,
წყარო:https://bm.ge/
კვირის მთავარ ავტოსიახლეებს წარმოგიდგენთ "თეგეტა ჰოლდინგი"
Tesla-ს საბაზრო ღირებულებამ $1 ტრილიონს მიაღწია
ყველაზე ძვირად ღირებული ავტომწარმოებლის, Tesla-ს საბაზრო ღირებულებამ $1 ტრილიონს მიაღწია - აშშ-ის საპრეზიდენტო არჩევნებში გამარჯვების შემდეგ, ტრეიდერები ვარაუდობენ, რომ ილონ მასკის კომპანიები ამიერიდან განსაკუთრებული პირობებით ისარგებლებენ, რადგან თავად მასკი ტრამპის საარჩევნო კამპანიაში აქტიურად იყო ჩართული. ამის შესახებ Reuters-ი წერს.
პარასკევს Tesla-ს აქციებზე ფასები 8.2%-ით, $321.22-მდე გაიზარდა, რითაც კომპანიის საბაზრო კაპიტალიზაციამ, 2 წლის შემდეგ პირველად, $1 ტრილიონს მიაღწია. მხოლოდ ამ კვირაში, Tesla-ს კაპიტალიზაციას $230 მილიარდი მიემატა.
Reuters-ს წყარომ ასევე განუცხადა, რომ მილიარდერს ტრამპის ადმინისტრაციის პირობებში მისთვის სასურველი რეგულაციების მხარდაჭერა და აშშ-ის საგზაო უსაფრთხოების დეპარტამენტის მიერ პოტენციური შეზღუდვების პრევენციაც შეუძლია.ამჟამად ილონ მასკის კომპანია აქტიურად მუშაობს თვითმართვადი ავტომობილების დახვეწაზე, თუმცა ამ ტექნოლოგიის კომერციალიზაციას, სხვა ფაქტორებთან ერთად, მარეგულირებელი ორგანო აფერხებს.
ტრამპის გამარჯვების შემდეგ, ილონ მასკი ერთ დღეში $26 მილიარდით გამდიდრდა, Forbes-ის თანახმად, ბიზნესმენის ქონება ამჟამად $300 მილიარდს აღწევს.
"შექმენი შენი ოცნება" - BYD-მ კვარტალური შედეგებით ამერიკულ Tesla-ს გადაუსწრო
"შექმენი შენი ოცნება" - ეს ჩინური ავტო გიგანტი BYD-ია, რომელმაც პირველად ისტორიაში კვარტალური შედეგებით მსოფლიოს ყველაზე ძვირად ღირებულ ავტო მწარმოებელს, ამერიკულ Tesla-ს გადაუსწრო.
BYD-მა კვარტალური შედეგები გამოაქვეყნა, რომლის მიხედვით, ივლისიდან სექტემბრამდე პერიოდში კომპანიის შემოსავალმა $28.2 მლრდ შეადგინა. ზრდა წინა წლის ანალოგიურ პერიოდთან შედარებით 24%-ია. შედარებისთვის, ილონ მასკის Tesla-მ III კვარტალში $25.2 მლრდ შემოსავალი მიიღო. თუმცა, მესამე კვარტალში Tesla-მ რაოდენობრივად მეტი ელექტრო ავტომობილი გაყიდა, ვიდრე BYD-მ. აღსანიშნავია, რომ BYD-მა სექტემბრის თვეში გაყიდვების რეკორდი დაამყარა, რაც გაყიდვების მზარდი ტენდენციის დასტურია. ჩინური ბაზრისგან განსხვავებით, მნიშვნელოვანი დაბრკოლებები ელის ჩინურ მწარმოებელს ევროპულ ბაზარზე, რადგან გასული კვირის ოთხშაბათიდან, EU-მა ტარიფები აამოქმედა, კონკრეტულად BYD-ის შემთხვევაში განაკვეთი 17%-ია. ასევე, ჩინურ ელექტრომობილების მწარმოებლებს უკვე ემუქრებიან 100%-იანი გადასახადით შეერთებული შტატებიდან და კანადიდან.
ინფორმაციისთვის, ჩინური ავტომწარმოებლების წინააღმდეგ მიმართული ტარიფები, ევროპული ავტოწარმოების დაცვისათვის არის მიმართული, რადგან შიშობენ, რომ მთავრობის მიერ სუბსიდირებულ ჩინურ ავტო წარმოებას კონკურენციას ვერ გაუწევენ.
