ბრიტანული საინფორმაციო-ანალიტიკური სააგენტო „როიტერი“ (Reuters) აქვეყნებს სტატიას სათაურით „რუსეთმა უკრაინაში 3000 ტანკის დაკარგვის შემდეგ ძველი მძიმე ტექნიკის აღდგენა დაიწყო“ (ავტორები - მარკ ტრეველიანი და გრეგ ტოროდი), რომელშიც, ლონდონის კვლევითი ცენტრის მოხსენებაზე დაყრდნობით, განხილულია რუსეთის არმიის შეიარაღებასთან დაკავშირებული საკითხები, კერძოდ, ტანკებთან მიმართებით.

გთავაზობთ პუბლიკაციას:

ლონდონის სტრატეგიული კვლევების საერთაშორისო ინსტიტუტის მოხსენების მიხედვით, უკრაინაში სრულმასშტაბიანი ომის პირობებში რუსეთმა ფრონტის ხაზზე 3000-ტანკი დაკარგა. მკვლევარების თქმით, ეს უდრის მოსკოვის აქტიური ინვენტარის ანუ იმ გამართული ტანკების რაოდენობას, რაც რუსეთს ომამდე ჰქონდა.

„ეს გასაოცარი მაჩვენებელია “, - ამბობს სამხედრო ანალიტიკოსი ალექსანდრ ნილი და იქვე განმარტავს, რომ 3000 განადგურებულ ტანკს შორის შესაძლოა შედარებით ძველი, საბჭოთა ტანკებიც იყოს და არა მხოლოდ ახალი ტიპის რუსული ტანკები.

მკვლევარების თქმით, რუსეთს კვლავ აქვს ომის გასაგრძელებლად დაბალი ხარისხის, თუმცა საკმარისი ინვენტარი, რომლის ჩანაცვლებასაც კრემლი წლების განმავლობაში ცდილობდა. „ზოგიერთი მათგანი შეიძლება ყოფილიყო ძველი ტანკი. ასე, რომ ერთ-ერთი დიდი კითხვაა, თუ რამდენი ტანკი დარჩა მას ძირითადი შეტევისთვის “, - ამბობს ალექსანდრე ნილი.

ლონდონში დაფუძნებული სტრატეგიული კვლევების საერთაშორისო ინსტიტუტის კვლევა-მოხსენებებს ბევრი სამხედრო ანალიტიკოსი ეყრდნობა. ახალ კვლევაში, რომელიც რუსეთის სამხედრო ბალანსის შესახებ მომზადდა, აღნიშნულია, რომ ყოველთვიურად რუსეთს უკრაინაში ომის გასაგრძელებლად საწყობებიდან ათობით ტანკი გამოჰყავს და ხანდახან ეს რიცხვი 90-ს აღწევს.

კვლევაში ასევე ნათქვამია, რომ რუსეთს აქვს საშუალება მზარდი დანაკარგების ფონზე საჭირო სამხედრო ტექნიკა რეზერვებიდან სამი წლის განმავლობაში მოაბილიზოს და ეს ახალი წარმოების გარეშე.

კვლევაში აღნიშნულია, რომ რუსეთს სულ 1750 ძირითადი საბრძოლო ტანკი აქვს, დაწყებული „ტ-55“-დან, „ტ-80“-ისა და „ტ-90“-ის ჩათვით. სულ კი რუსეთში ტანკების 4000 საცავია რეგისტრირებული. ამ მონაცემებზე დაყრდნობით კვლევაში ნათქვამია, რომ 2024 წლისთვის, ომი სავარაუდოდ შეინარჩუნებს იმავე ტემპს, რაც ახლა და დარჩება ორ მხარეს შორის, ერთმანეთის გადაღლის ეტაპზე.

ინსტიტუტის კვლევაში ნათქვამია, რომ რუსეთმა უკრაინაში ომის განმავლობაში მნიშვნელოვანი დანაკარგები განიცადა, თუმცა დასავლეთის მიერ უკრაინისთვის დაგვიანებით მიწოდებულმა სამხედრო დახმარებამ რუსეთს მისცა საშუალება შეევსო მარაგები.

კვლევაზე და მონაცემების სიზუსტესთან მიმართებაში კომენტარი არ გაკეთებულა კრემლში, რუსეთის თავდაცვის სამინისტრომ ჟურნალისტებისა და მკვლევარების კითხვები უპასუხოდ დატოვეს.

მოხსენებაში ხაზგასმულია, რომ გლობალურად თავდაცვის ხარჯები 2022 წელთან შედარებით 9%-ით არის გაზრდილი და არსებობს მოლოდინი, რომ მიმდინარე წელს, ის კიდევ უფრო გაიზრდება.

წყარო: https://www.reuters.com/world/europe/russia-relying-old-stocks-after-losing-3000-tanks-ukraine-leading-military-2024-02-13/