,
რუსეთის სახელმწიფო სათათბიროს დეპუტატმა ზურაბ მაკიევმა განცხადება გაუგზავნა რუსეთის გენერალურ პროკურორს იგორ კრასნოვს, ავიაკომპანია Azimut-ის ინსპექტირების მოთხოვნით, რაც დაკავშირებულია ავიაკომპანიის ვებგვერდზე ოკუპირებული „სამხრეთ ოსეთისა“ და აფხაზეთის სიიდან ამოღების გამო.
„რუსულმა ავიაკომპანიამ Azimut-მა ვებ-გვერდზე რეგისტრაციისას მითითებული ქვეყნების სიიდან ამოიღო აფხაზეთი და სამხრეთ ოსეთი. ავიაკომპანიის ტექნიკური მხარდაჭერა სამხრეთ ოსეთის მოქალაქეებს სთავაზობს, მიუთითონ თავიანთი ეროვნული პასპორტი, როგორც საქართველოს მოქალაქის ეროვნული პასპორტი. გთხოვთ, შეამოწმოთ Azimuth Airlines-ის შესაბამისობა რუსეთის კანონმდებლობასთან, იმის გათვალისწინებით, რომ რუსეთის ფედერაციამ აღიარა სამხრეთ ოსეთისა და აფხაზეთის რესპუბლიკების დამოუკიდებლობა 2008 წელს.
ალბათ, შემოსავლების გაზრდის მიზნით, რუსული გადამზიდავი სახელმწიფო საგარეო პოლიტიკის საბოტაჟს ახორციელებს. ამ სიტუაციას შეიძლება ჰქონდეს უკიდურესად უარყოფითი შედეგები, რადგან მსგავსი პრეცედენტის არსებობის პირობებში, ხვალ, კომერციული სარგებლის შემთხვევაში, ისინი ყირიმის რესპუბლიკას, დონეცკისა და ლუგანსკის სახალხო რესპუბლიკებს, ხერსონისა და ზაპოროჟიეს რეგიონებს გამორიცხავენ რუსეთის ფედერაციისგან“ , - ნათქვამია მიმართვაში.
მაკიევმა კიდევ ერთი წერილი რუსეთის საჰაერო ტრანსპორტის ფედერალური სააგენტოს ხელმძღვანელს ალექსანდრე ნერადკოსაც გაუგზავნა.
„თუ ეს ინფორმაცია დადასტურდება, გთხოვთ, დაუყოვნებლივ შეაჩეროთ Azimut Airlines-ის საჰაერო გადაზიდვის ლიცენზია“, - ნათქვამია დოკუმენტში.
ცნობისთვის, ზურაბ მაკიევი თბილისში დაიბადა. ის წარმოადგენს პარტია „ერთიან რუსეთს“ და ჩრდილოეთ ოსეთ-ალანიის რესპუბლიკას სახელმწიფო სათათბიროში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
