,
ბრიტანული სააგენტოს „როიტერის“ (Reuters) მიერ გამოქვეყნებული სტატიის მიხედვით, სათაურით „ინფლაციის შემცირება მოსახლეობის თვალში ჯო ბაიდენის რეიტინგს ზრდის“ (ავტორი - ჟოზეფინა უოლკერი), ამერიკის პრეზიდენტის ჯო ბაიდენის რეიტინგი აგვისტოს დასაწყისის მონაცემებით, 40%-ია. იგივე მაჩვენებელი დაფიქსირდა ივლისში ჩატარებულ გამოკითხვაში. მიუხედავად იმისა, რომ ივლისის შემდეგ, პრეზიდენტის მოწონების მაჩვენებელი არ შეცვლილა, აღნიშნულია, რომ ეკონომიკაზე შეშფოთებამ გავლენა იქონია იმაზე, თუ როგორი დამოკიდებულება აქვთ ამერიკელებს პრეზიდენტის საქმიანობის შეფასებისას. ეს კი ხდება იმის მიუხედავად, რომ ინფლაცია ქვეყანაში მცირდება.
საზოგადოებრივი აზრის გამოკითხვა Reuters/Ipsos-მა ჩაატარა და ის სამი დღის განმავლობაში ონლაინ-რეჟიმში მიმდინარეობდა. ამერიკელებს ეკითხებოდნენ, როგორ აფასებენ თავიანთი პრეზიდენტის საქმიანობას.
გამოკითხულთა დაახლოებით 54%-მა თქვა, რომ არ მოსწონთ დემოკრატი პრეზიდენტის ნაბიჯები, ხოლო 6% დარწმუნებული არ არის, ან არ პასუხობს კითხვას. კვლევის ცდომილების ზღვარი 3%-ია.
ეკონომიკა, უმუშევრობა და სამუშაო ადგილები რჩება ამერიკელების მთავარ საზრუნავად. გამოკითხულთა მეხუთედი ამ საკითხებს ასახელებს, როგორც ყველაზე მნიშვნელოვან პრობლემას, რომლის წინაშეც დღეს ამერიკა დგას. ამერიკელთა 60%-მა, მათ შორის ყოველმა მესამე დემოკრატმა განაცხადა, რომ არ მოსწონთ, როგორ მართავს პრეზიდენტი ჯო ბაიდენი ინფლაციას.
ამერიკა ბაიდენის პირობებში ათწლეულების განმავლობაში ყველაზე მძიმე ინფლაციას უმკლავდება, თუმცა ფასების ზრდის ტემპი ბოლო დროს მკვეთრად დაეცა. ეკონომიკური ზრდა მცირე იყო, მაგრამ უმუშევრობის დონე ბოლო ათწლეულების განმავლობაში ყველაზე დაბალ ნიშნულზეა.
Reuters/Ipsos-ის გამოკითხვამ აჩვენა, რომ ერთ-ერთი მთავარი საკითხი, 2024 წლის არჩევნების დროს ეკონომიკაზე წუხილი იქნება. ყოველი მეხუთე რესპონდენტი, ვინც 2020 წელს ჯო ბაიდენს მისცა ხმა, ამბობს რომ არაა დარწმუნებული, ვის მისცემს ხმას ამჯერად.
ასეა თუ ისე, ამ უახლესი გამოკითხვის მიხედვით, პრეზიდენტის რეიტინგი 40%-ია და ცდომილების ზღვარშია გასულ წლის შუა პერიოდის 36%-იან მაჩვენებელთან შედარებისას.
რესპუბლიკელი კონგრესმენის ტიმ ბურჩეტის თქმით, ვაშინგტონის მიერ ოდესმე თუ გასაჯაროვდება უცხოპლანეტელების შესახებ არსებული ინფორმაცია, ბევრს ღამე არ დაეძინება. ამის შესახებ New York Post წერს.
„უბრალოდ ამას ვიტყვი - თუ ისინი გაასაჯაროებდნენ იმას, რაც მე ვნახე, თქვენ ღამე ვერ დაიძინებდით, ამაზე ფიქრში იქნებოდით“, - თქვა ბურჩეტმა Newsmax-ის წამყვანთან, რობ ფინერტთან საუბარში.
ბურჩეტმა, რომელიც წარმომადგენელთა პალატის საიდუმლო ფედერალური მასალების დეკლასიფიკაციის სამუშაო ჯგუფის წევრია - გაიხსენა, რომ ორი კვირის წინ მიიღო ინფორმაცია „ერთ საკითხზე“, რომელიც არამიწიერ სიცოცხლეს ეხებოდა და რომლის გასაჯაროებაც „დედამიწას თავდაყირა დააყენებდა“ და ქვეყანას „შოკში ჩააგდებდა“.
„ხალხი პასუხებს მოითხოვდა“, - განაცხადა ბურჩეტმა, თუმცა დეტალებზე არ ისაუბრა.
გადაცემაში წამყვანმა ყოფილი კონგრესმენის, მეტ გეცის ვიდეო აჩვენა, სადაც ის ამტკიცებდა, რომ იცოდა ადამიანი-უცხოპლანეტელების ჰიბრიდული პროგრამების შესახებ.
ბურჩეტმა ამ განცხადებაზე პირდაპირი კომენტარის გაკეთებისგან თავი შეიკავა.
„მე ისევ კონგრესის წევრი ვარ, ამიტომ ვერ შევძლებ მეტის თქმას იმაზე, რაც მეტმა თქვა“, - აღნიშნა ბურჩეტმა.
„მოიცა, მართლა?“ - ოდნავ დაეჭვებით უპასუხა ფინერტიმ.
„100%-ით სერიოზულად ვამბობ“, - უპასუხა ბურჩეტმა
კონგრესმენმა ტიმ ბურჩეტმა განაცხადა, რომ იგი მხარს უჭერს „ინფორმაციის სრულ გამჟღავნებას“ მიუხედავად იმისა, რა გავლენა შეიძლება ჰქონდეს სიმართლეს საზოგადოებაზე.
„ხალხს აქვს უფლება იცოდეს, ეს თქვენი გადახდილი გადასახადებია. მოდი, ყველაფერი გამოვიტანოთ სააშკარაოზე“, - თქვა მან.
ბურჩეტმა ასევე აღნიშნა, რომ ამ სენსიტიურ საკითხებზე პასუხისმგებელი ადამიანები თავად პრობლემის გულში არიან.
„როდესაც ვარ დახურულ შეხვედრაზე და ვსვამ კითხვას პრეზიდენტის პოზიციებზე ამ თემებთან დაკავშირებით და რომელიღაც ამპარტავანი მეუბნება, რომ პრეზიდენტიც კი მხოლოდ იმაზეა ინფორმირებული, რაც საჭიროა იცოდეს - ვფიქრობ, ეს ყველაფერი იმაზე მეტყველებს, რაც რეალურად ხდება“, - აღნიშნა ბურჩეტმა.
