,
26 ნოემბერს, გადაცემა „რეაქციაში“ “ევროპული საქართველო”-ს წევრმა აკაკი ბობოხიძემ გააკეთა განცხადება, რომ ის არ არის აღფრთოვანებული „ექიმების მორჩილი მასით“.
„ექიმებით აღფრთოვანებას ვერ შემოვუერთდები, ექიმი, რომელიც რისკის ზღვარზე მიდის კოვიდინფიცირებულთან, რისკავს სხვა პაციენტის სიცოცხლეს. მე ვხედავ მორჩილი ექიმების მასას. ეკიპირების ერთ კომპლექტს რომ მოგცემენ და დღემდე ხმა არ გაქვს ამოღებული, მე გმირებად იმ ექიმებს ვერ ჩავთვლი“.
აკაკი ბობოხიძის განცხადებას ექიმი ირაკლი გოგოხია გამოეხმაურა სოციალურ ქსელში და მას „ერთ-ერთი უნიჭო და უინტელექტო პოლიტიკოსი“ უწოდა. უცვლელად გთავაზობთ აკაკი ბობოხიძის განცხადების ტექსტს:
„მოგესალმებით, ჩემო კოლეგებო (ექიმებო, ექთნებო და სანიტრებო)!
მინდა გითხრათ, რომ თქვენ ხართ გმირები, იმიტომ, რომ ყოველგვარი უკუგების მოლოდინის გარეშე აკეთებთ იმ საქმეს, რაც გულით გიყვართ და ამიტომაც, ცოტა გიჟებიც კი ხართ.
მე ჩემს სტუდენტებს ყოველთვის ვეკითხები:
რატომ გინდა ექიმობა? მოგწონს სამედიცინო ფორმა ექიმებს რომ აცვია? მოგწონს ხალხის დახმარება? ფულის გამო? ექიმები ითვლებიან საზოგადოების გამორჩეულ ნაწილად? და ა.შ.
ყველა პასუხი არაერთგვაროვანია და ყველას თავისი მიზეზი და ინსპირაცია გააჩნია.
ყველაზე მთავარი მიზეზი, მაინც მზრუნველობის სურვილია. ჩემმა მეგობარმა, ცნობილმა ქირურგმა კახა ქუნთელიამ ერთხელ მითხრა, ექიმად არ მუშაობ, ექიმი ხარ! უბრალოდ, ამ სიტყვებით ბევრი რამის თქმა შეიძლება.
ჩვენ ექიმები, ხშირ შემთხვევაში, როდესაც ჩვენს აზრს ვაფიქსირებთ, ეს აზრი აპოლიტიკურია და ხშირ შემთხვევაში, როცა არ ვაფიქსირებთ, იმიტომ, რომ ვხვდებით, რაღაც ეტაპზე მარტო ჩვენი საქმე უნდა ვაკეთოთ და აზრის დაფიქსირებას ეფექტი არ ექნება.
მე საქართველოში თითქმის ყველა რეანიმაციულ განყოფილებაში ვარ ნამყოფი და ყველა ექიმს ვიცნობ, მეამაყება მათთან მეგობრობა.
ზოგი სნაიპერია და კარგად ისვრის, ზოგი ნაკლებად კარგად, მაგრამ დღეს ყველა ისვრის და ესვრის კოვიდს და ბევრი ბრძოლის ველზე დაეცა კიდეც და უდიდეს მწუხარებას ვუცხადებ მათ ოჯახებს.
პანდემიების დროს ძალიან დიდი მნიშვნელობა ენიჭება ვორდინგს, რასაც ლევანი რატიანი აკეთებდა და ცდილობდა, ხალხის ფსიქოლოგიაზეც ემუშავა. ყველა მისი ინტერვიუ ნახეთ და გაიხსენეთ (ყველაფერი კარგად იქნება, აუცილებლად გადავრჩებით) მაგრამ ის ძალიან დიდი პრობლემების წინაშე იდგა და დგას ახლაც. იგივე შემიძლია სხვებზეც ვთქვა.
ყველა ექიმი, დღეს ვინც არის კოვიდის მართვაში ჩართული, რომ გამოვიდეს და დაიწყოს ამაზე ხმამაღლა ლაპარაკი, რა დღეშიც არინ, სამჯერ მეტი ადამიანი პანიკით მოკვდება.
ვიცი, რომ ძალიან ბევრი რამ არასწორად გაკეთდა და ბევრი შეცდომა დავუშვით ექიმებმაც, ხალხმაც და მთავრობამაც, მაგრამ ექიმები?! გვაპატიოს ყველა პოლიტიკოსმა, თქვენს დაკრულზე ვერ ვიმღერებთ, ეს იქნება პოზიცია თუ ოპოზიცია.
