მსოფლიოს წამყვანი მასობრივი ინფორმაციის საშუალებები აქტიურად აშუქებენ საქართველოში, თბილისში მიმდინარე საპროტესტო აქციას, რომელიც ხელისუფლების მიერ ოპოზიციისა და რიგი არასამთავრობო ორგანიზაციებისათვის არასასურველი კანონპროექტის („უცხოელი გავლენის აგენტების" შესახებ) მიღებას უკავშირდება.

„თბილისის ცენტრში პოლიციამ ათასობით დემონსტრანტის დაშლის მცდელობისას წყლის ჭავლი და ცრემლსადენი გაზი გამოიყენა“, - ნათქვამია ბრიტანული „როიტერის“ (Reuters) მიერ გავრცელებულ ინფორმაციაში. „დემონსტრანტები შიშობენ, რომ კანონპროექტმა, შეიძლება ზიანი მიაყენოს სამხრეთ კავკასიის ქვეყნის ევროკავშირში გაწევრიანების იმედს“, -აღნიშნავს გამოცემა. „ბოლო წლების განმავლობაში, საქართველოს მთავრობა განიცდის დამკვირვებლების კრიტიკას, რომლებიც აცხადებენ, რომ ქვეყანა ავტორიტარიზმისკენ მიდის. „ივნისში, ევროკავშირმა, პოლიტიკური და სასამართლო რეფორმების შეფერხების მოტივით, უარი თქვა, მოლდოვასა და უკრაინასთან ერთად საქართველოსთვის კანდიდატის სტატუსი მიენიჭებინა“, - ნათქვამია მასალაში

(წყარო: https://www.reuters.com/world/europe/georgian-police-use-tear-gas-halt-protest-against-foreign-agents-law-2023-03-07/).

თბილისში მიმდინარე მოვლენებს ბრიტანული სამაუწყებლო კომპანია „ბი-ბი-სიც“ (BBC news) ეხმაურება და წერს, რომ საქართველოს დედაქალაქში აქციის მონაწილეებსა და პოლიციას შორის შეტაკება მოხდა მას შემდეგ, რაც პარლამენტმა მხარი დაუჭირა „საკამათო კანონპროექტს, რომელიც, კრიტიკოსების თქმით, ზღუდავს პრესის თავისუფლებას და თრგუნავს სამოქალაქო საზოგადოებას… „სპეცრაზმმა გამოიყენა წყლის ჭავლი და წიწაკის სითხე პარლამენტის შენობის წინ შეკრებილი ხალხის დასაშლელად“, - აღნიშნულია ინფორმაციაში.

გამოცემა წერს, რომ აქციის მონაწილეთა და ქვეყნის ოპოზიციის უმეტესობას შიშობს, რომ კანონის მიღება დაასრულებს საქართველოს მრავალწლიან ამბიციას ევროკავშირში გაწევრიანების შესახებ. „საქართველოს მოსახლეობის 80%-ზე მეტი მხარს უჭერს საქართველოს ევროპულ პერსპექტივას, რაც ასევე ქვეყნის კონსტიტუციაშიც არის გათვალისწინებული. ბრიუსელი ამჟამად განიხილავს საქართველოს განაცხადს ევროკავშირის კანდიდატის სტატუსის მისაღებად. ევროკავშირის უმაღლესმა წარმომადგენელმა საგარეო პოლიტიკისა სა უსაფრთხოების საკითხებში, ჟოზეფ ბორელმა განაცხადა, რომ კანონპროექტი არ შეესაბამება ევროკავშირის ღირებულებებსა და სტანდარტებს“, - ნათქვამია მასალაში

(წყარო: https://www.bbc.com/news/world-europe-64882475

თბილისის საპროტესტო აქციებს ბრიტანული გაზეთი „გარდიანიც” (The Guardian) ეხმაურება, რომელიც თავის ვებ-გვერდზე წერს, რომ „უცხოური აგენტების“ კანონის კრიტიკოსების განცხადებით, მან შეიძლება გაანადგუროს თბილისის იმედები ევროკავშირში გაწევრიანების შესახებ“. „პარლამენტის შენობის წინ შეკრებილ მომიტინგეებს საქართველოს, ევროკავშირისა და აშშ-ის დროშები ეჭირათ და საკანონმდებლო ორგანში მყოფ პოლიტიკოსებს უყვიროდნენ: „არა რუსულ კანონს!“. ბევრი ქართველი რუსეთს მტრად განიხილავს მას შემდეგ, რაც მოსკოვმა მხარი დაუჭირა სეპარატისტებს აფხაზეთისა და სამხრეთ ოსეთის რეგიონებში, რის შედეგადაც ასიათასობით ქართველი იძულებით გადაადგილებული რჩება“, - ნათქვამია მასალაში

