“ერთიანი ნაციონალური მოძრაობა” პარტიის თავმჯდომარეს ელექტრონული მეთოდით აირჩევს. ამის შესახებ ინფორმაციას პარტია ავრცელებს. არჩევნებში მონაწილეობის წესი უკვე გამოქვეყნებულია. არჩევნები ფეისბუკის ჯგუფში “აირჩიე თავმჯდომარე მიმდინარეობს.

კენჭისყრა დღეს, 14:00 სთ-ზე დაიწყო და 25 დეკემბრის 21:00 სთ-მდე გაგრძელდება.

პარტიის ცნობით, ხმის მიცემის პროცესში მონაწილეობის მიღება შეუძლიათ “ერთიანი ნაციონალური მოძრაობის” წევრებს, მხარდამჭერებსა და გულშემატკივრებს.  როგორც პარტიაში აცხადებენ, ყალბი გვერდები და ე.წ. ბოტები კენჭისყრაში მონაწილეობის მისაღებად დასტურს (ავტორიზაციას) ვერ მიიღებენ.

“ერთიანი ნაციონალური მოძრაობა” დემოკრატიული მმართველობის უპრეცედენტო მექანიზმის დანერგვას იწყებს. გამჭვირვალეობის, ანგარიშვალდებულების, მოქალაქეების მონაწილეობისა და აქტიური ჩართულობის გაძლიერების მიზნით, პოლიტიკურმა საბჭომ მიიღო გადაწყვეტილება, დანერგოს პარტიის თავმჯდომარის შერჩევის თანამედროვე, ელექტრონული მეთოდი, რათა ათი ათასობით ჩვენმა მოქალაქემ, თავისი მონაწილეობით, მნიშვნელოვანი როლი შეასრულოს ამ პროცესში”, — ნათქვამია პარტიის განცხადებაში,

პარტიის თავმჯდომარედ ორი კანდიდატია წარდგენილი – ნიკა მელია და ლევან ვარშალომიძე.

პარტიის თავმჯდომარის პოსტი ვაკანტური მას შემდეგ გახდა, რაც 15 დეკემბერს გრიგოლ ვაშაძემ Facebook-ზე განცხადება გამოაქვეყნა, სადაც წერდა რომ ენმ-ს ტოვებს. პარტიის დატოვების მიზეზებს შორის იგი ასახელებს პარტიაში “ოდიოზური ფიგურების” გამოჩენას, ასევე, ელჩების წინააღმდეგ “გაჩაღებულ თავდასხმასა” და სხვა უთანხმოებებს.