,
ბრიტანულმა საინფორმაციო-ანალიტიკურმა სააგენტომ „როიტერმა” (Reuters) თავის ვებ-გვერდზე გამოაქვეყნა სტატია სათაურით „ვოლოდიმირ ზელენსკი ვლადიმერ პუტინის შესაჩერებლად, ამერიკა-ევროკავშირის ერთობისკენ მოუწოდებს“ (ავტორები - ლილი ბაიერი და ენდრიუ გრეი).
გთავაზობთ პუბლიკაციას:
იმის შიშით, რომ ნატოს მიმართ სკეპტიკურად განწყობილი აშშ-ის არჩეული პრეზიდენტი კიევს ამერიკულ სამხედრო დახმარებას შეუწყვეტს, ხუთშაბათს უკრაინის პრეზიდენტმა ვოლოდიმირ ზელენსკიმ დონალდ ტრამპს დაჟინებით მოუწოდა ევროპასთან მოკავშირეობით რუსეთი შეაჩეროს და მისი ქვეყანა გადაარჩინოს.
„ჩვენ ძალიან გვჭირდება ერთობა შეერთებულ შტატებს, ევროკავშირსა და ევროპის ქვეყნებს შორის“, თქვა ზელენსკიმ მანამ, სანამ მიმართავდა ევროკავშირის ლიდერებს ევროკავშირის სამიტზე, სადაც დომინანტური საკითხია უკრაინაში ომი, რომლის დასრულების პირობაც ტრამპმა დადო.
„ჩვენ ეს ერთობა მშვიდობის მისაღწევად გვჭირდება. ვფიქრობ, შეერთებულ შტატებს და ევროპას სინამდვილეში მხოლოდ ერთად შეუძლიათ პუტინის შეჩერება და უკრაინის გადარჩენა“, - დაამატა ზელენსკიმ.
ევროკავშირის დიპლომატებმა თქვეს, რომ მათი მიზანია ტრამპს ნათელი სიგნალი გაუგზავნონ უკრაინისადმი მათ უწყვეტ მხარდაჭერაზე და გააკეთებენ აქცენტს იმაზე, რომ ნებისმიერ სამშვიდობო შეთანხმებაში უკრაინა უნდა იყოს ჩართული და მის ტერიტორიულ მთლიანობას პატივი უნდა სცენ.
ანტონიო კოშტამ, რომელიც ევროკავშირის სამიტს, ევროსაბჭოს ახალი პრეზიდენტის რანგში პირველად თავმჯდომარეობდა, განაცხადა, რომ ევროკავშირმა სამართლიანი და ხანგამძლე მშვიდობისთვის უნდა იმუშაოს.
„ეს ომი მხოლოდ უკრაინას არ ეხება, ეს მხოლოდ ევროპას არ ეხება, ეს საერთაშორისო სამართლის საკითხია. საერთაშორისო სამართალმა უნდა გაიმარჯვოს და აგრესია უნდა დამარცხდეს“, უთხრა კოსტამ ჟურნალისტებს.
დონალდ ტრამპმა ომის სწრაფად დამთავრებისკენ არაერთხელ მოუწოდა. ორშაბათს მან თქვა, რომ ვოლოდიმირ ზელენსკი მზად უნდა იყოს რუსეთის პრეზიდენტ ვლადიმირ პუტინთან სამშვიდობო შეთანხმებას მიაღწიოს, თუმცა არ უთქვამს ეს თუ ნიშნავს იმას, რომ კიევმა შეთანხმების ფარგლებში მოსკოვს ტერიტორია დაუთმოს.
ევროკავშირის სამიტის დასკვნის პროექტში ნათქვამია, რომ „რუსეთმა არ უნდა გაიმარჯვოს“ და იქვე ნათქვამია, რომ უკრაინის საკითხზე არანაირი ინიციატივა კიევის ჩართულობის გარეშე არ უნდა განხორციელდეს.
წყარო: https://www.reuters.com/world/europe/eu-leaders-send-clear-message-trump-ukraine-debate-us-ties-2024-12-19/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
