„მმართველმა პარტიამ „ქართულმა ოცნებამ“, აირჩია რა ქვეყნის ახალი პრეზიდენტი, თავისი ხელისუფლება განამტკიცა. ამის მიუხედავად, ჯერ კიდევ მოქმედი პრეზიდენტი სალომე ზურაბიშვილი პოსტის დატოვებაზე უარს აცხადებს. ქვეყანაში კონფრონტაციული სიტუაცია გრძელდება“, - ნათქვამია გერმანული სამაუწყებლო კომპანიის „დოიჩე ველეს“ (Deutsche Welle) ვებ-გვერდზე გამოქვეყნებულ სტატიაში სათაურით  „საქართველო: არის თუ არა გამოსავალი კრიზისიდან?“ (ავტორი - იური რეშეტო).

გთავაზობთ პუბლიკაციას მცირე შემოკლებით:

რამდენიმე კვირაა ქართველები ქვეყნის სხვადასხვა ქალაქებში პერმანენტულ საპროტესტო აქციებს ატარებენ - 26 ოქტომბრის საპარლამენტო არცევნების დროიდან. ოფოციალური მონაცემებით, მმართველმა პარტიამ არჩევნებში ყველაზე მეტი ხმა დააგროვა და გაიმარჯვა, ოპოზიცია კი თვლის, რომ ხელისუფლებამ შედეგები გააყალბა. პროტესტების ტალღას იმპულსი შესძინა რიგმა გარემოებებმა: პირველმა - მთავრობის გადაწყვეტილებამ ევროკავშირთან გაწევრიანების მიზნით მიმდინარე მოლაპარაკების გადავადების თაობაზე და მეორემ - პრეზიდენტის არჩევამ საპარლამენტო კომისიის მიერ, რომელიც, ოპოზიციის აზრით, არალეგიტიმურია და აქედან გამომდინარე, არც პრეზიდენტი არ არის კანონიერად არჩეული.

ამჟამად მოქმედი პრეზიდენტი სალომე ზურაბიშვილი უარს აცხადებს რეზიდენციის დატოვებაზე. მისი აზრით, დღეისათვის საქართველოში მხოლოდ თვითონ არის ერთადერთი ლეგიტიმური ხელისუფალი.

რა აკლია საპროტესტო გამოსვლებს?

მიუხედავად იმისა, რომ დემონსტრანტები მოსახლეობაში მხარდაჭერით სარგებლობენ, პოლიტიკური სიტუაცია ჯერ-ჯერობით უცვლელი რჩება - ხელისუფლება თავის ძალაუფლებას იმტკიცებს, ოპოზიცია კი თითქმის დეზორიენტირებულია. პოლიტოლოგ გელა ვასაძის აზრით, ამის ორი მიზეზი არსებობს: პირველი - ხელისუფლება ხისტად მოქმედებს და პოზიციებს არ თმობს, მეორე - ქუძის საპროტესტო აქციებს ინტიტუციური მხარდაჭერა არ აქვს: „ჩვენ ვხედავთ საზოგადოების მღელვარე რეაქციას, მაგრამ არა პოლიტიკურ პროცესს. დღეს საზოგადოება ებრძვის არსებულ სისტემას და არა ოპოზიცია“.

რასაკვირველია, მხოლოდ ხალხის ნების არსებობა სტატუს-ქვოს შესაცვლელად არასაკმარისია. „ოპოზიციურმა პოლიტიკოსებმა ეს კარგად იციან“, - ამბობს გელა ვასაძე „დოიჩე ველესთან“ საუბარში, - მაგრამ მათ არ იციან თუ როგორ მივიდნენ ახალ არჩევნებთან. ვერავინ ვერ ხედავს ძალთა თანაფარდობის შეცვლის რეალურ მექანიზმს“.

კორნელი კაკაჩია „საგარეო პოლიტიკის ქართული ინსტიტუტიდან“ ასევე ჩივის, რომ ქართულ პოლიტიკაში სრული გაურკვევლობა სუფევს. „დოიჩე ველესთან“ საუბრის დროს იგი გამაფრთხილებლად ამბობს, რომ „სიტუაცია ძალიან მყიფეა: ამ მომენტისათვის არავინ არ იცის მკაფიოდ, თუ რა მოხდება 29 დეკემბერს, როცა ახალი პრეზიდენტი თავის უფლებამოსილებას ოფიციალურად მიიღებს. ასევე გაურკვეველია ჯერ კიდევ მოქმედი პრეზიდენტის სალომე ზურაბიშვილის პერსპექტივა, თუ იგი 29 დეკემბერს საპრეზიდენტო რეზიდენციას არ დატოვებს.

