,
„უკრაინის საჯარისო სამხედრო ქვედანაყოფების კურსკის ოლქში შეჭრამ დასავლელ ექსპერტებს საქმე გაუჩინა - ისინი ეძებენ პასუხს კითხვაზე, თუ რისი მიღწევა სურს უკრაინას ამ ოპერაციით“, - ნათქვამია გერმანული ჟურნალის „დერ შპიგელის“ (Der Spiegel) ვებ-გვერდზე გამოქვეყნებულ ინტერვიუში სათაურით „კურსკის ოლქში შეჭრა უკრაინის საომარი მოქმედებებისათვის შეიძლება დასასრულის დასაწყისი იყოს“ (ავსტრიელ ექსპერტს გუსტავ გრესელს ესაუბრება ჟურნალისტი ალექსანდერ კაუშანსკი).
პუბლიკაციაში გუსტავ გრესელი აცხადებს, რომ უკრაინის არმიისათვის რუსეთის ტერიტორიაზე შეჭრა კიევისათვის ძალიან სახიფათოა და შეიძლება უკრაინის სამხედრო კოლაფსი გამოიწვიოს. მისი თქმით, ზუსტი ინფორმაცია ძალიან ცოტაა - დღემდე არავინ იცის, თუ რამდენი უკრაინელი ჯარისკაცი იმყოფება კურსკის ოლქის სამხრეთ რაიონებში, რასაც დიდი მნიშვნელობა აქვს უკრაინის წარმატებისათვის.
„ერთი რამ ცხადია: საომარ მდგომარეობაში მყოფი უკრაინა, რომელიც დონბასში მიმდინარე მძიმე ბრძოლებშია ჩართული, კურსკის ოლქის ოკუპირებულ ნაწილს დიდხანს ვერ შეინარჩუნებს. რაც უფრო წინ მიიწევენ უკრაინელები, მით უფრო სუსტდება მათი ლოჯისტიკა. მათ აუცილებლად ჭირდებათ დამატებითი ცოცხალი ძალა, სამხედრო ტექნიკა, საწვავით მომარაგება, დანაკლისის შევსება. არადა, აშკარაა, რომ ამჟამად უკრაინას დამატებითი რეზერვები არ აქვს. თუ რაიმე ჰქონდა, ისინი უკვე კურსკში იბრძვიან. დასავლური დახმარების სწრაფი გაზრდა ამ მომენტში ნაკლებად მოსალოდნელია.
ამრიგად, კურსკის ოლქში განხორციელებული სამხედრო ოპერაცია სახიფათოა თვითონ უკრაინის არმიისათვის, მაგრამ კიდევ უფრო უარესი შეიძლება იყოს შეჭრით გამოწვეული პოლიტიკური შედეგები. მართალია, უკრაინელები რუსეთის ტერიტორიის ოკუპირებით „წელში გაიმართნენ და სულში იმედი ჩაესახათ“, მაგრამ მაინც ყველასათვის გასაგებია, რომ ეს ყველაფერი დონბასის ფრონტის შესუსტების ხარჯზე მოხდა... ამიტომაც არმიის სარდლობას, თუ ისინი დამარცხდებიან, იმედგაცრუებული საზოგადოებისა და ჯარისკაცების წინაშე პასუხისმგებლობა მოუწევთ“, - ამბობს ინტერვიუში გუსტავ გრესელი.
ავსტრიელი ექსპერტი სახიფათოდ თვლის საერთაშორისო რეაქციასაც უკრაინელთა „სამხედრო ნახტომზე“, რომელიც კიევმა რუსეთის იურიდიულად აღიარებულ ტერიტორიაზე განახორციელა. „რასაკვირველია, ამერიკელები კარგად უწყოდნენ ამ ოპერაციის დაგეგმვასა და რეალიზებას. ამაზე ის ფაქტი მეტყველებს, რომ შეტევის დროს უკრაინელებმა მასიურად გამოიყენეს ამერიკული რაკეტები - HIMARS-ები. ამ რაკეტების სამიზნეთა კოორდინატები ყოველთვის ვაშინგტონთან არის ხოლმე შეთანხმებული. ამასთან, ოპერაციის შესახებ არაფერი არ იცოდა კიევის კიდევ ერთმა მნიშვნელოვანმა მოკავშირემ - გერმანიამ.