ჩინეთის სარჩელი ევროკავშირის წინააღმდეგ
ევროკავშირის მიერ, ჩინურ ავტომწარმოებლებზე დაწესებული მაღალი ტარიფების საპასუხოდ, ჩინეთმა ჯერ კომპანიებს ევროპის ქვეყნებში ინვესტირების შეწყვეტისკენ მოუწოდა, ახლა კი, მსოფლიო სავაჭრო ორგანიზაციაში ოფიციალური სარჩელიც შეიტანა. პეკინი ევროკავშირს გადაწყვეტილების გადახედვისკენ მოუწოდებს. როგორც ჩანს, ჩინეთი ევროკავშირის მაღალ ტარიფებთან შეგუებას არ აპირებს. თავის მხრივ კი ევროკავშირი, შიდა მწარმოებლების დასაცავად, ჩინურ EV-ების იმპორტის შეზღუდვას განაგძობს.
ჩინეთის ვაჭრობის სამინისტროს სპიკერის განცხადება გამოცემა Bloomberg-მა გამოაქვეყნა. განცხადების თანახმად, ჩინეთი ევროკავშირს „შეცდომების“ დაუყოვნებლივი გადახედვისკენ და „უკანონო პრაქტიკის" გამოსწორებისკენ მოუწოდებს, რათა ქვეყნებმა ერთად შეძლონ და შეინარჩუნონ, როგორც ელექტრომომარაგების გლობალური ქსელის სტაბილურობა, ასევე ჩინეთ-ევროკავშირის ეკონომიკური თანამშრომლობა.
ჩინეთი სარჩელში მიუთითებს, რომ ევროკავშირმა, მაღალი ტარიფები რაიმე კონკრეტული „ფაქტობრივი და სამართლებრივი საფუძვლის" გარეშე დააწესა. სახალხო რესპუბლიკის მტკიცებით, ევროკავშირის გადაწყვეტილება WTO-ს წესდებას არღვევს და „სამართლიანი ვაჭრობის დასაცავად შემუშავებული ზომების ბოროტად გამოყენებაა “. ჩინეთის ვაჭრობის სამინისტროს განმარტებით, ჩინეთის ხელისუფლებამ სარჩელი „ელექტრომობილების ინდუსტრიის განვითარებისა და გლობალურ მწვანე ტრანსფორმაციაზე თანამშრომლობის დაცვის“ მიზნით შეიტანა.
Mazda ახალი ძრავის შემუშავებას გეგმავს - Skyactiv-z
იაპონური ავტომწარმოებელი Mazda-ს ახალი ბენზინის ძრავა, სახელად Skyactiv-Z. Skyactiv-Z-ით კომპანია Skyactiv-G-ისა და Skyactiv-X-ის ჩანაცვლებას გეგმავს. პირველი მათგანი საკმაოდ გავრცელებულია, თუმცა მეორემ - თავისი HCCI ტექნოლოგიის გამო - დიდი პოპულარობა ვერ მოიპოვა. კომპანია ამ ძრავების ეტაპობრივად Skyactiv-Z-ით ჩანაცვლებას დაიწყებს, რომელიც ასევე 4-ცილინდრიანი ძრავა იქნება. ამის შემდგომ კი, კომპანია უკვე მიღებული გამოცდილებით, 6-ცილინდრიან ძრავაზე მუშაობასაც დაიწყებს.
სხვა დეტალები კომპანიის ახალი ბენზინის ძრავასთან დაკავშირებით ამ ეტაპისთვის უცნობია. ცნობილია მზოლოდ ახალი ძრავის წარმოებაში ჩაშვების თარიღი, რომელიც ამჟამინდელი მონაცემებით მაზდას 2027 წლის მოდელებში გამოჩნდება.
Skyactiv-Z-ში კომპანია „ლამბდა ერთის“ წვის მეთოდს გამოიყენებს, რაც ნიშნავს, რომ „ძრავა, ფართო დიაპაზონზე დაბალი და მაღალი ბრუნის რეჟიმებში, მაქსიმალურ თერმულ ეფექტიანობას უზრუნველყოფს“. შედეგად, ძრავა, გარემოსდაცვით პოლიტიკასაც უფრო მეტად მოერგება. Skyactiv-Z თავდაპირველად ევროპისა და აშშ-ის ბაზრებზე გამოვა. ინჟინრები აქტიურად მუშაობენ, რომ ეს ძრავა Euro 7-ის და აშშ-ის EPA-ის Tier 4-ის სტანდარტებს შეესაბამებოდეს.