სამი სცენარი საქართველოსთვის

კორნელი კაკაჩია იმ სამომავლო სცენარებზე საუბრობს, რომელიც, სავარაუდოდ, საქართველოს ჰორიზონტზე ისახება:

„პირველი - თუ არაფერი არ შეიცვლება, საქართველო გახდება სერბეთის მსგავსი ქვეყანა“, - ამბობს იგი და მიანიშნებს ბელგრადის მთავრობის კურსზე, რომელსიც ოფიციალურად თითქოსდა ევროკავშირის წევრობისაკენ ისწრაფვის, მაგრამ იმავდროულად თავისი პრორუსული პოლიტიკით ევროკავშირის კურსს ეწინააღმდეგება.

მეორე - „უფრო უარესი სცენარი“, კორნელი კაკაჩიას თქმით, „საქართველოს ბელარუსიზაციაში“ გამოიხატება. „ამ დროს ხელისუფლება მკაცრად ახშობს საპროტესტო აქციებს და მონაწილეებს აპატიმრებს და მათ საპყრობილეებში გზავნის - ისე როგორც ეს მოხდა ბელარუსში 2020 წლის საპრეზიდენტო არჩევნების შემდეგ. შედეგებიც ისეთივეა მოსალოდნელი: როგორც ბელარუსია არის გარიყული მსოფლიოს დემოკრატიული ქვეყნებისაგან, ასევე საქართველოც იზოლირებული იქნება“.

მესამე - მოსალოდნელია მეორე „ვარდების რევოლუცია“, 2003 წლის მსგავსად, როცა საქართველოს სათავეში ჩაუდგნენ ახალგაზრდა პოლიტიკოსი რეფორმატორები. რევოლუციამ უსისხლოდ გაიმარჯვა. ამასთან, 2003 წლისაგან განსხვავებით, ამჟამად სიტუაციის გამწვავების უფრო დიდი რისკები არსებობს: რუსეთმა შეიძლება ყველაფერი გააკეთოს საქართველოს საზიანოდ - ან სავაჭრო ემბარგოს გამოაცხადებს, ან ახალი მთავრობის საქმეებში ჩაერევა.

29 დეკემბერი - უკანასკნელი შანსი?

რენატა სკარჟიუტე-კერესელიძე, რომელიც საგარეო პოლიტიკის ქართული ინსტიტუტის თანამშრომელია, თვლის, რომ საქართველოს პროევროპულ ძალებს ჯერ კიდევ აქვთ წარმატების შანსი - ისინი 29 დეკემბრისათვის უნდა მოემზადნონ; „პროტესტები მთელი ქვეყნის მასშტაბით უნდა განხორციელდეს. ამასთან, ბევრი რამ არის დამოკიდებული ევროკავშირისა და დასავლეთის მხარდაჭერის გააქტიურებაზე. სამწუხაროდ, ოპოზიციისათვის დიალოგის გამართვა ძნელი ხდება, რადგან ისინი, საწყისი ეტაპისაგან განსხვავებით, ახლა უფრო არალეგალურად მოქმედებენ, ვიდრე ლეგალურად“.

მართლაცდა, ამჟამად, ქუჩის აქციების მონაწილეთა შემართება ნელ-ნელა პასიურდება. ბევრ ქართველს არ სურს, რომ ქვეყანა 2014 წლის დროინდელ უკრაინას დაემსგავსოს, როცა კიევში სისხლიანი „მაიდანი“ მოხდა და ათეულობით ადამიანი დაიღუპა. თავის მხრივ, „ქარტული ოცნების“ მხარდამჭერები თვლიან, რომ მხოლოდ მმართველ პარტიას შეუძლია რუსეთთან დამოკიდებულების დარეგულირება. ყველასათვის ცნობილია, რომ პარტიის დამაარსებელს ბიძინა ივანიშვილს მოსკოვთან კავშირები აქვს და მისი პარტიის წინასაარჩევნო დაპირება სწორედ რუსეთთან ურთიერთობის მოგვარება იყო.

წყარო: https://www.dw.com/de/georgien-there-is-a-way-out-of-the-crisis/a-71080293