წარმოების შეწყვეტის გადაწყვეტილება მიიღო. ამის შესახებ სააგენტოს მიერ გამოქვეყნებულ განცხადებაშია აღნიშნული.
სააგენტოში განმარტავენ, რომ სკოპინგის დასკვნის მიღების მიზნით სააგენტოში წარდგენილი იქნა - შპს „ამბასადორი ბათუმი აილენდის“ მიერ, ქ.ბათუმში, ხელოვნური კუნძულის მოწყობის სკოპინგის ანგარიში.
„გაცნობებთ, რომ 2023 წლის 15 ივნისის N 21/4603 წერილის საფუძველზე ზემოაღნიშნულ პროექტთან დაკავშირებით სააგენტომ მიიღო გადაწყვეტილება ადმინისტრაციული წარმოების შეწყვეტის თაობაზე“, - ნათქვამია განცხადებაში.
გარემოს ეროვნულმა სააგენტომ კომპანია „ამბასადორი ბათუმი აილენდისთვის“ გაგზავნილ წერილში აღნიშნულია, რომ უწყებამ კომპანიის მიერ 2023 წლის 29 მაისის სკოპინგის განცხადება განიხილა, რომელიც ბათუმში ხელოვნური კუნძულის მოწყობას ეხება და აცნობა, რომ წარმოდგენილ დოკუმენტაციაში არ არის მოცემული და დაზუსტებას საჭიროებს დაგეგმილ საქმიანობასთან დაკავშირებული შემდეგი საკითხები:
„სკოპინგის ანგარიშის მიხედვით, დაგეგმილი საქმიანობა ითვალისწინებს ქ. ბათუმში ხელოვნური კუნძულის მოწყობას, რომლის ფართობი შეადგენს 108.5 ჰექტარს.
„გარემოსდაცვითი შეფასების კოდექსის“ II დანართის მე-9 პუნქტის 9.13 ქვეპუნქტით გათვალისწინებულ საქმიანობასთან ერთად, დაგეგმილი ასევე, „ზღვის ფართობის ათვისება, ხელოვნური კუნძულის, ნახევარკუნძულის და ა. შ. შექმნა”, 10 ჰექტარზე მეტი განაშენიანების ფართობის მქონე ურბანული განვითარების პროექტი და საზღვაო ნავსადგურისა და მასთან დაკავშირებული შენობა-ნაგებობის მშენებლობა, რომლის საპროექტო განაშენიანების ფართობი 1 ჰექტარზე მეტია. აღნიშნულიდან გამომდინარე, დაზუსტებას საჭიროებს სკოპინგის განცხადების წარმოდგენის საფუძველი. ასევე, დაგეგმილი საქმიანობის დასახელება თანხვედრაში უნდა იყოს „გარემოსდაცვითი შეფასების კოდექსით“ გათვალისწინებულ საქმიანობებთან;
სკოპინგის ანგარიშის მიხედვით, კუნძულის მოწყობა გათვალისწინებულია შავი ზღვის აკვატორიაში 108,5 ჰა ფართობის ტერიტორიაზე, ასევე დოკუმენტში მითითებულია, რომ საპროექტო არეალის საერთო ფართობია 144,32 ჰა. აღნიშნულიდან გამომდინარე, დასაბუთებული უნდა იქნეს 144,32 ჰა ტერიტორიის ათვისების საჭიროება;
ფაილებში ასახულია მხოლოდ 144,32 ჰა ტერიტორიის პოლიგონი. სკოპინგის ანგარიშის მიხედვით, პროექტით გათვალისწინებულია ხელოვნური კუნძულის და ორი ხელოვნური ნახევარკუნძულის მოწყობა, შესაბამისად წარმოდგენილი უნდა იქნეს უშუალოდ საპროექტო კუნძულის და ნახევარკუნძულების“, - ნათქვამია სააგენტოს მიერ გაგზავნილ მიმართვაში.
სააგენტოს წერილში ასევე აღნიშნულია, რომ სკოპინგის ანგარიშის მიხედვით, ნახევარკუნძულების და კუნძულის ზღვის ტალღების ზემოქმედებისგან დასაცავად, გათვალისწინებულია 3 დამცავი მოლოს მოწყობა და აღნიშნული მოლოები ასახული უნდა იყოს დოკუმენტაციაში.