ჩვენ ყოველთვის გავაკეთებთ ჩვენს საქმეს, ყოველგვარი პოლიტიკის გარეშე და ეს არ ნიშნავს, რომ ჩვენს ირგვლივ პოლიტიკური ვითარება არ გავინტერესებს.
რატომ დაწერე ეს პოსტი? იმიტომ , რომ გუშინ ვუყურე აკაკი ბობოხიძის გამოსვლას გრიგოლიას ეთერში და გავღიზიანდი, რაც ექიმებზე ილაპარაკა.
სანამ იმას დავწერ, ამ კაცზე მე რას ვფიქრობ, მინდა კიდევ ერთხელ მადლობა გადაგიხადოთ ყველა ჩემს კოლეგას, ამ ბრძოლისთვის და იცოდეთ გმირები ხართ.
ბატონო აკაკი, მინდა იცოდეთ, რომ ერთ-ერთი უნიჭო და უინტელექტო პოლიტიკოსი ხართ ქართულ პოლიტიკურ არენაზე და მიკვირს იმ პარტიაში, სადაც ძალიან ბევრი ინტელექტუალია, თქვენ რა გესაქმებთ.
მინდა გითხრათ, რომ ყველა თქვენი მოსაზრება ქართველ ექიმებზე მცდარია და ისინი დიახ!!! გმირები არიან და მაყუთს, როგორც განაცხადეთ, არ აკეთებენ.
ჯანმრთელობა მინდა გისურვოთ და არასდროს არ დაგჭირდეთ ჰოსპიტალი, მითუმეტეს კოვიდის გამო იმიტომ რომ:
5 წუთი გისმინეთ და, როგორც პროფესიონალმა ექიმმა, დიაგნოზი დაგისვით. შეგიძლიათ უფასო კონსულტაციის სახით გაითვალისწინოთ, რასაც ეხლა გეტვით.
პაციენტი აკაკი ბობოხიძე, როგორც გამოიყურებით, ასაკი 65წ., თუ უფრო ახალგაზრდა ხართ, თქვენ თავს დააბრალეთ, ასე ცუდად რომ გამოიყურებით.
ბატონო აკაკი, თქვენ გჭირთ ანენცეფალია. შესაბამისად, თქვენი თავის ტვინის მოცულობა და სხეულის მასის ინდექსის შეფარდება პროცენტულად არ ემთხვევა, ამიტომაც გამოირჩევით დაბალი ინტელექტით.
რაც შეეხება თქვენს სხვა ქრონიკულ დაავადებებს.
ფილტვების ქრონიკული ობსტრუქციული დაავადება, რომელმაც გამოიწვია თქვენს პულმონარულ სისხლძარღვოვან ქსელში წნევის მომატება, შუნტის კომპენსირების მიზნით, ჯერ ამის გამო არ ჩამოგყალიბებიათ მეორადი პულმონური ჰიპერტენზია და მარჯვენა გულის უკამრისობა.
ამიტომაც არის, რომ ლაპარაკის დროს ძალიან მალე ხმა გეკარგებათ, წითლდებით (სასუნთი ზედაპირის ნაკლებობის გამო CO2-ს სწრაფად აგროვებთ) და შიდა საუღლე ვენები გებერებათ. ეს ყველაფერი ნეგატიურ გავლენას ახდენს ასევე თქვენი თავის ტვინის მუშაობაზე. ალბათ თავბრუხვევას ხშირად განიცდით და ამიტომაც გაქვთ აზროვნების დაქვეითება (ქრონიკული ჰიპოქსიური გავლენა თავის ტვინზე) და ხშირად ბოდავთ.
ამ ყველაფრით, რაც თქვენ გჭირთ, მე ექიმებს არ შევუტევდი. ამასაც რჩევის სახით გაძლევთ.
სამწუხაროა, რომ ამდენი წელი პოლიტიკაში ხართ და სინქრონული ლანძღვაც კი არ შეგიძლიათ. ქვეყნისთვის თქვენ, თქვენი უბადრუკი კარიერის განმავლობაში, რა სარგებელიც მოგიტანიათ, რეანიმაციის სანიტრის ერთ მორიგეობასაც კი არ უდრის.
მაპატიეთ, რომ მეორე ლოყა ვერ მოგიშვირეთ.
P.S. ჩემო კოლეგებო, თქვენ წარმატება ამ ბრძოლაში და აუცილებლად გავიმარჯვებთ!“
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
