,
ევროკავშირი კრიზისის შემდეგ საქართველოსთან სხვადასხვა მიმართულებით მჭიდრო თანამშრომლობას გეგმავს. ამის შესახებ ევროპული საბჭოს პრეზიდენტმა შარლ მიშელმა საქართველოს პრეზიდენტთან სატელეფონო საუბრისას აღნიშნა.
პრეზიდენტის ადმინისტრაციის ცნობით, საუბრისას კორონავირუსის გავრცელების გამო შექმნილი რთული, კრიზისული ვითარება განიხილეს.
სალომე ზურაბიშვილმა ევროპული საბჭოს პრეზიდენტს ევროკავშირის მიერ, პანდემიასთან გამკლავების მიზნით, საქართველოსთვის გამოყოფილი დახმარებისათვის მადლობა გადაუხადა და აღნიშნა, რომ სწორედ ამაში გამოიხატება ევროპული სოლიდარობა.
შარლ მიშელი საქართველოს ხელისუფლების იმ გეგმებით დაინტერესდა, რომელიც ეკონომიკის გახსნის სტრატეგიას უკავშირდება და თავის მხრივ, ევროპის ქვეყნების სამომავლო ეკონომიკური განვითარების გეგმებზე ისაუბრა.
საქართველოს პრეზიდენტმა აღნიშნა, რომ კრიზისმა ტურიზმის სექტორი სერიოზულად დააზარალა.
„აღინიშნა, რომ გეოპოლიტიკურად საქართველო ევროპის ახლო პარტნიორია. საქართველოს პრეზიდენტმა ევროსაბჭოს პრეზიდენტს საქართველოს ოკუპირებულ ტერიტორიებზე არსებული ვითარების შესახებ მიაწოდა ინფორმაცია“, - ნათქვამია პრეზიდენტის ადმინისტრაციის მიერ გავრცელებულ ტექსტში.
საქართველოში კორონავირუსი 593 ადამიანს დაუდასტურდა, აქედან 223 ადამიანი უკვე გამოჯანმრთელდა. გარდაიცვალა 9 პაციენტი.