ბერლინში გაჩაღდა დისკუსია უკრაინის მხარდაჭერასთან დაკავშირებით მას შემდეგ, რაც ცნობილი გახდა, რომ კურსკი ოლქზე შეტევაში გერმანული მძიმე ტექნიკაც - ჯავშნიანი მანქანები „მარდერები“ მონაწილეობდნენ. ჯერ-ჯერობით ქვეყნის მთავრობას რაიმე ოფიციალური პოზიცია არ დაუფიქსირებია: „ალბათ, თუ როგორ რეაგირებას მოახდენენ მოკავშირეები, იმაზეც იქნება დამოკიდებული უკრაინის არმიის ოპერაციის შემდგომი წარმატება. აშკარაა, რომ გერმანიის კანცლერი რთულ სიტუაციაში აღმოჩნდება კიევისათვის დახმარების შემდეგი პაკეტის გაგზავნის დროს“, - ამბობს ავსტრიელი ექსპერტი.
გუსტავ გრესელის ვარაუდით, კიევს იმედი აქვს, რომ კურსკის ოლქში რამდენიმე მნიშვნელოვან ინფრასტრუქტურულ ობიექტს დაიკავებს, მაგალითად, კურსკის ატომურ ელექტროსადგურს და ამით დააჩქარებს რუსეთის თანხმობას სამშვიდობო მოლაპარაკებაზე, რომელიც ახლა უკვე ტერიტორიულ გაცვლასაც გულისხმობს. მაგრამ ექსპერტის აზრით, უკრაინა ჯეროვნად ვერ აფასებს ამ მეტად სარისკო გეგმის ჩაფუშვის შესაძლებლობას: „თუ უკრაინელები კურსკის ოპერაციით რეზერვებს მთლიანად „შეჭამენ“ და ისედაც გამოფიტული არმია კიდევ უფრო დასუსტდება, მაშინ დონბასის ფრონტი ჩამოიშლება და უკრაინა იძულებული გახდება აღმოსავლეთში კიდევ უფრო მეტი ტერიტორია დათმოს“.
დონბასში უკრაინის არმიის სავარაუდო კატასტროფა გერმანულ ოპოზიციას და რუსეთუმეებს - ისეთებს, როგორებიც არიან პარტიები „ალტერნატივა გერმანიისათვის“ და „სარა ვაგენკნეხტის კავშირი“ განმტკიცების შესაძლებლობას მისცემს. ისინი ყველანაირად შეეცდებიან, რომ უკრაინა არასაიმედო პარტნიორად, „დაუფიქრებელ ჩხუბისთავად“ წარმოადგინონ, ანუ ისეთად, რომელიც არავინ იცის, რას მოიმოქმედებს. ერთი სიტყვით, თუ უკრაინა კურსკის კამპანიით საბოლოოდ ვერაფერს მიაღწევს, მაშინ აშშ და გერმანია კიევს დახმარებას მკვეთრად შეუმცირებენ. ანუ, სხვაგვარად თუ ვიტყვით, „კურსკის ნახტომმა“ შეიძლება უკრაინის სამხედრო დასასრულის დაწყება გამოიწვიოს“.
„უკრაინამ კურსკის ოლქში შეჭრით შეიძლება უფრო მეტი დაკარგოს, ვიდრე მიიღოს“, ასკვნის ექსპერტი, - „კიევს სხვა სვლები აღარ დარჩა, სარისკო ოპერაციების გარდა. უკრაინას ომის მოგება არ შეუძლია მოკავშირეების მცირე დახმარებისა და ცოცხალი ძალის დეფიციტის გამო, ამიტომ კიევი ცდილობს რუსეთს ერთჯერადი მტკივნეული დარტყმები მიაყენოს, თუმცა შედეგები, ვიმეორებ, დიდ საფრთხესთან არის დაკავშირებული“.
წყარო: https://www.spiegel.de/ausland/russland-ukraine-krieg-militaerexperte-warnt-vor-ukrainischem-vorstoss-auf-russisches-gebiet-a-796f8e55-b102-4829-966e-99f3f8165c7e
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