„ზემოაღნიშნულიდან გამომდინარე, სააგენტო სკოპინგის დასკვნის გაცემის მიზნით, ადმინისტრაციულ წარმოებას დაიწყებს მითითებული საკითხების გათვალისწინებით, განახლებული დოკუმენტაციის წარმოდგენის შემდეგ“, - აცხადებენ სააგენტოში.
კომპანია „ამბასადორი ბათუმი აილენდის“ იურისტის განმარტებით, სახელმწიფოს მხრიდან მოთხოვნილია დამატებითი დოკუმენტაცია, რაც მარტივად შესასრულებელია. კომპანია კი მზადაა მოთხოვნილი დოკუმენტაცია გარემოს ეროვნულ სააგენტოს მაქსიმუმ მომავალ კვირაში წარუდგინოს.
„სახელმწიფოს მხრიდან მოთხოვნილია ორი მარტივი დოკუმენტი. ერთი არის კუნძულის პროექტის განხორციელების დასაბუთებულობა და ამ მიმართულებით ფორმალური თვალსაზრისით არის შესავსები დოკუმენტი.
მეორე ძირითადი მოთხოვნა არის, რომ წარდგენილი იყო სახელმწიფოსთვის მიწის ნაკვეთის shp ფაილები, ხოლო გარემოს ეროვნულმა სააგენტომ წამოაყენა მოთხოვნა, რომ მთლიანი მიწის shp ფაილებთან ერთად წარდგენილი იყოს თვითონ კუნძულის მაიდენტიფიცირებელი shp ფაილები, რომელიც არის ძალიან მარტივად გადასაწყვეტი ამოცანა და ჩვენ მომავალ კვირაში მაქსიმუმ ამ დოკუმენტაციას შევავსებთ“,-განმარტავს „ამბასადორი ბათუმი აილენდის“ იურისტი გოჩა კამკია.
მისი თქმით, კანონმდებლობით გათვალისწინებული რეგულაციების შესასრულებლად დაახლოებით 4-5 თვეა საჭირო, რის შემდეგადაც კომპანია უკვე ხელოვნური კუნძულის პროექტის განხორციელების ეტაპზე გადავა.
„კომპანია გამოთქვამს აბსოლუტურ მზაობას დაიწყოს პროექტის განხორციელება, დანარჩენი ეს არის კანონმდებლობა. მოთხოვნები არის დასაკმაყოფილებელი და ესეც არის ბუნებრივი პროცესი. კომპანია მზად არის წარმოადგინოს ნებისმიერი დოკუმენტი, რომელიც არის მოთხოვნილი, ვინაიდან კომპანიის უკან დგას საერთაშორისო მაღალრეპუტაციული არქიტექტურული და საინჟინრო კომპანია და მსგავსი მოთხოვნები არის მარტივად გადასაწყვეტი ამოცანა“,-აცხადებს კამკია.
სკოპინგის ანგარიშის მიხედვით, კუნძულის მოწყობა გათვალისწინებულია შავი ზღვის აკვატორიაში 108,5 ჰა ფართობის ტერიტორიაზე.
პროექტის ფარგლებში, რომლის საინვესტიციო ღირებულება 100 მლნ დოლარია, ორი ხელოვნური ნახევარკუნძულისა და ერთი კუნძულის ტერიტორიას გააერთიანებს, პლაჟები, აქტიური და პასიური დასვენების კუთხეები, სასეირნო პრომენადები და ზღვისპირა ბულვარი მოეწყობა და აკვაპარკები, იახტკლუბი, საგანმანათლებლო დაწესებულებები, სავაჭრო ცენტრები, სასტუმროები და საცხოვრებელი დანიშნულების ნაგებობები აშენდება.
პროექტის განმახორციელებელი „ამბასადორი ბათუმი აილენდი“ 2021 წლის14 ივნისს დაფუძნდა. კომპანიას ორი აქციონერი ჰყავს, ესენია ბრიტანეთის ვირჯინიის კუნძულების ოფშორშირეგისტრირებული კომპანია Property Assets Investment LTD-ი, რომელსაც პროექტის 82%-იანი წილი ეკუთვნის და შპს„ბათუმი აილენდი“, რომელიც პროექტის 18%-იან წილს ფლობს, რომლის100%-იანი წილი ბიზნესმენ ფრიდონ ქათამაძეს ეკუთვნის.
კომპანია ხელოვნური კუნძულის პროექტის დასრულებას 3 წელიწადში გეგმავს.