Audi-მ ახალი საავტომობილო კომპანია დააარსა, სახელად AUDI
Volkswagen Group-ის ერთ-ერთი ყველაზე მდიდრული ბრენდი Audi, ჩინეთში ახალი საავტომობილო კომპანიის შესაქმნელად ჩინურ ავტომწარმოებელ SAIC-თან გაერთიანდა. Audi-ის, ამ შემთხვევაში, ახალი კომპანიის ლოგოდ ოთხი რგოლი არ გამოუყენებია, თუმცა მარკეტინგის გუნდს, როგორც ჩანს სახელზე ბევრი არ უფიქრია.
ეს არის AUDI, ვერბალურად განსხვავება არ არის, უბრალოდ ახალი ბრენდის სახელი დიდი აოსებით იწერება და როგორც ტრადიციული გერმანული ბრენდის. დაბნეულობის თავიდან ასაცილებლად, SAIC-თან თანამშრომლობით შექმნილი კომპანიის ლოგოც მხოლოდ AUDI იქნება.
პირველი მოდელი, რომელსაც Audi და SAIC-ი ერთობლივი თანამშრომლობით წარმოგვიდგენენ, AUDI E კონცეფცია იქნება. ხოლო ამის შემდეგ, მომავალ წელს უკვე სამ ახალ, სერიული წარმოების ავტომობილს ვიხილავთ. ამ მოდელების პარალელურად კი, Audi, ცალკე, თავისი მოდელების წარმოებასაც გააგრძელებს.
ანალიტიკოსთა ნაწილი, კომპანიისთვის სახელის შენარჩუნებას, მარკეტინგულ გეგმებს უკავშირებს. ჩინეთში ახალი ბრენდები თითქმის ყოველ კვირას ჩნდება, შესაბამისად მაღალკონკურენტული გარემოც იქმნება. სახელის შენარჩუნება ამ კომპანიის კონკურენტებისგან გამორჩევას და ბაზარზე დამკვიდრებას შუწყობს ხელს.
Hyundai-ს წყალბადზე მომუშავე საბრძოლო ტანკი
ეს ფუტურისტული დიზაინის ტანკი Hyundai-ის ხედვაა, თუ როგორი იქნება შემდეგი თაობის საბრძოლო ტანკი, რომელიც წყალბადის საწვავის უჯრედებს გამოიყენებს. ამ ტანკის კონცეფცია, სახელწოდებით Main Battle Tank, მაგრამ ასევე ცნობილი როგორც K3, ავტომობილების მწარმოებელმა კომპანიამ პირველად 12 თვის წინ წარადგინა. მაშინ, ფართო საზოგადოებას Hyundai-მ მისი ხედვები სეულის აერონავტიკისა და დიზაინის საერთაშორისო გამოფენაზე გააცნო. შემდგომში, ევროპისა და კორეის რამდენიმე სხვა ღონისძიებაზე, ტანკი Hyundai Rotem-ის პრეზენტაციის ფარგლებშიც გამოჩნდა.
Hyundai-ის მომავლის ტანკი უნიკალური დიზაინით გამოირჩევა. ამ ტანკის კორპუსი სრულად ფოლადის, კერამიკისა და კომპოზიტური ჯავშანისგანაა შექმნილი. საბრძოლო ველზე კი, სავარაუდოდ, Hyundai-ის K3-ს ავტონომიური მართვის ფუნქციების გამოყენებაც შეეძლება.
გასულ წელს ვარაუდობდნენ, რომ K3 სრულიად უპილოტო ტანკი იქნებოდა, რომლის გაკონტროლებაც დისტანციურად იქნებოდა შესაძლებელი. თუმცა, ახალი ანგარიშების თანახმად, ტანკში სამი ადამიანი თავისუფლად განთავსდება. მას ასევე ექნება დრონებს განლაგების შესაძლებლობა, რაც შეიძლება საკმაოდ მოსახერხებელი იყოს სადაზვერვო მისიებში.
კორეის სამხედროები ამჟამად K2 Black Panther-ს იყენებენ. ტანკი 1500 ცხენის ძალის მქონე 12-ცილინდრიანი დიზელის ძრავითაა აღჭურვილი. თავდაპირველად, ავტომწარმოებელმა შესაძლოა K3-იც დიზელის ძრავით გამოუშვას, თუმცა ეტაპობრივად, მას წყალბადის ენერგია ჩაანაცვლებს, რაც მას ბევრად ეკომეგობრულსაც გახდის.
მიუხედავად იდეის წარდგენისა, დიდი ალბათობით, Hyundai მომავლის ტანკებს 2030 წლამდე რეალობაში ვერ მოიყვანს. კორეის სამხედრო არსენალში კი, ამ ვადებით, მათ 2040 წლამდე ვერ ვიხილავთ.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