(წყარო: https://www.theguardian.com/world/2023/mar/07/police-use-water-cannon-in-georgia-to-disperse-protests-at-authoritarian-law

გერმანული სამაუწყებლო კომპანია „დოიჩე ველე“ (Deutsche Welle) წერს, რომ, ბრიუსელისა და ვაშინგტონის მხრიდან კრიტიკის მიუხედავად, საქართველოს ხელისუფლება მხარს უჭერს "უცხოელი აგენტის" კანონპროექტს. „კანონპროექტი ფართოდ განიხილება, როგორც რეპრესიული რუსული კანონის მიბაძვა, რომელიც კრემლს საშუალებას აძლევს გაანადგუროს თავისი კრიტიკოსები. საქართველოს მთავრობის მიერ გამოქვეყნებული ანტიდასავლური ნარატივები და უკრაინაში შეჭრის შემდეგ რუსეთის წინააღმდეგ საერთაშორისო სანქციების შეერთებაზე უარის თქმა ქმნის შთაბეჭდილებას, რომ საქართველო რუსეთის ორბიტისკენ იხრება“, - ნათქვამია მასალაში

(წყარო: https://www.dw.com/ru/oppozicia-v-gruzii-prizvala-k-novoj-akcii-protesta-pered-parlamentom/a-64915702).

შვედური გაზეთი „აფტონბლადეტი“ (Aftonbladet) აქვეყნებს სტატიას სატაურით „ხალხმრავალი პროტესტი საქართველოში: „არა“ რუსულ კანონმდებლობას“ (ავტორი - ემილ ფორსბერგი). „საქართველოს დედაქალაქ თბილისში მძაფრმა პროტესტებმა იფეთქა. აქციის მონაწილეები ცეცხლგამჩენ ბოთლებს ისვრიან, თუმცა პოლიცია მათ დაშლას წყლის ჭავლითა და ცრემლმდენი გაზით ცდილობს. „არა“ რუსულ კანონს“, - გაიძახიან პროტესტანტები. პარლამენტის წინ სრული ქაოსი სუფევს“, - ნათქვამია პუბლიკაციაში.

ავტორი, სხვადასხვა წყაროების მიერ გავრცელებულ ინფორმაციებზე დაყრდნობით, განიხილავს კანონპროექტს „უცხოელი გავლენის აგენტების" შესახებ და აღნიშნავს, რომ ოპოზიცია ქართულ სამართლებრივი დოკუმენტს რუსული ანალოგიური კანონის ასლად თვლის (მიღებულია 2012 წელს), რომელსაც კრემლი საზოგადოებაზე კონტროლისათვის იყენებს.

„ბევრი ქართველი რუსეთს მტრად თვლის მას შემდეგ, რაც მოსკოვმა მხარი დაუჭირა აფხაზეთისა და „სამხრეთ ოსეთის“ სეპარატისტულ რეგიონებს 1990-იანი წლებიდან დაწყებული. „მე აქ იმიტომ მოვედი, რომ ვიცი - ჩემი ქვეყანა ევროპას მიეკუთვნება, თუმცა ამას მტავრობა ვერ აცნობიერებს. აქ იმიტომ ვარ, რომ ქვეყანა დავიცვათ, არ მსურს ისევ რუსეთის ნაწილი ვიყოთ“, - ციტირებს „აფტონბლადეტი“ აქციის ერთ-ერთი მონაწილის დემეტრე შანშიაშვილის გამონათქვამს. (წყარო: https://www.aftonbladet.se/nyheter/a/APx3rx/stora-protester-i-georgien-nej-till-rysk-lag).

მოამზადა სიმონ კილაძემ